家庭恩怨好易一個唔覺意，拍成誇張的「溏心風暴式」電影。《辯父律師》穿插家庭影片，可愛三兄弟兒時片段，同當下冷漠拘謹的家庭生活作強烈對比，鋪排出飾演惡棍律師二仔Hank（羅拔唐尼Robert Downey Jr）同法官（羅拔杜華Robert Duvall）老豆的多年心結。雖然有情緒爆發高潮位，但f**k來f**k去，比起大台劇集刻意出金句又瞪晒眼真摯好多。
老豆疑似撞死人，偏偏失去事發記憶，父子一齊為打官司「追尋記憶」。戲中加入大量菲林拍攝家庭影片，令觀眾隨著查案過程同時了解兩仔爺心結根源。其實都係老掉牙苦衷－－亞仔唔明老豆點解咁嚴厲，就發奮上進威番次，最後有名有利但唔肯認自己出身背景；老豆年輕時錯判犯人，間接害死無辜，於是就管束番自己個仔贖罪。
咁嘅故事可以拍成懸疑片，但《辯父律師》主菜係兩代人價值觀衝突，巧妙借法律過橋。律師亞仔打官司只管輸嬴，道理唔重要，所以唔明老豆願意認罪係在乎人地點評價佢一生。唔係老豆心裡面條蟲，於是不斷衝突，累積成暴風中爆發一幕，將前半部壓抑情緒一掃而空，暴風雨作背景的確有心思，橫風橫雨正正係兩仔爺當時心境。
「小Robert」唐尼演任性中產律師手到拿來，酒吧Flirt女眉來眼去唔猥瑣。得知老豆患癌一幕從錯愕到心酸亦克制細緻，加上鏡頭編排有心思，Fade out醫生冗長解釋，Fade in法官同孫女講故事，對比強烈唔煽情。「大Robert」羅拔杜華半夜發脾氣嘈醒全家，唔肯比人扶去廁所最後「成褲都係」，充份演繹老人家身體軟弱，但內心一殻眼淚唔願比你見嘅倔強一面，一個眼神搖身一變慈祥爺爺陪孫女讀書，不論暴躁定溫柔都掌握恰當。
《辯父律師》用兩大Robert鬥演技相當成功，拋棄肥皂劇式小誤會錯摸成大件事嘅老土方法，借打官司讓父子對質價值觀。和解後再進一步，將「追尋記憶」連結至「尋根」，Hank大叫一句「I’m from here」感人至深。