靈玲(七)

柏原太賀愛情連載靈玲七

「妳唔好玩我啦!」

眼前的壓迫力愈來愈大,但我的視線卻沒有放過這難得的美景。太刺激啦!

「你係唔想,定唔敢望呀?」游凱玲的臉湊到我臉前。

「唔想。」

「係咩?我唔係咁認為喎。」她的手跟我胸口只有幾毫米距離。「我聽到你嘅心跳好快。」

「因為我未死啫。」

「如果咁呢?」

她露出一張誘人的臉,輕咬手指。

「唔好逼我。」

「係又點呀?」

「我會咁樣……」

 

我立即伸出雙手到她胸前,還借勢站起來,嚇得她馬上閃避。但其實並不需要,因為我一下子就穿透了她的身體,並站了在她身後。

 

「妳怕咩呢?我根本非禮唔到一隻鬼,連衫角都掂妳唔到。同樣,如果妳要引我,亦只可以除衫嚟引我。」我為剛才的惡作劇感到自滿地說。

「我先唔會益你呀!」

「今次到我問妳喇。係唔想?定唔識呀?」

「你咩意思呀?」

「表面意思。就係影J 圖,妳就識。引真人,妳根本唔知點出手。」

「哈哈!」游凱玲生硬地笑起來。「我每晚引到唔知幾多個,好似你咁嘅毒男打J。我會唔識引人?」

「就係。妳頭先哄到埋嚟果時,隻手打算放邊?」

「你個身度囉!」

「嚴格上嚟講,係上身。」

「咁又點呀?」

「我以祖宗十八代之名發誓,所有謎底終於解開。我要拆穿妳呢個大話精,肯定妳根本唔識引男人。」我模仿某老牌漫畫的對白,見到她有忍笑的反應就好了,還怕我們之間有代溝。「啲J圖只係妳經理人公司指導妳影嘅,係唔係?」

「雖然比我唔知你為咩咁認為,不過我都想聽下你憑咩咁講呢?」游凱玲配合起來。

「首先,如果知道點色誘男人,隻手係唔會放喺最唔敏感嘅上身,而係下身度……咳咳!我指大脾呀!」

「呢個只係習慣問題啫!」游凱玲攤開雙手,滿不在乎的樣子令我差點發笑。

「就當妳係咁!不過,妳犯咗一個致命嘅錯誤。喺我哋距離最近嘅時候,妳竟然唔係拉低件衫條領,而係選擇咬!手!指!」

「咁……咁又點呀?」

「妳竟然唔知對一個男人嘅最大衝擊係視覺衝擊,而係用返一個放IG 嘅J圖post嚟引我。呢個同妳兩個月前嘅J圖係一模一樣。好明顯,呢個係經理人之前教妳擺嘅post,而妳根本就無呢個sense!」

「阿金田賢弟……呢個只係你嘅推理嚟,證據呢?」厲害!游凱玲竟然仍能繼續那本漫畫的style。

「證據……」我從桌面上拿起她的原稿。「就喺晒呢度!呢本就係犯人嘅自白書!」

「我唔明你講咩喎!」

「成份原稿都係描寫女主角同一位女同學之間,一個接近同性戀故事。雖然最後提到女主角同咗一位師兄一齊,但係描寫嘅幅度同仔細度完全係兩回事嚟。所以,根本就無呢個師兄存在。妳只係為咗顧及公眾形象,先硬加呢個師兄嘅情節上去。」

 

游凱玲沉默了片刻後,莞爾一笑。

 

「睇嚟我真係低估咗你。無錯!我真係唔識引男人。」

「妳可以坦白同我講出事情嘅始末。」

 

胡鬧了這麼久後,終於來到重點,就是要她對我坦白原稿的一切。因為之前聽取她故事的內容時,我已感覺到情節實在太矛盾。由經理人手上接過真實稿件後,再從她不抗拒「加料」的反應,我大概也想像到當中的原因。

 

接下來,她便把一段難以忘懷的過去娓娓道來。

 

游凱玲的初戀,也是她唯一的戀愛經驗,同時是一個悲劇。樣貌及身材皆好的她,一直不缺乏追求者。可是,她總對男生看不上眼,反而終日跟另一位女同學一起。當時,她還沒意識到自己的性向,只覺得對方是一位重要的朋友。可是,沒有不思春的青春期,那位女同學跟一位男生拍拖。熱戀中的小情人當然顧不得其他人的感受,游凱玲被冷落;冷落得讓她以為世界及友誼的本質都是殘酷的。

 

熱戀不到數星期,那個女同學彷彿也覺得對不起游凱玲,就主動跟她再親近。可是,世界上最殘忍的友誼倒退不是絕交,而是曾經至愛卻淪為第二。

 

「佢每一句講嘅嘢都同男朋友有關,每一個字的音調都充滿令人噁心嘅死甜味。佢好似夾硬要一個跛咗嘅人陪跑咁樣,你明唔明呀?」

 

可是,游凱玲忍受時間其實很有限。年輕的戀情總是易來易去,那位女同學跟男朋友不到半年就分手了。她盡力隱藏失而復得的喜悅,跟女同學終日悲天憫人的憂愁成了強烈對比。突然間,游凱玲泛起了一種贖罪的責任感,時刻陪伴在她身邊。

 

「有一日,我照常喺佢屋企安慰佢。不過,嗰日佢喊得特別犀利,原來個男仔好似同另一個女同學曖昧緊,仲傳返去佢耳度。我忽然有種抱住佢嘅衝動,然後我哋四目交投。佢同我講:『男人都係信唔過。』當我仲思考緊呢句說話嘅含意之際,嘴唇已經有一陣從來未有過嘅觸電感。我好驚,完全唔識反抗,但又唔想拒絕佢。於是,我哋就係咁開始咗。」

 

中學的女孩子拖手、相擁和傳紙仔遊戲並不奇怪。於其他人眼中,那位女同學只是回歸跟游凱玲尋常的友誼關係。但她心裡明白,平常的眉目傳情已不是單純的玩笑,而是帶有佔有的排他行為。要是在對方家中,接吻更成為標準行為。

 

「當然,仲有其他嘢。發育後第一次俾人全裸咁望住,除咗嘴之外,全身上下都幾乎俾佢錫過。起初,我只係唔識反抗咁去配合佢。但慢慢,我由呢種親熱嘅行為產生咗感情;一種特別嘅感情。我開始主動錫返佢,甚至希望互相進入彼此深處。佢成為咗第一個佔據我身心嘅人,亦係唯一一個。

 

吓?係佢定我?當然佢係引領我啦!

同佢一齊之前,我咩經驗都無。但佢唔同,我亦唔想知佢同之前嘅男朋友做過咩……

 

我只係記得佢每次都由一個微笑開始。之後,佢嘅指尖同嘴會分工合作,喺每次令我快投入嘅時候就會忽然引我笑,又喺笑過後再次挑動我嘅情緒。我唔知男同女之間會唔會係咁,但我肯定佢掌握住整個節奏,直至我無法忍耐嘅時候,主動向佢提出需求。」

 

女人的情慾是極難分家的,特別是年輕的少女,更難了解兩者的分別。當愛情來到時,情慾的歡愉只是昇華感情的眾多方式之一;但當身體沉溺於歡愉時,卻很容易產生愛情的幻覺。雖然身或心的滿足同樣會帶來快樂,但當中的因果卻是差之毫釐,謬以千里。明顯地,游凱玲遇上一個跟年紀不相符的對手。那個女同學只想利用身體的歡愉,去解決對感情失落的空虛。

 

「我同佢一齊咗接近年半,就喺我哋面對公開試嘅時候,佢竟然有一日突然提出分手。原因係佢又識到一個新嘅男朋友,佢仲同我講我哋遲早都會同其他男人一齊,不如早啲結束。佢甚至講到一個將來嘅畫面,就係如果對方結婚,一定要做大家婚禮嘅姐妹。

嘿!你幻想到我當時諗咩嗎?

當佢表面上講到每一句說話都係為我好,為我將來著想嘅時候,我覺得好噁心同虛偽。係妳帶我進入呢種關係;係妳對我講男人唔可信;係妳話我知我哋係世界上嘅唯一,但係妳竟然喺我全心投入嘅時候出賣我,放棄我!」

 

面對突如其來的結束,也是覆水難收的感情,失落的游凱玲以最不智的方式對這段感情作出報復。她答應了那個追求她多年的萬人迷學長,當他的女朋友,卻跟他約法三章。他可隨意向人宣稱兩人的關係,也可以牽手,可是僅此而已。那個鍾情她多年的學長自然不會拒絕,也樂得俊男美女的令人羨慕配對。

 

「我以為當佢知道咗我同其他男人一齊嘅時候,佢會同我一樣咁失落。點知佢好似解脫一樣,不停咁祝福我,更希望可以四個人一齊約會。今次,我答應咗佢。喺佢面前,我對所謂嘅男朋友千依百順,主動拋眉弄眼。結果,佢完全唔放喺眼內,甚至對佢嘅男朋友有樣學樣。

可能我俾咗一個錯誤嘅訊息,當晚個所謂男朋友送我返屋企嘅時候,佢拉我去梯間強吻我,唔理我嘅掙扎,伸手入我件衫亂摸。當我一打咗佢一巴之後,我同呢個男人嘅關係就從此完結。」

 

之後的游凱玲變得無心向學,也難以集中於考試。她自知成績不可能升讀理想的學校,卻在偶然的機會下認識了現在的經理人。原本她從沒打算在演藝圈發展的,但當經理人明言看上她俏麗的臉蛋外,還有跟清純樣子衝突的誘人身材後,她反而答應了。

 

「既然我俾一個男人睇,佢無感覺的話,咁我就俾所有男人睇。」

 

就是這個不成熟的決定,經理人刻意地讓她被網民拍到,再安排她選秀節目亮相,然後實踐了成為合約藝人的事前承諾。

 

「咁你咩都清楚晒啦?」游凱玲在訴說完自己的歷史後問。

「清楚。不過,仲有一點,就係妳有無再搵當日嘅女同學?」這是一個重要的問題。

「無。」

「所以,妳其實係想透過呢本書,令佢知道妳對佢嘅心意?」

「或者係……又或者我只希望佢有一絲後悔。」

「可惜,原本妳嘅經理人唔想呢段黑歷史暴光,畢竟當年其實無咩人知道。」

「咁你應該明白點解我唔反對佢咁無情嘅安排,仲堅持要你寫啦!」

「明白。不過,我反而覺得呢一刻最重要嘅,係妳去睇一睇佢而家嘅生活。」

「點解?」

「唔知。不過,我唔想妳對自己嘅決定後悔。」

「好。」

「咁仲唔行?」

「唔得呀!」

「又點呀?」

 

「訂咗啲bra都未送嚟。我唔戴bra,點出街呀!」

 

或許是我幻想吧!明明她就是沒有血色的鬼魂,卻感覺她漲紅了臉。我又不自覺地偷瞄令人不安分的地方,結果被她輕駡了一句:「咁曳,仲望!」

 

(待續)

靈玲(六)

靈玲(五)

靈玲(四)

靈玲(三)

靈玲(二)

靈玲(一)

 

其他連載:

野.火(全十集)

前度暫存迷你倉(全兩集)

如果Double May有特異功能(全十五集)

 

facebook:

https://www.facebook.com/Kashiwabara30

advertisement