如果愛一個人需要勇氣，那面對可能已不再愛自己的人，又需要什麼呢？
每一次阿杰去醫院的時候，他總會不期然地想著這個問題。曾經，他以為自己只為了報恩才跟詩穎一起，甚至視自己為已麻木了的木頭人。可是，當詩穎精神出現問題後，阿杰著緊得連自己也感到詫異。即使詩穎有時會大吵大嚷著分手，也有時哭得死去活來，又有時喝駡阿杰要專一，他仍不離不棄。
情侶就像一面鏡，當鏡中人傷心欲絕時，自己才了解什麼是心如刀割。
「世伯。」阿杰去到醫院時，已過了探病時間，但卻見到詩穎的父親仍坐在病房外的長椅。「佢今日好啲嗎？」
「都係咁。」詩穎父親的聲線沒起伏地回應：「其實你無必要嚟得咁密。」
「我擔心詩穎。」
「佢仲可以點呢？」老人家慨嘆一句：「如果佢唔係咁鍾意你呢個衰仔，就唔會攪成咁。」
「對唔住。」
「你攪到我個女咁樣，原本我應該好憎你……應該係到呢一刻都唔會原諒你。不過，詩穎每次入院，你都日日嚟，叫埋警察嚟趕你都唔走，似乎你都衰唔晒。」
世伯向阿杰遞上一罐咖啡。
阿杰心裡明白對於多年前喪偶，卻一直未娶的世伯而言，詩穎是一切歡樂的來源，甚至是生存的動力。這個世界上，應該沒有人會比世伯更疼愛詩穎。所以，在詩穎精神出現問題後，他一直對阿杰有很大敵意。直至今次詩穎再入院，或許終於被誠意打動吧！世伯對他的態度改善了不少。
「多謝。」阿杰接過那罐咖啡，算是世伯對他的一個肯定：肯定他也是疼愛詩穎的男人。
「早啲休息，聽日先再嚟過啦！」世伯站起身，似乎想跟阿杰一同離開。「詩穎啲朋友都走咗喇。」
「朋友？」
******
「高小姐，多謝你配合，『咁夜』都嚟差館落口供。」許Sir帶Vivian到重案組辦公室，在場只有白Sir及一名穿制服的女警。
幾日前，白Sir跟阿杰錄過口供後，就立即邀請Vivian 到警署協助調查。可是，她好像總在找藉口不來，最後卻選在晚上才出現。白Sir孤家寡人，當然沒有問題，但卻礙了許Sir的寶貴時間。
「高小姐，身體唔舒服嗎？」白Sir向一直垂下頭，戴著口罩的Vivian問。
「無事。同埋，叫我Vivian就得，我唔慣比人叫高小姐。」
「正如我喺電話所講，希望你可以提供日前被殺嘅曾浩霑資料比警方。」
「我同阿Jim唔太熟。」
「原來係咁。」白Sir只見Vivian始終垂下頭，只好加重壓力。「不過，跟據公司嘅人事紀錄，你係由死者保薦進入公司。」
「係交易。我同佢上床，佢就請我。」
年輕的許Sir 聽到有原此直白的答案，顯得有點錯愕，視線不自覺地移到Vivian的胸部。雖然穿著得很普通及保存，也難掩豐滿的上圍。然而，老練的白Sir卻不以為然。
「上過床都算唔熟？」白Sir繼續發問。
「只係一場交易。同去餐廳食飯之後比錢一樣，你都唔會話自己同收銀嘅好熟啦！」Vivian邊鄙視著兩人，邊回應。
「之後呢？入職之後，你同死者仲有無私人接觸。」
「我唔明白你意思。」
「即係例如仲有無繼續上床？」
「有。」
「咁就唔只『一場交易』咁簡單。」白Sir嘗試在言語上向Vivian施壓：「高小姐，你同死者到底係咩關係？因為呢單有可能係情殺案，我建議你最好向警方坦白所有同死者有關嘅瓜葛。否則，可能會令我哋調查方向出現錯誤。」
言下之意就是你若不坦白的話，我就把你當嫌疑犯來查。Vivian終於微微抬頭，剛好跟白Sir的視線對上。
「阿Jim一直都係單身。我唔知佢同其他女人有咩關係，但係我哋就只係單純性關係。」
「不過，你頭先話係交易。」
Vivian從利用交友程式認識Jim說起，再一五一十描述如何色誘他，聽得在一旁的許Sir也耳朵發熱。最後，她以要脅Jim成為自己的職場後盾牌作結。（註：Ep.3）
「雖然呢個係你個人選擇，不過以你嘅條件……」白Sir想到早前有關如何避免性騷擾的內部宣傳，頓了一頓，連忙解釋：「我指大學畢業，有必要咁樣搵工咩？」
「我身體有問題。一除口罩講嘢就會有強烈口氣，要面試嘅工作衰梗。」
Vivian說完後，拿開口罩，再刻意地呼一口氣。見到白Sir眉頭一緊，鼻頭一縮，她竟然滿意地微笑才重新戴上口罩。
「咁之後呢？佢反要脅你？」白Sir追問。
「唔係。」Vivian想了一想後，續說：「每次都係我主動提出嘅。正如我所講，佢似乎一直都係單身，而我亦一樣。大家成年人，總會有需要。阿Jim外型唔錯，身材keep 得好，又無拒絕過我……」
「咁你都唔差啫……」許Sir忍不住開口，卻遭白Sir厲了一眼。
「多謝喎。」Vivian幸災樂禍地說。
「即係除咗上床之外，就連傾偈都無？」白Sir重奪發問權。
「無。否則，就唔會被你哋請返嚟啦！」
「咩意思呀？」
「如果我有同Jim有正常溝通，就唔會空虛到同『某人』講心事。我同阿Jim之間嘅關係，只有一個人知。」
「我並無話係『某人』爆料比我哋。或者，係我哋自己查呢？」
「係咩？」Vivian隔著口罩也冷笑起來：「首先，Jim唔會主動同人講。其次，我哋除咗第一次開房之外，其餘幾次都係去佢間村屋屋企。嗰度密度低之餘，連管理員同閉路電視都無，點可能有人知呀？」
「好少人會留意朋友屋企嘅保安狀況。」
「我只係擔心自己安全啫，因為佢從來都唔比我喺佢屋企過夜。」
「對你咁差？」
「或者佢有原因。」
「你覺得係咩？」
「唔知道。」Vivian吸了一口大氣，仰著頭停下幾秒，好像要把淚水硬生生倒流回眼眶似的。「我成世人都好失敗。不過，今次最失敗；失敗到連……人都死埋之後，我竟然完全唔知，亦無問過點解自己連陪佢一晚嘅權利都無。」
「唔好太傷心。」白Sir不可能單純地安慰Vivian，因為他的目的只是查案。「我以為你同佢之間只係互相利用關係。」
「其實由始至終都只係我利用佢。而且，佢點都係我第一個男人。」
Vivian離開警署後，許Sir以為會被白Sir痛罵剛才的失儀。可是，白Sir只是靜靜地回房。在關上房門前，還輕輕地對他說：「收工啦！」
如果跟一個人表白需要時機，那面對已不存在的人，就是永遠地錯失良機。
一陣電話響聲打破了白Sir的沉思，傳來一個消息：「朱明杰因傷人被捕。」
人物關係圖：
