一、跟初相識的男性初次約會，絞盡腦汁想出話題，務求用對話塞滿整頓飯。任何小動作都變得不自然，手不知該放在哪裡，腳又想放平，翹起又不舒適。要打比喻的話，就像蜜蜂遇見一朵從未看過的花朵，花又從沒見過蜜蜂。花很怕被叮，蜜蜂又不知如何下手。
二、第一次到男朋友家，跟他的父母吃飯。一舉手一投足都被監視著，整頓飯就像被警察盤問的犯人一樣。通常，男友父母會其中一個會扮演奸角咄咄逼人，而另一個則扮演忠角：「哎呀咪問咁多啦，嚇親人啊。」是他/她的口頭禪。
三、跟分手已經有好一段日子的前男友吃飯……
而我，今日正要面對這一個困境。
「喂！啱啱到啊？」突然有人從後拍我膊頭，嚇了我一跳。
「係啊，咦？搞錯啊你遲到嘅。」跟舊情人會面，要做好的只有一件事！就是裝作冷靜、裝作若無其事、裝作見到他時一點感覺都沒有……在舊情人面前必須要挺起胸腔，看起來一副脫胎換骨的樣子。
我倆在咖啡室內隨便找了個位置坐下，他撇頭望各牆上的餐牌，想了想就說：「你都係一樣，焦糖咖啡？」
「係啊，不過呢……」我才說到一半，他就搶著說把我的說話打斷了。
「知啦，永無止境嘅減肥，少Cream少奶吖嘛。」他送了我一個白眼。
「估唔到你咁耐都仲記得喎。」我會心微笑，本來警戒的心情也放鬆不少。
「梗係記得啦，唔驚買錯俾你鬧啊？」
「乜我以前真係咁惡咩？」
「係！」他答得斬釘截鐵。
但就是這段普通不過的對話，我跟他打開了話題匣子，一開始聊近況，然後到大家的工作，最後……當然是屬於我們兩人的往事。一對已經分手的舊情人談起往事總是笑中有哭，當年試過跟他大吵大鬧，我扔爛了家裡很多東西，最後冷戰了幾個星期，現在說回來原來只是雞毛蒜皮的小事。
不過，能有一個任何事都能沒有避諱地講真心話的朋友也不錯。
然而，正當我這樣想之際，他提出了一個問題？「我覺得今次見返你真係好，我地乜都可以暢所欲言，咁樣幾好吖。係呢，你而家仲有冇拍拖啊？」
我發誓，這個問題是舊情人見面最不該問的問題。
「咁你呢？」我反問他。
「有啊，一齊咗無耐。其實我想俾你睇佢幅相好耐，不過又驚你會介意……」他支支吾吾，眼睛瞟向桌上的電話。
「唔介意，我都拍緊拖，不過換咗新電話，無晒相。」
「哦唔緊要啦，下次啦。喂喂喂！你睇吓，其實望真少少，佢都幾似你。」
我講了一個大話。
原來舊情人見面，都不一定能夠暢所欲言講真話。
