「喂！你個電話密碼係咩呀？」我拿着 Michael 的電話問。
「妳生日呀！」Michael 毫不猶豫地答。
「認真？」
他果然用了我生日作為電話密碼，但我卻不好意思再追問他原因。我開始懷疑他在很久以前，便愛上我。
電話一啟動，無數 messages 排山倒海地彈出來，比我今日上班時更誇張。這應該是正常吧！畢竟除了那爆炸性的新聞外，Michael 已失蹤了一整日。
「太多 messages 喇！你都見到啦！」我刻意望向電話屏幕，好讓 Michael 也同時看到。
「我只係想知工作上嘅電郵。」Michael 答。
可是，同一時間實在太多即時通訊 messages，我卻無意間見到一個他提出分手的對答。
「你同人講分手咩？」
「唔係吖！」
「仲話冇！又話想追我，原來一早有其他女人，仲要唔出聲添！」
「果啲玩玩下㗎咋！」
「係咩？嗱！作為你話要追嘅女人，原來妳本身有女朋友，咁係詐騙我嘅感情。作為多年知己，我竟然唔知原來你有……咁多女？？」
我發現不只一個，而是很多不同女人也在昨晚傳 messages 給他，讓好奇的我想打開來看個明白。
「唔好睇呀！」Michael 在我腦內吼叫。
「而家唔到你話事啦！你得番把聲咋！」
誰想到，當我逐一打開那些 messages 的時候，我由驚訝變成着迷，由着迷變成感動。
關於他的前度 Sally……
「Sorry ! 或者我哋唔應該再聯絡啦！」
「咁夜，你專登同我講呢啲嘢？」
「係。我一直覺得妳口中嘅 friend with benefit 係好唔正常嘅關係。我哋分開咗就係分開咗，唔應該斷斷續續。妳亦應該 move on。」
「你咁講，我都只好答應啦！你呢？Move on 咗？」
「係。我已經有鍾意嘅人。」
關於他的同事 Paula……
「叫我平日莊重啲，係咩意思？」
「就係字面嘅意思。我知妳對我有好感，但我一直唔想影響同妳喺公司嘅關係，先會假假哋咁同妳傾下……」
「我哋唔係成日互 flirt 咩？」
「唔係。」
「你食屎啦！我聽日會收到我封 resign 嘅 e-mail。BYE!」
關於跟他約了下星期食飯的一個異性朋友……
「做咩突然要 cancel 呀？」
「我有一個鍾意嘅女人，唔想佢誤會。」
「作為朋友，雖然我覺得有啲 sad，但我為佢高興。」
關於跟他曾經一時衝動而上床的女人……
「Sorry ! 我要 block 妳 contact。」
「原因？」
「我唔想我愛嘅人，以為我對一段舊情仲心存僥倖。」
「你其實冇必要。」
「但我覺得需要咁做。」
關於一個死黨……
「我同佢表白咗喇！」
「咩反應？」
「唔太好。」
「咁你會點？」
「我會用我往後所有時間，證明我對佢係認真的。」
「Bro，撐你！」
關於其他人……
「終於表白咗！預祝成功，都恭喜晒！」
「早就應該講啦！唔好再浪費時間啦！」
「又少一個潛力股，不過你一直都睇唔上其他人啦！」
「果然在世界末日前表白。」
「雖然唔知仲有幾長命，要幸福呀！」
原來這個男人一直默默地等，卻傻傻地扮演着好朋友的角色。對了，一向以為單身萬歲，可放任生活的我，其實每當遇到開心的、難過的、順利的、困難的、無奈的、寂寞的時候，Michael 都必然是我的 second choice 去傾訴，但他卻從沒推卻我。
甚至在節日時，Michael 也只會裝模作樣地投訴「正日嚟阻我溝女」，我卻沒有發現他根本早預留時間給我。
「你做咩咁傻呀？我拒絕咗你，你連渣拿都冇。」我問。
「如果我要渣拿，一早就已經有一堆啦！問題係我唔想咁委屈自己。」Michael 答。
「同我一齊咪仲委屈？你知道晒我所有過去。」
「我唔介意。」
「未係你嘅時候，你梗會話唔介意。到你得咗手，就反而會諗番之前嘅嘢，搵嘢嚟嘈。由知己變情侶唔 work 嘅 case，我聽過太多啦！」
「咁我唯有介意啦！」
「吓？」
「我介意，仲好介意，點解自己唔早一啲同妳表白自己，令我浪費咗咁多時間去介意一啲原本唔會發生，又唔應該發生嘅事。」
「你覺得我一定接受你咩？」
「遲早嘅事。」
「如果妳接受我，咁當然最好。如果妳唔接受我，繼續妳嘅遊戲人間，早晚會玩到倦，玩到冇人要，到時我再勸妳同我一齊。」
「黐線！如果我玩到六十歲呢？」
「就算等到世界末日，我都會等妳。」
真的可以嗎？
那一刻，我內心只是反覆地問這個問題。
說實在的，我是被感動了。但我早已經過了對愛情產生幻象的階段，不會因為感動而以為自己愛上對方。可是，如果世界真的快完了的話，我到底是想孤獨地面對，還是有一個我信任的人陪伴呢？
對！僅此而已。
我自私地想我愛不愛 Michael 並不重要，反正他看來很愛我。可是，若我餘生也遇不到一個令我愛上的人……那最適合作為終身伴侶的，大概就是讓我百分百信任的 Michael 了。
「我突然覺得你好冇誠意。」我故意裝惱怒。
「點解呀？」
「我問你如果我玩到 60 歲，你會唔會等我，即係 30 年咁耐。但係你就話會等到世界末日，即係只得 30 日，比我預期嘅正確答案少咗 365 倍喎。」
「我唔係咁嘅意思……等等！妳預期嘅『正確答案』？」Michael 似乎在我腦內翻滾着他的思考，續說：「咁即係我答啱，妳就應承我？」
「唔答你。」
我打開了他的衣櫃，拿了好幾件寬身大衣進浴室。
「妳又想做咩呀？」
「沖涼。」
「咁為咩拎咁多衫入去呀？」
「用嚟遮住塊鏡，唔畀你望，免得你喺我搞到我個腦裡面黐立立呀！」
「咁孤寒㗎！」
「如果你聽日醒得番，我立即應承做你女朋友，你到時想點都得。」
******
第二日早上，陽光刺向眼睛。我還來不及揉揉眼，卻被什麼擋着，還一下子壓到我的臉上。但那壓下來的，卻只是點到即止的溫柔嘴唇。
「早晨！」
「Michael？你郁得番嗱？」
「趁我冇辦法夜襲，妳就瞓喺我旁邊足足成晚咁耐。如果我再唔醒，咪好蝕！」
「你有 30 日時間嚟回本。」
「係 29 日先啱呀！」
「嗯嗯。」
Michael 懶理電話再次彈出無數的 messages，已急不及待為自己追討屬於自己的福利。世界末日又如何？即使無數新聞的資訊，也被其他人對我倆的祝福及期許掩蓋。
在世界末日倒數時，屬於我們的親密才剛剛開始。
******
「日前揚言會啟動核武，並足以摧毀地球 400 次的美國總統菲利普，與北韓領導人金在成通話後，突然共同宣佈已停止互相攻擊計劃。有消息指出今次人類史上最大的戰爭危機，竟然因為金在成計劃暗殺北韓權力第二順位的妹妹，但菲利普總統跟金在成妹妹原來有私情……
受消息刺激，今早港股及亞洲其他股市……」
~~完~~
重溫：
柏原太賀其他作品：
柏原太賀 facebook：
