貽興︰
你好，我一直都有睇開你既文章，今次我真係唔知點好，希望你比意見我。
我同我男朋友相識而時間非常短，直到依家都只係3 個月多小小，我地喺LKF 認識。佢對我係一見鐘情，初初相識時就好熱烈追求我，我哋之間未正式成為男女朋友之時，亦發生咗關係。
最初大家互相認識了解嘅時候，佢曾親口講過，佢自覺事業上咗軌道，有車有樓，係時候組織家庭，所以會好認真搵一個合適對象。如果我係27、28 歲就好喇，因為覺得我同佢好啱咀形，我性格上亦好吸引佢，但可惜我得2 開頭，佢覺得我太年青，仲會覺得我未玩夠，所以唔敢正式同我再發展落去。
喺到想講一講，我係深深覺得自己已經玩夠，都好想係平定落嚟嘅！
直到相識1 個月之後，有一晚佢終於開口問我做唔做佢女朋友。初頭我當然肯啦！但嗰陣我就質問返佢，「乜你唔係覺得我太後生，怕我未玩夠咩？你唔係想結婚咩？」佢就答我「唔理了！我咩都唔理了！我只係知道我真係好鐘（鍾）意你！」所以我就同佢一齊咗。
正式拍拖頭兩星期一齊都十分完美，一星期見兩至三次面，佢會帶我周圍去，帶我見識好多新事物。
有一次食飯時見佢神情唔對路，問過下佢就同我講原來佢屋企人唔鐘（鍾）意我。仲要叫佢唔好再搵我，原因就係我學歷唔夠好而且實在太後生。不過我係未接觸過佢屋企人！
初頭佢有為我同佢屋企人嘈過咗幾次，但佢深受屋企人影響，佢話過屋企人嘅決定係最重要，就算結婚最後都係睇屋企人頭，覺得可能同我一齊係錯誤嘅決定！
但我唔甘心，我接受唔到最熱戀嘅時候分手！所以我有好幾次都同佢認真傾過，佢最後都會比我感動到。不過佢實在受唔住屋企人嘅反對，所以同佢屋企人講已經同咗我分手。
之後對我態度就愈黎愈冷淡又會忽冷忽熱，一星期見一次面，仲要得幾個鐘，無咩交流，仲衰過唔見。
有一次直頭成個星期無搵過我，我搵佢都無回覆我，終於我忍唔住講分手。但講完分手之後兩日佢就態度唔知點解變返最初初咁，成日搵我仲話好掛住我想見我。我最後心軟見佢，又一齊返了。
一齊返之後到依家都有兩至三個星期，我地之間嘅感情就好似變返最初咁，愈黎愈甜蜜！
我會諗，到底我應該唔好理咁多，活在當下，enjoy 拍拖比人愛鍚。定係知道結果都係會分手，長痛不如短痛，係最美好嘅時候好嚟好去？（我自問做唔到呢點）
我身邊好多朋友都話，同佢一齊係無將來，無結果，而我自己都知道。但我自問我真係好愛呢個人，我亦感受到佢對我係真，佢真係鐘（鍾）意我。同佢一齊好開心好安心！同佢由認識到依家都只係短短幾個月，但感覺好似已經年幾兩年咁！
不過佢自己都知同我一齊佢屋企人永遠都反對。佢都知同我係無結果。只係佢同我依家可能都諗緊同一樣野，又有時我會諗佢會騎牛搵馬，當佢搵到個條件符合佢屋企人又符合到佢本人就會慢慢遠離我。
你認為，同佢一直拍落去，係件好事定壞事？定係有咩意見比到我？感激萬分！
懶訓豬
懶訓豬：
不能入屋的戀愛，年輕時不妨，反正也沒結婚打算；但當你年紀已經不輕，是否要為一段不會有結果的關係繼續付出，卻是另一個問題了。
換一個方式問你吧：如果你需要每天供款，但最後那舊錢不能拿出來，也不會給回你的，你會願意供嗎？
正常人都不會這麼笨吧？但你跟他的戀愛，卻是這樣的一種供款形式沒錯。再甜蜜，都不可能有將來，當下再甜蜜又如何？
家人反對就不堅持娶你，只是不夠愛你，同時太愛自己的自私証明而已。
我不知道他是否那種所謂上流社會講究門當戶對，會介意另一半的所謂學歷，但如果他最終也認同這樣的觀念，那麼他其實也沒有真的很愛你。羅蜜歐當能為茱麗葉背棄家族，他所謂的愛你，再愛也不過是享受一段最後不必負責任的愛，有什麼事就能以家人反對作藉口拍拍屁股走人，多麼瀟灑？屆時除了一句對不起，還留給你什麼？你真的就這樣甘心被他剝削麼？
如果你能豁出去，玩玩無妨，反正誰也沒欠著誰，我尋你開心，你尋我開心，沒什麼要恨，但玩認真，最後一輩子放不下的一定是你，擁著另一個女人帶回家被家人熱烈歡迎的一定是他。懶瞓豬，用你的豬腦想一想吧。
祝 豬極有譜
貽興
