advertisement
渣打馬拉松2018下星期就係，有成七萬四人跑，眾藝人如蔡思貝都會參加。當大家都熱切期待嘅同時，希望大家唔好忽略以往每一年都有意外，甚至係猝死事件發生，或者你會話大多都係隱疾發作做成，點會輪到你？但如果凡事都會有意外，呢一秒你做多咗呢小小嘅步驟，或者就能減少意外發生嘅機率，信不信由你！小編就建議大家都睇下喇～
- 每日早上先量度心跳，如果心跳唔正常，表示你昨日訓練太重，今日必須休息，否則身體會超過負荷。
- 練時要多加注意步伐大小、上半身嘅擺動等，建議配戴心跳錶，如果發現心跳加快，表示你嘅速度增加咗，適當時應該要減慢。
- 喺屋企做簡單嘅舉重訓練，可以增加你嘅肌耐力，令你跑步時更穩定。
- 熱身方面，可以先作簡短嘅跑步熱身，比起直接拉筋，可減少身體受傷嘅機會。
- 比賽用嘅跑鞋唔係人人都適合買，如果你唔係一個追求速度嘅跑者（10KM以36分鐘完成或是一場馬拉松以3小時內完成）。買一雙普通嘅跑鞋更適合你，否則更容易令膝蓋、腳踝受傷，因為跑步時，腳要承受身體重量約3倍，下坡為7倍，所以最緊要搵一對適合自己嘅跑鞋。
以上5點，或者大家都會覺得係再普通不過嘅事情，但因為微細，好多時候都會無意中忽略咗，希望下個禮拜大家跑得開心之餘，都記住健康先係最重要，如果身體真係負荷唔嚟，就唔好頂硬上喇，機會長有，但人生只得一次嫁咋～
圖片來源：Instagram
