「周柏豪鼻哥窿」識做戲都冇用⋯⋯內地播港劇 《再創世紀》三大死因！

最近《延禧攻略》、《如懿傳》等內地劇爆紅，港劇收視低迷，終於有一套開播前已經有啲回響，講梗嘅係《創世紀》續集 - 《再創世紀》！近日喺內地率先開播，最引人注目嘅竟然係周柏豪，「周柏豪鼻哥窿」再次成為網民焦點，睇睇幾張連環圖先！

雖然「周柏豪鼻哥窿」咁識做戲，不過似乎依然救唔到《再創世紀》嘅收視，以下幾點「死因」，唔知大家又認唔認同呢？

《再創世紀》死因一

根據TVB劇集嘅邏輯，一套劇爆咗，好多時都會繼續拍續集，拍續集都唔係問題，但再翻炒同一個topic，又係講商戰題材，觀眾睇見都覺得悶～好似《溏心風暴》咁，出第一輯反應好，出到第二輯都有啲反應，但出到第三輯，又係講爭產，睇見都唔想追啦～

《再創世紀》死因二

想當年《創世紀》，晚晚睇陳錦鴻、羅嘉良、郭可盈、陳慧珊做對手戲，投入感十足，依家講起都仲記得佢哋嘅角色，如今開拍第二輯，得返郭晉安一個撐場，換晒舊班底，加入周柏豪、周麗淇、袁偉豪、林文龍、楊怡、鍾嘉欣等，雖然係有新鮮感，但始終冇咗第一輯果種原汁原味，硬係爭梗啲嘢！

《再創世紀》死因三

內地播放港劇，總會刪減某啲內容，至於原因就等大家參透下喇～無綫原版本有36集，內地版本就刪減湊合至34集，雖然依家只係播放咗幾集，但明眼人都睇到，劇情上嘅轉接總會有奇怪嘅地方，呢點會唔會影響到收視，就無從稽考喇～