advertisement

最近每晚開電視,都會見到香香公主(岑麗香)嘅演出,又sweet又可愛嘅笑容絕對可以氹掂一班宅男fans!不過唔講唔知,香香公主一出道嘅時候都有過一段黑歷史,唔知係咩?咪就係俾網民話佢肥囉!初出道嘅香香公主睇落眼細兼包包臉,最出事嘅地方其實唔係佢肥,而係個妝出事啊!依家香香公主睇落瘦咁多,好大可能係化妝技巧提升咗,識修容自然靠化妝都可以幫佢減肥啦!

第一招:幼眉變粗眉
唔使我講大家都知,幼眉真係上個世紀嘅事啦!條眉又幼又彎,令香香睇上來塊面好大,老咗幾年之餘仲有啲惡! 依家香香換上大熱「一字眉」,令臉部輪廓睇起來更平均,絕對符合佢又sweet又有女人味的形象!

第二招:眼尾要拉長
想令自己雙眼睇落大啲、塊面又相對細啲嘅話,絕對要好似香香咁將眼尾以眼線筆拉長!由於早期香香嘅眼線多數會直接停於眼尾,自然令眼睛睇落比較細。相反,依家香香多數會將眼線於眼尾拉長0.5cm左右,有放大雙眼效果,對眼大咗塊臉自然瘦啲啦!

第三招:修容嘅重要性
好多女仔都知,想塊面睇落瘦啲,修容絕對係好重要。但想望落輪廓深啲,打鼻影都好重要!好似香香咁,初出道嘅時候五官睇落又平又扁,但近年佢嘅化妝技巧好明顯喺打鼻影方面花咗心思。想學香香咁睇落個鼻高啲,可以由眉頭開始沿鼻樑掃上陰影,不過記得輕手啲,唔係好易變阿梅㗎!