advertisement

貴為IG女神,倪晨曦(Elva)每次影相都能做到360度零死角,她絕對有一套影靚相必勝法。即將於2月結婚的她,早前就同未婚夫飛去「天空次鏡」玻利維亞影了一輯唯美婚紗照。對於一般準新娘而言,穿起婚紗擺pose要夠靚﹐可能會有點難度,今次Elva就同大家分享影pre-wedding相時如何擺pose最美,有KOL教路,效果真係會唔同啲!

shebrides︰大日子將到,待嫁心情如何?

Elva︰其實我自己嘅心情都好relax,到依家都仲未係好緊張,可能因為平時我都會做好多event,所以面對自己嘅wedding,我都可能當一個event咁,心情盡量relax,反而我的未婚夫就比較緊張。

 

shebrides︰你的婚禮籌備成點?

Elva︰其實依家婚禮啱啱開始籌備,因為我之前忙緊fashion week,所以十月先開始真正投入籌備個婚禮。揀咗婚紗,但係啲decoration,同埋帖都仲要印同派,有啲細節位未做晒,一步一步嚟喇。

shebrides︰平日工作都有機會著婚紗影相,跟你現在真正影pre-wedding又有咩唔同感覺呢?

Elva︰影pre-wedding嘅感覺梗係會興奮好多喇,因為平時影婚紗相係我自己單人,現時影pre-wedding隔離有另一半,咁嗰個互動就會close好多,同埋都係想影一啲最真實最自然嘅樣。

 

shebrides︰影pre-wedding婚紗相時有甚麼心得?

Elva︰千祈唔好俾自己好大壓力,因為好多時影相你會可能見到人哋影呢啲好靚,我覺得做定啲功課都ok,可能你會有幾張相嘅pose好想去做,咁你可以同另一半夾一夾。我自己鍾意嘅風格就係旅行中比較causal嘅感覺。其實我自己影相就ok,好放鬆,但我另一半影相係好緊張,所以我就搵晒幾十張相喺度,跟住我就同佢講,不如你喺屋企練習下喇,你喺屋企睇下點樣可以放鬆自己嘅表情去影。

 

shebrides︰準新娘應該如何擺pose影pre-wedding婚紗相?

Elva︰我覺得好多時可能影相嗰陣時會跌入個框框,就係呀點樣先影得最完美呢?其實好多時影相反而有少少郁動呀,跟住望下邊一啲動作影到自己嘅身形靚,令到自己影出嚟張相會靚啲嘅。

Elva's tips 1︰不要雙手垂直

好多時我哋可能剩係會將隻手擺喺前面好斯文咁影相,咁但係其實我哋叉腰呢反而會令到隻手臂幼啲㗎喎,因為呢度嘅肉唔會咁樣夾住喇。同埋如果裙一字膊嘅話你叉腰呢,反而show到呢個鎖骨位呢個領係再更加靚啲嘅。

Elva's tips 2︰挺胸企直回頭笑

有時影一啲回頭嘅相喇,咁可能有啲新娘就有寒背呀,或者無自信,咁其實影相就記得要有自信,相信自己係最靚嘅,咁樣記得挺胸喇、企直喇,回頭嗰陣時將個頭向後面方向望多啲,因為呢雖然有少少唔自然嘅,當我哋個頭turn多少少影出嚟嘅angle反而係最靚嘅,因為見得多啲我哋個樣喇。

Elva's tips 3︰配合自然動作

當我哋可能會想企喺度影條拖尾裙,覺得裙好靚,但係如果自己企得好生硬呢,其實影出嚟嗰張相就會無一個動感喺度。其實輕輕可能真係扮向前行一步,或者將隻手攞住個裙擺fing一fing,影出嚟個攝影師capture到嗰個moment其實你笑得又會自然啲,同埋嗰個動作呢望落去係一個好自然嘅動作嚟。

Elva's tips 4︰借助建築物

我哋都可以借一啲身邊嘅建築去幫我哋影相嘅,譬如我哋隔離有幅牆呀、有條柱呀,可能唔需要剩係企直直咁樣望住鏡頭,可能有陣時唔望鏡頭呢影出喛嘅樣更加自然。

 

shebrides︰如何引導另一半能夠自然投入地影婚紗相?

Elva︰我諗係要講下啲爛gag,令到佢唔好太專注於係咪一定要笑先係靚囉,呢樣嘢比較重要。即係可能我會同佢拖手嗰陣時話,唔使望鏡頭喇,我哋自己喺度咁行路拖手就得㗎喇,攝影師會喺度捕捉緊唔同嘅angle嘅。就算你唔笑又得,笑又得,搵一個最舒服嘅狀態喇,如果我覺得佢好緊張嘅,可能就叫佢郁下,即係個人郁下放鬆啲,咁手腳唔會好僵硬咁企喺度囉,可能跳兩下,又warm up做下啲運動囉,反而愈放鬆影出嚟嗰啲樣愈自然。

 

shebrides︰最近流行甚麼婚紗款式?

Elva︰其實依家揀婚紗我覺得好多女仔都會揀一啲令自己舒服嘅婚紗,例如一啲輕透薄紗嘅款式,好有仙氣好飄逸嘅裙;又或者一啲長嘅大拖尾,因為有陣時影pre-wedding嘅相,特別係長拖尾加埋樓梯影出嚟嘅效果會好震撼。

 

shebrides︰你今次影Pre-wedding有咩難忘的事情?

Elva︰之前年頭就喺Bolivia (玻利維亞) 影咗一輯婚紗相,著咗一條婚紗。其實好辛苦呀,因為嗰度早晚溫差好大喇,因為天空之鏡係日落嗰陣時或者係日出嘅時候,嗰兩個時間都好凍,大約得十零度,我就著住婚紗一路喺度震,係咁問個攝影師,影完未呀影完未呀?都幾難忘。

 

COORDINATION : Joey Chen

VIDEOGRAPHER : Johnny Yau & Tat Hui

EDITING : Gloria Woo

VENUE︰Nina Ballroom at L'hotel Nina et Convention Centre

GOWN : Aolisha Dorian Ho

MAKEUP︰Janice Lam @glowmakeupacademy

HAIR︰Eas Fu @Admix HairStyling