advertisement

柏原太賀:那條close friend的黃線
「乘客請勿超越黃線!」

任何人對此也不會陌生,這應該是在鐵路月台上,史上播放率最高的勸喻。誰都知道跨越黃線的下場,不是墜軌(或撞板吧!),就是登車。根據可靠的數據,每年登車的人絕對多於墜軌的。所以,不要以為黃線是什麼可怕的東西,正如障礙一樣,是為了被人跨越才有其存在價值的。

可是,愈來愈多「唔生性」的乘客喜歡停留在那條感情的黃線上,不進不退,而理由正是 close friend。

「我同佢已經好似家人一樣,連佢屋企人都識晒。」

「我覺得我哋咁樣嘅關係最舒服。」

「我哋咩都會分享,有時唔開心,挨住佢有個依靠。」

「唔得啦!一諗起錫佢嘅話,立即起晒雞皮。」

大概你也會從擁有所謂 close friend 的朋友口中,聽過以上的辯解。然後,終極武器是歌頌男女之間的純友誼。你不得不佩服這種自欺欺人的說法,畢竟一切聽起來是多麼的純潔,零雜質。

對的!他們之間或許連曖昧也說不上,最多只是出街時輕輕挽着手臂,與波邊總有幾吋恰當的距離。兩人在家中,最多也是並肩而坐,累極之際借那膊頭一用。要是世界只有他倆的話,大概連天使也會下凡讚頌。

可惜,他倆不只活在現實,更永遠被對方的情人憎恨。

要解釋被憎恨的原因嗎?應該不用吧!只要反問,如果妳的另一半擁有一個隨時上得佢屋企,出街零距離接觸,挨挨憑憑之餘,更聲稱比妳更了解他的 close friend。放心!佢哋唔錫嘅!妳接受到嗎?

「咁我同佢真係冇嘢嘛!」

「Ok!妳答咗自己先啦!」

「我好 fair。如果我有個 close friend,佢都可以有。我覺得冇問題囉!」

「既然咁冇問題,下次記得喺佢女朋友,或妳男朋友面前表演一下,唔好冇人嘅時候先係咁喎。睇下邊個黑面先?」

「咁我哋都單身嘛!」

「即係妳都知有另一半果時,就唔得啦!」

這絕非思想污穢,或惡意地羞辱友情。明顯地,所謂的 close friend 已經超越了friend 的那條界線。但明知對方絕不是 Mr.Right,卻不退後,只是貪心。既想追求日後的愛情,卻又不捨得一段已建立的溫柔。若明明對方根本最適合自己,卻不前行,只是懶惰。反正已經享受着彷如拍拖的滋味,跨前一步便要再建立另一套相處方式。

什麼不想失去一段友情都是廢話,除非妳往後一世不拍拖。否則,這段在黃線上的友誼是早晚會消失的。

最討厭的一種,是明知對方因為妳而用盡所有時間,得閒就見,諗唔到約邊個又見,卻已經幾年食自己,妳還一臉不在乎地說:「我又冇困住佢。佢可以去識其他女仔㗎!」真是「福夭」(此乃洋人最惡毒的咀咒)!妳不會真的以為對方浪費如此多時間於妳身上,卻原來不是刻意遷就妳之餘,更「佢話自己根本唔想拍拖囉」!

朝早八點跑住去搭鐵路的上班族,大大聲講「我都唔趕返工」,妳信呀?

他不是不想拍拖,只是不想跟妳以外的人拍拖罷了。

即使有其他人對他稍有意思,但妳卻死撐着,廣播了十次「請勿靠近車門」後,還繼續唔出唔入。請問誰會攞苦嚟辛,去跟妳死逼爛逼呢?所以,與其說他沒有對象,不如說所有對象也被妳攔下來。

本來,最理想的愛情便是由互相了解開始。由 close friend 變成情侶,根本順理成章,也可喜可賀。但那條幼細黃線卻真的不是可以踩一世的,要不退一步,要不進一格。唔出唔入,阻礙的既是自身的緣份,更是阻人搵食呀!

 

 

重溫:

男女之間,真的不可以是soulmate?

我上了成為守護者的陌生人(1-20  完)

 

facebook:

https://www.facebook.com/Kashiwabara30