advertisement

周靈山:我的心仍然有你

疫情之下,有很多以前做開的事,現在都不可以做。

以前,坐車吸了一條毛然後過敏,或者是喉嚨乾,都可以隨便咳,只要用紙巾蓋着口已經好有禮貌。但現在出街,我完全冇膽咳,奈何我的氣管好易敏感,聞到香精會咳,聞到煙味又咳,聞到頭油味更加會咳到想嘔,結果,我次次都谷住谷到臉紅紅,坐一陣車忍出一副爆血管相。

以前,流鼻水可以隨便擤鼻涕,身邊人見到,還會問候你「係咪凍呀?」然後給你遞上紙巾。現在?大家立即彈到九丈遠,所以你即使要擤,都最好邊擤邊解釋:「我只係鼻敏感咋。」而擤完,麻煩消毒雙手,可以的話請你用醫生洗手方式洗手。

講到食飯,以前多數會叫幾款大家 share,現在?不了!我吃我的,你吃你的,你若想知道我這碟飯的味道,我可以用文字形容給你聽,但在講之前戴返個口罩先。不過,最重要是我們在六點或者十點之後不要見,事關病毒識睇錶。

不過話說分兩頭,雖然疫情將我們的社交距離拉遠,但有沒有發覺,我們收到的問候 WhatsApp 都比以前多?「封你果區呀,你冇事丫嘛?」「你夠唔夠口罩用?我有啲存貨呀?」「我買咗支搓手液畀你呀!」即使我們很遠,但我們的心,比以前更貼近。

這就是人類的獨特之處:我雖然害怕,但我的心仍然有你。

 

 

個人網站︰http://slimcook.hk

Facebook︰http://www.facebook.com/lively.com.hk/

Instagram︰echow03