advertisement

柏原太賀:我上了成為守護者的陌生人

聽說面向九龍的維港景色才最聞名,反而九龍望過來便不夠正宗。原因嘛?大概但凡外國人初到香港,總會到山頂看夜景,正正就是望向九龍的方向。於是,同一個維港的兩岸,望九龍那邊的租金總比望香港那邊的貴得多吧!

賴雅汶獨自在辦公室,發呆地望向窗外的維港,胡思亂想得連自己也覺得無稽。明明已過了下班時間,工作也早已完成,但她卻在等一個電話才敢離開。

叮~叮!電話訊息響起,是郭嘉宜。

「Sorry,BB!今晚陪唔到妳收工。」

「唔係等妳食完飯就一齊搭車咩?」

「今晚真係唔得呀?」

「咩事呀?」

「阿傑原來 book 咗房,慶祝佢升職。咁我冇理由送完妳返屋企,先再去酒店 meet 佢㗎。」

「會過夜嗎?」

「SURE LA!!! 妳唔係諗住喺 lobby 等我搞完嘢呀?」

「咁我點呀?如果佢再出現,我唔知點算。」

「冇問題㗎!我都陪咗妳成個月啦!條友連人影都冇。」

「但係我真係好驚呀!」

「⋯⋯」等了一陣後。「阿傑叫我唔好再 message,話如果妳有 spring pocket,一定拎去 BBQ 喎!不過,佢話有個單身型男 frd,叫佢過嚟代我接妳一晚,好唔好?」

「會唔會太麻煩?」

「親!我陪妳咁耐,就餓咗阿傑咁耐。佢而家成隻餓鬼咁,呢少少麻煩算什麼。」

「佢個 frd 咩人嚟?」

「總之,妳 20 分鐘後落樓,佢會喺巴士站隔離等妳。」

賴雅汶繼續追問如何跟那位阿傑的朋友相認,卻發現對方已沒有回應。她本想直接打電話問郭嘉宜,卻想到自從「出事」之後,已經麻煩了對方足足一個月了。即使她倆由中學開始便是好友,但連人家男友已經開聲兼出手,也不好意思再打擾。

在寂靜的巴士站旁邊,硬着頭皮的賴雅汶發現了一個西裝筆挺的男人,正倚着一看便知價值不菲的名車。

雖然那男人也頗好看,一頭整理得宜的微曲黑髮下,擁有一張如女生的平淡小凸臉之餘,雙眼皮的深痕還讓他眼神更銳利有神,但即使在昏黃的街燈下,仍見到白膩中略透青蒼的膚色,卻顯得有點病態。

他隨手扔了抽到一半的香煙,才向她招手。而且,那手勢似是指令,就是手指併合向上後,再招向自己的那種。這讓賴雅汶對他的第一印象很差,明顯是一個囂張的男人。

「Hi!你係阿 Mike 嘅朋友?」出於禮貌,賴雅汶還是先點頭示意。

「妳就係賴小姐?」男人沒絲毫感情的聲線,更叫人討厭。「邊區?」

「大窩口。」

「上車。」

柏原太賀:我上了成為守護者的陌生人

對方冷淡得似乎不太願意,或許 Mike 半強迫這個朋友來幫忙,好讓自己跟郭嘉宜盡用每一刻春宵。車駛出了西隧後,便沿路直奔荔景,看似還有十分鐘左右車程,賴雅汶還是忍受不了那份沉默的壓力。

「今晚真係麻煩你。其實你住邊頭,順唔順路㗎?」

「應該順路,都係兜個圈啫。」

「哦!」她再問:「阿 Mike 有冇講我因咩事麻煩人哋陪返屋企呀?」

「冇。」見他答得冷漠,當她以為他完全無興趣了解時,他卻續說:「不過,我諗要求人幫手嘅人,主動解釋原因係基本禮貌。」

面對這個明明好奇,卻裝模作樣的男人,賴雅汶沉住氣,簡略地透露向前男友提出分手後,對方一直糾纏。前男友更試過多次在她家樓下等候,一時強拉着她哀求,一時出言恐嚇,害她不敢獨自回家。

「點解唔報警?」

「因為冇實際傷害,警察唔受理。」

「但佢恐嚇妳喎!冇錄音同證據?」

「嗯。」

「咁妳唔 call uber 或者的士?」

「因為落車之後,要行一段路先到。」

「咁妳打算一直煩妳個 friend 到幾時?唔通要陪到妳搵到新男朋友為止?」

賴雅汶不打算回應。雖然她也覺得不好意思,但她更以為這番說話是 Mike 拜託這個男人說給自己聽的。

到達目的地後,男人也一起下車,應該打算送賴雅汶到家門。可是,他倆走不了兩步,她卻突然停下腳步,慌張地四處張望,臉色比男人更蒼白。

「咩事?」

「我啱啱收到佢 message。」

「佢?妳前男友?」

男人從賴雅汶手上拿過電話,看到一張他們剛下車時被偷拍的照片,還附有文字短訊:

「我終於明妳為咩分手!妳原來真係畀綠帽我戴!妳摧毀我對妳嘅信任同愛,我就要妳知我有幾痛!」

(待續)

 

 

重溫:

寧愛夏迎春,莫負鍾無艷

放閃病態

消失的情書

男神與渣男的一念之差

前度:感情Resume

辦公室偷食特別多

來自山下智久的輕熟誘惑

最完美的配對(二)

最完美的配對(一)

最輕易的壓抑(一集完)

最犯禁的限聚(一集完)

偷愛的上集故事(一集完)

最自卑的禁語(一集完)

最孤獨的曖昧(一集完)

最卑劣的分手(一集完)

最溫暖的出軌(一集完)

人來人往,不如閉起雙眼(一集完)

地球爆炸前讓我再次爆房(全三集)

兩個天堂(全十九集)

愛上不存在的妳(全十六集)

靈玲(全八集)

野.火(全十集)

前度暫存迷你倉(全兩集)

如果Double May有特異功能(全十五集)

 

facebook:

https://www.facebook.com/Kashiwabara30