advertisement

柏原太賀:最卑劣的分手(一集完)

男人緊握着女人的手,含情脈脈地望着她。

「我唔捨得妳。」
「你唔捨得,但係我都要走。」
「真係唔可以咩?」
「我點可以接受要同人分享自己男朋友呀!」
「妳唔再愛我?」
「就係因為我仲愛你,所以先……」

女人激動的說話還沒完,男人便一手把她擁到懷內,熟悉的溫暖令她放棄掙扎,任由淚水為自己的不爭氣致哀。

「我哋一齊咁耐。我對妳嘅感情有幾深,妳會唔知咩?」
「既然係咁,點解?點解仲要同第二個一齊?」
「總之,我唔可以冇咗妳。妳係我嘅;永遠都係我嘅。」

熱吻的質感,輕易迷惑本來已經茫然的女人。她覺得這份熱情是真的,他對她的渴求也假不來。於是,她再次任由男人從身體開始,慢慢佔據內心。

原本打算被趕走的男人,再次捲土重來。失而復得的珍貴,反而比往日更熾熱,更激動。那一刻,她深信對方是真的愛自己,長久以來的感情怎可能不敵一時的意亂情迷呢?

只要捱過這一關,你也永遠屬於我的。

人不可能擁有永遠的時間,但時間永遠可以幫人分辨真偽。

一年;整整一年,女人以最大的容忍能力去等。一次又一次失望,換來一場再一場爭吵。最初,她原是堅持的。慢慢,她也接受了一個事實──那個男人其實已經移情別戀。

男人身邊的朋友都知道他有兩個女友,新歡以勝利者姿態出現在他的朋友圈,舊愛卻成為大家茶餘飯後突然想起很久不見的「阿嫂」。

「你仲未斷咩?」
「佢都唔介意,同埋我覺得而家幾好。佢哋都知我有另一個㗎。」
「你本事囉!」
「飲啦!」
「嗱!我怕睇錯……真係兄弟先講。過緊嚟嘅時候,我好似見阿嫂拖住條仔喺 XX 酒店大堂。」
「係咩?」
「衰仔!你知㗎?咁又係喎!佢哋都知你有兩個啦!我多嘴!」

男人微微一笑,看似毫不在乎。可是,暗中已傳了 message 給女人。

「妳喺邊呀?」
「咩事?」
「我知妳同另一個男人一齊。」
「你既然知,仲有咩講?」
「妳點可以咁對我?」
「咁你呢?又點對我呀?」
「妳知我愛妳㗎!妳唔可以離開我!」
「Sorry!我哋分咗手好耐啦!」
「幾時嘅事呀?」
「由你第一次同我講有另一個女人開始,你其實已經逼緊我同你分手!只係你去到最後都唔想做衰人,連分手兩隻字都唔講啫!」
「我冇話過要分手呀!係妳自己講㗎!」
「係!係我講嘅!以後我哋都唔好再見喇!」

當男人想再傳 message 時,發現女人已經 block 了他所有 contact 方式。同一時間,兄弟正好舉杯叫飲,男人默默地放下電話,一飲而盡。

說出「分手」兩字,有時是一段感情最後的禮儀。而最卑劣的分手,就是連講的勇氣也沒有,傷害到對方不得不說「分手」兩字。

 

~~完~~

 

 

重溫:

最溫暖的出軌(一集完)

人來人往,不如閉起雙眼(一集完)

地球爆炸前讓我再次爆房(全三集)

兩個天堂(全十九集)

愛上不存在的妳(全十六集)

靈玲(全八集)

野.火(全十集)

前度暫存迷你倉(全兩集)

如果Double May有特異功能(全十五集)

 

facebook:

https://www.facebook.com/Kashiwabara30