advertisement

又到聖誕!又到聖誕!唔少情侶可能正在為送咩禮物,或者點樣慶祝,諗到頭都爆。

 

如果你哋兩個啱啱拍拖,或者仲係好青春的話,呢篇文嘅內容可以完全 skip。因為當新鮮度充足嘅時候,對方放個屁都得意過人,拖下手已經好浪漫。如果佢唔覺,仲要嫌三嫌四,妳就要諗諗呢個人有幾愛妳啦!

 

回歸正題,情侶之路係相當漫長,我諗亦冇人會第一日就(夠膽)同妳講:「喂!我同妳玩陣就閃,why so serious?」於是,新鮮感係必然遞減,「過節」成為要刻意安排嘅例行公事。因為係公事,所以千萬唔好強求「做好」。其實,大家心知肚明,「做對」就已經 acceptable啦!

 

「好」係主觀嘅感受,但「對」係可以客觀分析。

 

--- 送禮物 ---

柏原太賀:非新鮮情侶的節日守則

男人永遠係大男孩,而唔少男人都會有一種女人完全唔明嘅儲物興趣,包括但不限於模型、玩具、收藏卡、波鞋、錶、相機、音響……等等。當妳以為 so easy,以為「買最新出嘅咩咩咩就得啦」之際,往往發現男人拆禮物一刻只係強顏歡笑。

 

「隻隻高達都一樣樣㗎啦!」

「咪又係Jordan,有分別咩!」

「呢個款最新,最貴㗎啦!仲想點!」

 

女人唔明白有儲物興趣嘅男人,其實都係病態一樣嘅 spec-控。佢哋對一件物品嘅specification 有強烈執着。即係啲嘢講到幾靚、幾好、幾勁,但一盒盒咁買晒返嚟之後,唔玩、唔拆、唔用,連膠紙都唔撕,原因係「我只係想擁有呢個生產工序嘅產品」。

 

所以,唔好講話對波鞋個剔唔同顏色,或者高達隻角唔夠尖咁「嚴重」問題,有時係講緊就算同款同樣,但複刻版嘅盒面上個product code唔同,代表內裡物料轉變,生產模具嘅損耗程度,或單單因出廠年份而影響收藏價值。

 

所以,如果妳嘅另一半係一個 spec-控,千萬唔好自作主張,直接問佢想要邊款都唔夠,最好係一齊去買。因為對呢類男人嚟講,擁有嘅一剎那先係最興奮。

 

另一種男人係咩興趣都冇,平時唔買嘢嘅。呢個時候,另一半都會覺得好煩咁諗「都唔知佢想要咩」!其實,妳係抽到支上上籤。

 

呢類男人有需要嘅嘢,早就已經買咗。而冇需要嘅,根本就唔想要。所以,無論妳買咩俾佢,都係多餘同浪費金錢。既然買嘢俾對方咁難,不如買嘢俾自己就過。

 

冇錯!係買嘢俾自己當禮物。

 

簡單嚟講,如果妳平時嫌佢啲衣着太單調,就幫佢買件靚衫,叫佢同妳一齊出嚟果時着。如果係一齊住,索性買件妳一直想買,而所謂「共用」嘅小家電,例如多士爐、咖啡機,甚至名牌鑊一個,然後話佢知係專登煮嘢俾佢食。佢最多囉嗦兩句,之後都會笑出嚟。

 

妳以為滿足自己好自私?其實佢反而覺得唔錯。既然明知妳遲早會忍唔住嘥呢啲錢,就唔好再嘥其他錢,買更無謂又用唔着嘅聖誕禮物啦!

 

--- 點慶祝 ---

柏原太賀:非新鮮情侶的節日守則

大時大節,如果出街同人迫食飯,其實唔係咁過癮。當日追妳果時,只係想搵個藉口見多妳一面,先會又 book 枱,又訂海景房。但既然已經馬到功成咗咁耐,呢種行為只會淪為「貼錢買難受」。所以,反過來而言,妳亦唔需要花呢啲無謂錢,免得佢強顏歡笑之餘,心裡有叫女人錢真易呃。

 

至於睇燈飾呢種上世紀活動就更加冇必要,何況今年香港都冇咩燈飾好睇。

 

咁講法咪成日淨係喺屋企?

 

其實,男人真係唔介意。妳諗下,一星期最少五日行出門口果刻,就係為咗返工同賺錢,有幾何真係會懶洋洋咁喺屋企休息下呢?難得可以放兩日假,妳仲要佢出街同人迫,其實好唔人道囉!

 

當然,有啲人係好鍾意開party嘅,咁又不妨開個 house party。不過,請朋友嚟有學問。

 

記得一定係要請妳哋嘅共同朋友,唔好成班姐妹嚟晒,又同佢冇嘢好傾,結果悶到佢自己入房。如果淨係佢嘅朋友嚟,妳就淪為只係負責飲食嘅 helper。佢有啲人性嘅,會唔好意思;玩到忘形,妳又自憐黑面的話,佢會feel到嘅。不過,就唔好 feel 到想早啲散場。

 

畢竟一齊咗唔短嘅時間,如果妳嘅朋友已經變成佢嘅朋友;佢嘅朋友嘅老婆/女朋友又變成妳嘅朋友,咁就最好啦!

 

「我想俾啲驚喜佢,不如……」STOP!妳紅都面晒,古古惑惑嘅笑容已經出賣咗妳喇!

 

嗱!真係勸妳唔好亂諗嘢喇!要知道一個男人最難係扮驚喜。因為通常呢種咁突然嘅轉變,都係驚多過喜。所以明明好驚,仲要詐喜,又扯起,就唔係單單演技可以克服嘅問題嚟。啱啱已經講過,佢其實只係想放假好好休息!

 

如果佢有齣戲一直想睇而未睇,例如挑戰耐性極限嘅《愛爾蘭人》,妳不妨敷住面膜陪下佢。

如果佢早有心頭好想買而未買,例如妳分唔出第幾代嘅「鋼鐵人」,妳不妨陪佢去落訂俾錢。

--- 總結 ---

 

男人,其實可以好簡單。千萬唔好因為節日而複雜化自己嘅思路,更加唔好做完啲(男人認為嘅)無謂嘢之後,佢唔識欣賞而黑面。

 

妳可能會責怪無趣味嘅男人,令節日咩氣氛都冇晒。明明以前都唔係咁,點解一年比一年淡?咩驚喜都無晒!大時大節都係咁,唔通呢世就係咁過?

 

冇錯。

 

其實,對認真而負責任嘅男人嚟講,返到屋企見到一個明明冇血緣關係,但竟然每日唔見過都唔安樂嘅女人,就已經係人生最大嘅驚喜。

 

 

重溫:

兩個天堂(全十九集)

愛上不存在的妳(全十六集)

靈玲(全八集)

野.火(全十集)

前度暫存迷你倉(全兩集)

如果Double May有特異功能(全十五集)

 

facebook:

https://www.facebook.com/Kashiwabara30