靈玲(六)

柏原太賀愛情連載靈玲六

在游凱玲的指示下,我進入了一間專買女性潮流服飾的店舖。雖然有不少客人向我投以奇妙的目光,但還好店員卻見怪不怪。

 

「先生,係唔係揀衫比女朋友呢?」店員問。

「係呀!」我以手掩著免提,續說:「佢話想要連身裙,幾件top,同埋啲短褲喎。」

「好呀!隨便。有需要就叫我啦!」

 

雖然衣服穿在她身上,但錢是我出的,所以我跟游凱玲也各自發表意見。我為她選擇的幾乎都是鬆身的文青系衣服,她卻偏嚷著要些貼身的。結果在簽單時,店員以懷疑的目光望著我。這實在難怪人,即使是送禮物,也不至於送半個衣櫃吧!

 

「買咁多,你女朋友都唔自己嚟?」

「其實呢……佢最近因為有個怪病,所以半身不遂,連大小便都要我幫佢處理。不過,佢生前……唔係!佢出事前好鍾意買靚衫,咁我唯有幫佢啦!」說完後,我補上一個落寞的神情,讓店員的同情心大增。

「真係令人感動。不如我比返個staff discount你啦!」

「麻煩晒。多謝。」

 

游凱玲以一張埋怨的臉向我投訴:「估唔到你竟然咒一個死人。」

我得意地說:「反正妳而家真係郁唔到嘛。而且,我唔咒下妳,我覺得好對唔住自己呀!」

 

我並不是無的放矢。我想當大家知道我拿著一堆靚新衫,離開店舖的舉動後,或許被咒罵的便會變成我了。因為我按照傳統,在晚上的暗巷內,把整袋衣服都燒了;真的正正式式「燒街衣」。

 

游凱玲倒是興奮得很,她抱著那些新衫,不斷催促我回家。

 

「太好啦!終於有新衫啦!」她邊在浴室換衣服,邊說。

「換完快啲出嚟啦!我急尿呀!」我想不到她換衣服的時間會如此長。

 

「不如你燒多塊鏡比我啦!我都睇唔到啱唔啱身。」

「妳出返嚟,我話妳知咪得囉。不過,就算唔啱都唔再買啦!妳已經好過大部份著紙衫嘅鬼魂啦!」

「佢哋著紙㗎?係喎!啲衣紙真係紙嚟。」

「係呀!出嚟先再講啦!」

 

可是,我等了良久,除了不見她走出浴室外,也沒有聽到她的回應。

 

「喂!妳無事嗎?」我再追問,卻沒有回覆。「妳無嘢吖嘛?再唔出嚟,我就開返門㗎啦!」

「等等……開得啦!」

 

眼前出現的是一身文青系的游凱玲,墨綠色的寬身上衣露出單肩及鎖骨,淺卡其色的直身百摺裙更顯出她修長的身型,說她樸素卻又多了一分豔麗,說保守又帶半分性感。見她含羞答答的樣子,令我不禁一時出神,回憶起日前在巴士的另類接觸。

 

「好睇嗎?」游凱玲的問題,讓我返回現場。

「好。我都話呢個風格啱晒妳㗎啦!我仲以為妳會先著自己揀嘅衫添。」

「我都係換返套舊嘅先啦!」

「唔駛啦!而家咪幾好睇。」

「都唔齊……一套。」

 

見她吞吞吐吐地說話,我才發現她赤著腳,恍然大悟,應該是欠一雙黑色皮鞋吧!此時,愛玩小白撲向游凱玲,還不斷抓她的裙擺,害她一邊死命地扯著,一邊大叫大嚷。終於,她重重地駡了小白後,牠才垂頭喪氣地走開。

 

「佢都係想同妳玩下啫,唔駛咁惡掛。」我說。

「太危險啦!都話咗唔齊咯!」

「算啦!算啦!爭對鞋啫,咁妳試埋自己揀果啲啦!」

「唔試。」

 

「做咩呀?」

「總之唔試啦!」

「小姐,要錢買㗎。揀咗又唔著。」

「可以幫我買埋其他嘢嗎?」

「仲買?我邊有咁多錢呀!」

「咁我著返舊衫啦!」

 

對於女性的無理取鬧,我早已經有覺悟。但她如今算是食我的,住我的,總不能讓她任意妄為吧

 

「我唔閂門,企正喺度,睇妳點換!」

「衰人!恰我!」

「我咁都話恰妳?妳一句就陪妳去買女裝,衫又有一半係妳自己揀嘅,係妳唔知發咩脾氣死都唔肯著咋喎。」

「你係唔係一定要知點解吖!」

「係。」

 

說時遲,那時快。游凱玲拉低原本已經露膊的寬身上衣,露出大半邊圓渾豐滿的乳房半秒。

 

「滿意未?」她整理著衣服說。

我不認為現代女性懂得什麼叫投桃報李,而且還要如此大禮。

「妳想點呀?」

「未買齊呀!Bra同under呀!」

「哦!」我想起剛才小白在抓她的裙,難怪會如此慌張。「講明先,我唔會為咗妳去買bra㗎!幫妳買衫已經係極限。妳著返臨死前果套咪得囉。」

「我一直都著住運動衛衣嚟瞓,根本就無……」

即使鬼魂不會感覺到人類的體溫上升,但她必定發現我整張臉在發燙。

「咁……不如我幫妳上網買喇。」

 

「唔該。」

 

我按她的指示到了一個網購的網站。而我卻扮演一個人肉滑鼠的角色,盡可能不作思考,食指隨著「下一頁」、「再下一頁」、「右邊第三行」、「白色」的指示而按下。雖然我懷疑她可能因為我的存在,才只選擇一些老土的款式。但在點選最後一項時,我發現了原因,還害我不禁用力吞口水。

 

80F。

 

「麻煩晒。」

「唔駛客氣。」

 

我們對望了一陣,誰也不知如何開口去驅散空氣中的尷尬。直到她突然噗嚇一笑,連我也忍不住笑出來。

 

「你扮咩純情吖!」她開朗地說。

「我真係未幫過女人買bra嘛!」我答。

「你上次search有無關於我嘅死訊嗰時,我明明就見到你之前嘅搜尋紀錄——『游凱玲J圖』。」

「我想了解下自己寫作嘅拍檔咋。」

「係咩?」游凱玲慢慢地向著我俯身,一陣有形無實的壓迫感,還有深不見底的乳溝風光竟令我仰後。「反正你都掂唔到,想唔想再行埋啲,等你睇清楚啲呀?」

 

(待續)

靈玲(五)

靈玲(四)

靈玲(三)

靈玲(二)

靈玲(一)

 

其他

野.火(全十集)

前度暫存迷你倉(全兩集)

如果Double May有特異功能(全十五集)

 

facebook:

https://www.facebook.com/Kashiwabara30

photo source:

advertisement