隨著警方內部高層及社會的壓力，「破案」才是符合期望的行為，至於「真相」卻沒有太多人在意。
白Sir深切地體會到這一點，同時在疑犯自首及算無遺留的供詞下，阿杰被正式起訴了。案件得以快速結案，除了因為上述原因外，阿杰也非常「配合」地選擇自辯。即使法官再三提醒他可能因此而失去較公平的審訊，他仍堅持只認罪。
少部份報章提出質疑，大部份卻聚焦於重溫血淋淋的情節。在一片虛偽的同理心中大呼活該，沒有人願意放過他們心目中殘忍的兇徒。人人都沉醉在事不關己的勝利之中，「兇徒」被嚴懲；案件被了結；真相被埋沒，只有白Sir感到陣陣挫敗感。
在阿杰被定罪一星期後，白Sir本想藉整理資料為名跟阿杰會面。可是，他發現自己竟在阿杰的探訪名單內。兩人再次會面時，阿杰只是臉色有點不濟，卻仍沒有一絲後悔。
「喺呢度習慣嗎？」白Sir問。
「好難習慣。不過，多謝你嚟探我。」阿杰答。
「如果畀人恰，可以同我講聲。裡面都有一啲大佬會畀面我。」
「放心。個個都知我因咩事入嚟，佢哋驚都驚唔切。」
「如果畀佢哋知道你入嚟嘅真正原因，我怕佢哋只會笑你。」
聽到白Sir的嘲諷，阿杰只不置可否地報上一笑，好讓他繼續說下去。
「你寫咗我個名喺探訪名單，應該唔係想同我吹水掛。」
「我覺得你應該想知道某啲事。」
「你終於打算講晒出嚟？打算上訴？」
「唔係。我只係見你一直咁落力，想對你公道啲啫。」
「多謝晒。你打算由邊度講起？」
「我唔會講太多，怕你會收埋支錄音筆之類。你問咩，我只會點頭或擰頭。無關痛癢嘅，或者會考慮答個簡單答案。」
阿杰對白Sir的指引清晰不過，態度甚至帶點囂張。可是，作為半生求真相嘅人，白Sir不可能放過這機會，馬上作出攻勢。
「由結論講起，人唔係你殺嘅，啱嗎？」
阿杰輕輕地點頭。
「你唔會平白咁坐冤獄，能夠令你作出咁大犧牲嘅人，只有一個：一個你深愛嘅女人，趙詩穎。」
阿杰猶豫了一陣，慢慢而含笑地點頭。
為朋友兩脇插刀，難得，但阿杰跟Vivian的交情仍未到。
為利益頂包作假，常見，但阿杰沒有任何實際利益可言。
為衝動行兇殺人，不少，但阿杰卻不至於會失常地虐殺。
因此，從阿杰自首一刻，白Sir已經知道真正的兇手是誰。正確無誤的推測，終讓他心裡吐出一口污氣。
「我只係唔明白，死者同兇手之間分明有過性關係。一對不忠嘅男女原本會落得一個被殺，一個收監的下場，點解你仲要幫佢？」
白Sir刻意地沒以兇手代替詩穎的名字，希望為阿杰保留一點自尊，畢竟深愛的女人跟別的男人上床，任何人也難以承受那份痛。
「佢唔想㗎。」
「你意思係佢係被迫？」
「係……」
「邊個？」
「我。」
「吓？」白Sir幾乎錯愕得不知如何反應。兩人沉默了好一陣子後，白Sir冷靜地續問：「我覺得呢個問題，唔係三言兩語可以得明。介意透露更多嗎？」
「係我令佢太失望。」
「所以選擇咗出軌？」
「係麻醉。」
「我從其他人口中知道佢對你咁多年嚟都好有要求，甚至幫埋你決定你嘅事業。不過，如果你意思係你做唔到佢嘅要求，而另外搵其他男人，咁係叫不忠。最多都係良禽擇木而棲，應該唔可以用麻醉嚟做藉口。」
「唔係。佢失望嘅係我哋咁多年嚟都建立唔到信任。」
「所以，當佢以為你同Vivian有內情嘅時候，就選擇報復？」
「佢知我哋無。」
「咁點解……」
「佢一方面有好強控制慾，另一方面又非常好勝，唔認錯。執著得近乎……」
「係病態。」白Sir代阿杰斷言。杰點頭，白Sir續問：「所以喺佢極度失落得要搵其他人安慰嘅時候，正好遇上新相識嘅Jim。因為好新，所以兩個人愈走愈近，不知不覺間發展出另類關係。我會懷疑佢係唔係因為自責，令佢嘅極端性最終變成情緒病。」
「無錯。而嗰時佢已經病咗，根本連離開嘅能力都無。」
當一個人產生極度自責的時候，沒有太多人會選擇正面面對，而是選擇以只能自欺欺人的藉口去逃避心目中的難受。同時，既然藉口已成，便沒有理由去放棄已「合理化」的關係，反而會更沉溺來麻醉自己。這就是大部份出軌的女人會說自己無法離開對方的原因。
何況趙詩穎還是一個病人，她應該痛苦地徘徊在自責與自欺的地獄。
「佢用咗最後嘅方式去離開，就係摧毀，啱嗎？」白Sir再問。
「你而家應該知道晒咧。」阿杰不置可否的答案，比點頭更有力。
「仲未！」白Sir趕緊地說：「當日你無可能喺現場，因為你根本唔係一個識得處理證據嘅人。到底係邊個幫佢？」
「對唔住。我唔明你講咩。」
「你瞞我唔到。如果你係一早發現佢哋嘅關係，以你嘅性格根本就按捺唔住，一定會衝上前打Jim，而唔會咁冷靜分析。所以，你係到出咗事後先知道佢哋嘅關係，而且頭先番說話仲係由其他人講你聽。」
「你憑咩咁肯定？」
「就憑你曾經上過Jim公司爭執，同埋喺醫院因為Colin挑釁幾句就出手傷人……等等……醫院嗰次…唔通…」
「睇嚟我講得太多。時間夠咧。」
「等等……」
未等白Sir講完，杰已經站起身，並請懲教人員帶回倉。而白Sir明知從阿杰口中得不到答案，也在離開監獄後，馬上致電下屬許Sir：「幫我查一下當日朱明杰喺醫院打人之後，邊個保釋佢出嚟。」
「係一個叫趙志坤嘅男人。」許Sir答。
「姓趙嘅？想幫再查佢同趙詩穎係咩關係，同埋咩叫業。」
「父女，退咗休十年。之前係……」
白Sir聽到答案後，不禁喊出一句：「果然係佢！」
那個在醫院衝突的晚上，阿杰感激趙世伯的認可。同時，也被告知了一個殘忍的事實。在無法宣洩時正好遇上冷嘲熱諷的Colin，才氣上心頭怒打了他。而阿杰，從那晚開始就踏上了一條為愛而自我犧牲的不歸路。
******
另一個平靜的晚上，白Sir到了殯儀館，為的是要見一個人。
「趙Sir，節哀順變。」白Sir走向家屬席，向目標男人問侯。
「有心。請問你係邊個環頭嘅伙計？我哋見過嗎？」已退休的趙Sir眼神散渙，卻仍不忘禮節。
「未，我姓白。不過，我同令媛都算有過一啲交雜。」
「係嗎？」
「估唔到令媛始終都過唔到呢一關。」
「我一生勸過自殺嘅人無數，點知偏偏就係自己個女……或者係天意。」趙Sir在退休前曾有一段時間參與談判工作。
「但係你最後都勸服咗一個年輕人，保住令媛嘅名節。」
「白Sir，你應該知紅白二事期間，就算係查黑底嘅，都盡可能留返幾分薄面畀對家。」
「放心。我唔係嚟做嘢嘅。今次真係私人性質嚟，希望你喺令媛靈前諗諗，如果佢在天有靈，係唔係希望見到因為自己一時嘅過錯，令一真心愛佢嘅人一直受苦落去。」
「我知點做。如果無咩其他嘢，唔送咧。」
「嗯。趙Sir，呢個可能係佢最後贖罪嘅機會。」
白Sir步出靈堂一刻，收到許Sir的短訊，原來兩個小時前，阿杰已經在獄中上吊身亡。
突然，一陣怪風捲起地上數張衣紙，亂中有序地追逐，像在跳舞，又像嬉戲，彷彿嘲笑人世間的愛慾痴纏。
-完-
註：故事內所有出場人物及機構皆為杜撰，與現實人物及機構完全無關。
