把你當狗養的男人不難找,還留戀甚麼? – 覆心痛者

貽興︰

 
你好。我已經27 歲,男友30。因為我屋企本身出現問題,已經沒有可以留我的地方,所以一直喺男友家同男友家人同住,男友家人對我很好,甚至伯母已經早已當我視為己出。喺呢個家,比我自己家,更溫暖、更舒服,但我仍然會把錢拿回自己家,因為,就算自己走了,我依然是家庭的經濟支柱。
 
同男友一齊3 年了,兩人之間其實冇咩大問題,但我哋永遠成日因為其他人而鬧交。

一年前曾經有一次,我同佢家人喺一件事意見上有分歧,當時我完全冇做任何野亦冇講過自己意見,只係夜晚大家喺房,當傾計咁就講左句「覺得佢地咁做好似唔係幾好」,佢就發左好大脾氣,係咁鬧我,同我講佢家人唔會錯,佢唔覺得有問題。我見佢咁,我就問佢做咩要嬲,我都係講下,之後佢嬲到趕左我走,我一個人喺佢樓下公園坐,冇地方住、冇地方去,半夜三更又唔想打攪朋友,直到自己喊完,冇辦法,打俾佢問我聽日先走得唔得,佢就俾我上返去。

之後第二日,佢好似冇咩野咁,但其實佢趕我走嗰下,我真係好hurt。身邊朋友話佢唔係男人,半夜三更趕一個明知冇屋企嘅女仔走,而我因為呢件事對佢已經心淡,打算長痛不如短痛,決意分手,返咗自己家邊(做)廳長邊搵便宜的套房。因為要養家,我大半份人工已經俾左家用,要自己租屋真係好困難。

可能嗰一次佢感覺到我認真想走,唔係發脾氣嗰D,佢冇啦啦嚟我公司搵我,接我收工,氹我、做左好多、講左好多,結果我心軟,返返佢身邊。
 
事後,我明白佢想保護屋企人嘅心態,或者我真係多口咗。
 
男友一直同朋友開咗間鋪頭仔,做一D小生意。一直我平時有時間都會去鋪頭坐下,幫下手咁,男友亦一直好歡迎我咁做,甚至我在放假時,直接去叫我同佢開工。
 
大約3 個月前有一日,咁啱其實我出開去附近,見佢就收工就去鋪頭等佢一齊返屋企。喺等嘅同時我冇咩野做,就開左電視黎睇,睇睇下,因為男友要用電腦,就停左,跟住佢partner(簡稱X)的女朋友(簡稱A,約3X 歲)同朋友喺附近食完飯過咗嚟,佢再開咗另一部電視睇,但因為佢個位置比較迫,所以我都冇出去同佢一齊睇,到男友用完電腦,就轉返另一個channel 比我繼續睇。

大約5 分鐘左右,A 突然好大聲咁講︰「妖,而家點睇呀?兩把聲咁出,睇到頭都暈。」我一聽到呢句,就知佢好明顯話緊我。之後我好嬲好嬲,但冇出聲。之後我男友走過嚟,叫我熄左佢喇,唔好睇喇。我因為好嬲就答左佢一句︰「點解呀?」之後男友叫我一係唔好睇,一係走出去同A 一齊睇。我好嬲好嬲但冇出聲,我知我一講野D 眼淚就會走出嚟。
 
到走,X 同A 一走開,男友就開始鬧我,話我黑口黑面。講真,我當時真係唔知自己咩樣,有幾黑,我只知我一直強忍眼淚。之後佢鬧鬧下,我開始忍唔住,就一路喊一路同佢講,問佢聽唔聽到A 講咩野?我唔明我有咩得罪人,點解要俾人咁挑釁?點知男友同我講,佢唔覺得人地咁講有問題,一個正常人聽到係唔會嬲,我會嬲係因為我唔正常。

我好hurt,個心真係好痛,之後我問佢如果同我(講)句說話喺我口講出嚟,問佢有咩感覺,佢話我擺明係搞事,所以唔同。

點解喺佢心目中永遠有問題嘅都係我?點解我男朋友唔會撐我?點解自己女朋友俾人咁話,佢一D 反應都冇仲要鬧我?

自此之後,我就俾佢落咗禁令,唔可以再出現喺佢鋪頭。試過出開街想去等佢,佢叫我一係自己返家先,就算等佢都唔好喺鋪頭附近行,佢話怕俾佢識嘅人見到,會問佢點解唔叫我入去坐。
 
講真,其實去唔去鋪頭,我好閒,但個禁令令到我個心好唔舒服。我以為時間過去,我可以放低呢件事,因為我同佢不嬲鬧完交好怏(快)就會唔記得,但「禁令」呢件事令我好放唔低,我每一次一諗起,個心就好痛,眼淚亦不由自主咁流出。
 
呢件事只要唔提,佢都對我冇咩野,我知佢個心愛我。但我真係唔知佢當我係咩。佢脾氣好大,每一次我講野佢一唔啱聽,佢就會講粗口鬧我,話我好巴閉,全世界每一個人都係錯,得我永遠唔會有錯。

其實我從來冇評論啱定錯,只係每一件事同佢思想有出入,我想解釋,佢就會咁講,唔俾我講落去。
 
我有諗過,佢到底係咪已經唔愛我?如果唔係,佢又當我係咩野?

點解佢可以咁對我?出到用「禁令」,我真係咁討佢厭?離開係咪唯一嘅路?
 
我知我打左好多野,好長。唔好意思,麻煩你了。
 
心痛者

心痛者:


情人不是貓狗,不是一種可以輕易下禁令下指令畀手擺尾聽聽話話的寵物,如果你有一個把你當狗當貓都不當人的男友,你可以做的,不是咬你的主人一口,而是離開這個把你當狗的男友,做回一個有尊嚴的人。

心痛者,如果你聽到跟你相同的故事,你該也會牙癢癢地認為那女的好白痴好易欺負吧?怎麼給男友不當人看待,仍然忍氣吞聲?為什麼不勇敢出走,找一個真正疼惜自己的男人?

不要以為你如今擁有什麼真的不可失去。要找一個把你當狗去使喚畜養的男人不難,任何男人都樂意為之,找一個把你當人的才比較困難。既然如此,還有什麼值得留戀?

話雖如此,世上還是有很多人樂意當另一半的寵物,只因為自己不必用腦,事事聽從對方便是,聽指令生活比起自己尋找方向容易,所以,很多人都願意被豢養,只因為怕承擔責任,怕做錯決定,而任由別人替他一直下錯決定。

如果一個男人愛他的面子多於你的尊嚴,重視自己的自由多於你的自由,這男人不可能是個好男友,他不可能愛你多少,因為他最愛的是自己,其次,是你以外的任何女人。

清醒吧,別做人家的貓狗了。

要做,也做一隻被疼惜的貓狗,找個條件好一點的主人,如果,你真是天生賤命的話。

祝  做隻貓做隻狗不做傻人

貽興