正式男女朋友方案 – 覆局中人


自從你嘅『晚深夜與早晨的周記』,我就愛上咗睇你嘅書,見到你原來呢到有專欄,我就好想問你一D愛情問題。

我同佢嘅故事要追到5 年前。5 年前我地係夜校同學,當時佢追我但係因為我對佢完全無感覺所以拒絕咗佢,但係直至到有一晚我地一班出去飲酒,我同佢都飲醉咗,就係咁我地就發生咗第一次關係。

第二日,佢意(以)為我會同佢一齊,但係我無,我好肯定咁同佢講我地無可能。但係呢4年間我地嘅關係慢慢變成咗性伴侶,我明確咁知道佢已經對我無感覺,大家只不過係各取所需,我亦都好鍾意呢種關係。

我地4 年之間咩都會講,有時我有男朋友嘅時候都會搵佢,佢亦都知我有男朋友,有時我地仲會講下我同男朋友嘅性生活,佢亦都一D都無介意。有時我地會一個月見一次,有時我地會一年先見一次,但係佢每次搵我嘅時候身邊都無女朋友(可能係我唔知),就只係我有男朋友,就係咁我地就維持咗4 年。

直到今年年頭,我忽然之間感覺到自己好似鍾意咗佢,我地漸漸地見得多咗,又密咗,差不多一個星期見2 至3 次。我同佢嘅關係亦慢慢比我同我男朋友好。(我同呢個男朋友一齊左兩年幾,其實那時我男朋友已經有一年無同我有身體接觸,連deep kiss 都唔會。)我亦都感覺到佢都一樣。

一開始我地大家都想控制住自己嘅感情,唔想破壞我地嘅關係,但係到最後我都係忍唔住同我男朋友分手,心底裡希望佢會有下一步行動。但係事實令我好失望,佢唔單止無進一步,仲好似想退一步。於是我就心諗算啦,可能佢只不過係當我係性伴侶,從來都無變過。

但係過多一兩個月,佢又喺我地嘅關係上再行前多少少,喺我以為有機會嘅時候有一次我去佢屋企,就俾我發現佢床上面有第二個女仔嘅頭髮,垃圾筒都有用過嘅安全套,嗰陣我個心真係好痛,我同自己講算啦,我地唔會有可能,佢只不過當我係其中嘅一個性伴侶,我唔想再見佢,嗰晚我無問佢任何嘢,我只係想快D 過咗今晚我以後都唔再搵佢。

但係過咗一個星期,佢打俾我話好想我過去,我好無專(尊)嚴地都係過咗去,之後再過多一個月我地又好似平時咁,得閒就見見面,食個飯,好似從來都無嗰個女仔出現過咁。

同一時間,我男朋友向我要求復合,我一時心軟竟然答應咗,之後好自然佢亦都知道我同返我男朋友一齊返。可能男人都係犯賤,佢一知道我唔再單身嘅時候,佢又對我地嘅關係著緊起嚟,仲要要求日日見。(基本上我同男友一星期只見一次,仲要係食個飯而已,所以佢唔知我有第二個。)

過咗無幾耐,我男朋友鍾意咗第二個,我地正式分咗手,佢亦都知道我又回復單身,但係今次佢無退後,我地keep 住好似情侶嘅關係,佢嘅朋友同屋企人都以為我地一齊緊,但係佢無介紹亦都無解釋。

我地會成日見面,有時會有性,有時會只抱著就瞓一個夜晚,我地一齊分享生活中美好嘅事,就係咁我地又維持咗段時間。

直至呢排,我開始為我地嘅關係著急,我希望佢確定我嘅身份,我怕有一日再見第二個女仔嘅頭髮我都無資格出聲。嗰日我同咗一個好要好嘅男性朋友出去睇戲,晚上返屋企嘅時候佢就打俾我話不如一齊上大陸按摩,我答應咗佢,中途我地有講有笑,我就借機講話今日我同咗個男仔出去睇戲,嗰一刻我感覺到佢唔開心,但係佢無出聲。

去到按摩嘅地方,佢搵咗個幾靚嘅採耳妹,期間佢地有講有笑,仲要問埋人地幾時放假,拎埋人地個電話,好似當我透明咁,我知佢係有心要我嬲,但係我就係沉唔住氣,我等個採耳妹走咗之後我就話我唔舒服,要返香港,跟住佢話咁一齊走啦,之後我地拉拉扯扯最後都係上咗房按,等D人走晒之後佢問我做咩唔開心,我就同佢講頭先採耳妹嗰件事,跟住佢就同我道歉,仲答應我唔會再搵佢。

跟住我話:「其實你唔使同我道歉,我又唔係你邊個,你追邊個關我咩事?」

佢靜咗一陣就話:「係囉。」

嗰陣我好傷心,我問佢:「你當我係咩?」

佢話:「我唔知。」

我喊住咁話:「咁我希望你以後唔好再搵我,我覺得好辛苦,我地算啦。」

佢嗰一刻抱得我好緊,佢話:「你唔好咁啦。」

最後我地都係無結論。

呢幾日都係我主動搵佢,佢無避我,有時佢自己有活動會借機同我講下,我地好似無發生過個晚嘅事咁,但唔同嘅係我覺得佢宜家更在意我嘅感受,矛盾嘅係佢依然唔肯確應(認)我地既關係,同埋我發現佢好介意我同男仔出去睇戲。

夠(究)竟佢想點?而兩個一齊得開心又係唔係一定要確定得好清楚呢?

,希望你會睇到呢封信,可以俾個答案我。

局中人

局中人︰


我覺得,你已經處理得頗好,由性伴侶到如今的情人關係,都表現成熟,情緒方面都控制得宜。
 
到了今日,你們已經真正喜歡上對方,那麼,你可以真真正正和他傾談,討論成為真正男女朋友。
 
你最好告訴他,大家試試做男女朋友,試用期是三個月,要是三個月後大家覺得合意,就繼續;不合意,就做回性伴侶又或是普通朋友。
 
男人最怕的是被縛,於是,你提議大家試用三個月,他就會覺得可以一試,只不過是三個月嘛,他還是能感受到自由的。
 
你也最好答應他,在這三個月中,你會對他忠心,你會嘗試真正與他建立愛情,你只會與他一個作出感情交流。這樣子,你就表達了你的誠意。
 
你們的關係基礎都幾深,所以,你可以向他提出重整關係的方案。歸根究底,若然不成功,不過是重回最初的模式,沒甚麼尷尬,沒甚麼損失。
 
也許,他已有安定下來的心,但又不自知,你的方案,正好給他一個安穩的機會。
 
你不向他表明要求正常發展,可能,無端白事,他會識到一個新女仔,他們就正常發展起來,結婚生子也說不定。
 
既然真心喜歡他,就給大家一個最好的機會。有時候,能正常發展的機會,錯過了就無。
 
幸福,要自己爭取啊!你這一次,我看好你。