令他對你有 feel – 覆小汶

有個追男仔的問題想請教您。


有個同事在2月中調到我那team,還要坐在我前面,所以經常傾計,他大我一年,冇女朋友(係我同事問佢,佢大大聲係我地面前答冇),談話中發現大家性格、背景和價值觀都好相似,我亦好欣賞佢,我話鍾意行山滑雪旅行佢都話有興趣,仲會同我講屋企o野、情緒(例如有時好大壓力,想大叫想喊)。


我一直都覺得大家係好夾o既同事,仲可以做friend 添,發生o左3 件事令我發現佢好似對我有意,我自己都好鍾意佢。


1. 佢病假o個日打我手提問公司野

2. 佢同我講佢係乙型肝炎帶菌者

3. 有日lunch佢問我係咪要睇電器(佢自己都要睇),之後同我兩個人食飯同去睇。我地放工之後冇聯絡,同事又冇活動攪,之後我借口叫佢帶我去佢住o個區睇樓,2個人行咗一個晏晝同食糖水,收工又借D意同佢行電器鋪,星期六長週下晝又借D意問佢响邊;星期日仲打俾佢問佢有冇興趣去旅行(之前我話去旅行佢話有興趣)。


我覺得自己已經好主動,但係佢好似冷淡咗D,返工期間仲少咗傾計。我自己都冷靜返,諗下自己可能太急,諗住做返正常既自己(平時都對佢幾好),慢慢嚟,但係我真係覺得佢好好。


我自己都好耐冇鍾意過人,我唔想錯失呢個好機會,成日好想表白,但係又唔想咁直接,點樣可以知道佢o既心意?


佢日日坐係我前面,真係好囉囉攣!


謝謝!


小汶

小汶︰

你已經好主動了!再主動,真的會嚇走男人。


他常常和你聊天,肯定覺得你唔錯,對你有好感。


但愛情,是需要一些額外因素,例如,需要有 feel 。


你要令他對你有 feel ,而不是令他覺得你要捕獵他。


大家是同事,日日都見,其實好方便製造愛情或曖昧感覺。


1. 男人是視覺動物,你要保持每天都清新可人,狀態良好;


2. 不必主動撩他說任何話,你曾經對他太主動,已失去神秘感。最好,你收起所有主動聊天的行動。


3. 但就可以不經意地拋出一個有點含意但又動人的眼神和笑容;帶點曖昧色彩,讓他有點意會,但又不能肯定你的心意;


4. 有機會的話,在他面前彎身,露出胸前事業線;忽然性感這一招,幾時都有效;塗點香水,貼身地經過他面前;


5. 有公事所需幫忙,又明知他一定幫得到,讓他去幫,你要滿目感激;


6. 遇上一個有情調的單獨相處時刻,你可以流露些少楚楚可憐,說些故事讓他對你由憐生愛;


7. 公司有事發生時,你可以表明你的正氣、公義立場。


其實,小手段還有很多,重點是,你要外表漂亮、有點神秘感、有女性美、帶點性的勾引、有魅力、讓他做點英雄事、表現出你是正派的值得追求的好女生。


追男仔,不必表白說出口,你春心動了,他怎會不知曉?你要勾引他,讓他覺得不能錯過你。


好吧,要是他就是死都不肯追,即是說,他不想把你變做女朋友。那麼,你安心做個好同事吧!


滿街都是男人,你就去追其他人啦!