與太太的一段孽緣 – 覆愛與痛的邊緣人


深雪小姐︰

同太太拍拖7 年,結婚兩年多,有個快兩歲又可愛既囡囡,講太太先,定講老公先呢?

老公每天放工會回家,陪囡囡玩、唱歌、傾偈、教認字、認物件、食晚飯、飯後去街街行超市、書店...等等,囡囡好黐老公,太太好唔「likey」。太太最好的幾個姊妹話原因係老公縱個囡,over 左,個囡先咁黐老公(老公絕對唔認同,只係老公o既底線比較低,始終一個歲幾小朋友,期望佢會有幾自律幾懂事?),放假一家人去街,外出晚飯,老公去街市買菜煲湯煮飯,結婚至今,老公放工同自己朋友happy hour,食飯4 次(所以好記得)。

太太每天放工回家,第一開電腦;第二上facebook、 check email、MSN;第三睇時裝、化妝品、名牌手袋流行情報網等等;第四去ebay bit 貨(老公同太太傾過比多d 時間陪個囡,太太話返工無得上網)。飯後繼續前述工作or 煲電話粥or 睇TVB 劇集or 新一期八卦週刊,廣告時間玩o下個囡,每星期梗o左一至兩晚不在家晚飯,同三兩個好姊妹去shopping 晚飯講公司是非等等。

老公自問對太太無微不至,生日大禮,過時過節小禮物,新款名牌手袋不下10 個,每晚飯後一杯熱茶,每朝買早餐拎去公司比太太,病時餵藥,煲粥煲湯水,每月幫太太處理銀行戶口、轉數、交咭數、乜費物費...

老公同太太其中一個好大o既分歧係理財觀念,舉例︰老公好堅持要為囡囡供一份18 年o既教育基金,太太3 個好姊姊話︰「係叻o既香港都讀到,考埋獎學金添啦!」所以太太認為無需要,唔使對個囡咁好,將來佢都唔會理我地架啦。老公話養個囡係責任,無其(期)望個囡將來一定要回報,如果阿囡咁叻梗係好啦,咁當儲多筆錢o羅,將來點都有用,老公叫太太放心,供款老公自己負責。

還有幾件事,令老公好沮喪,一是關於家庭開支分配,家庭的收入是固定月薪及公開的(老公27K,太太16K 幾),婚後添了新居(首期老公,層樓無名),每月家庭開支分配如下:

老公︰供樓、菲傭人工、5 份保險(囡囡+老公自己)、囡囡一切日常生活開支+幼兒園學費、屋企一日三餐買菜、家庭日常用品、每星期家庭外出娛樂、間中水電煤差餉地租、自己返工食飯搭車錢。

太太︰管理費、水電煤差餉地租、自己份保險、cable TV、自己返工食飯搭車錢。

令老公沮喪o既原因,係太太經常話好辛苦,每次水電煤費都話貴(總共2000多),要限制一家人o既用電、用水、用煤量。

第二係太太3個好姊妹一句,好過老公講一千句。

三兩年下來,有幾個現象出現︰

第一:太太(三個好姊妹)認為老公唔好、好悶、無新意、無心思、無情趣...

第二:太太另外一班朋友(結o左婚、有兒有女、家庭生活穩定)認為太太有個顧家好老公,太太唔多同呢班朋友來往。前年太太o既朋友(舊同學,10 幾年朋友)相約聖誕家庭聚會,印象特別深,聚會時必有交流湊BB 苦與樂、BB 成長o既行為動靜、BB 產品以致幼稚園資料o既心得,老公同太太o既朋友夫婦談得好投契,太太o既朋友問太太比個囡讀「一條龍」定直資學校,太太望住老公,朋友隨即笑笑口話︰「唉,問你都係唔知架o刺,個囡d野咩都係你老公攪架啦。」

返到屋企,太太發老公脾氣話覺得好瘀︰「你就好成功啦,扮到一個好老公好daddy 形象,人地話我咩都唔識。」老公話人地講笑呀。太太至今無再同呢對夫婦聯絡。

第三:來自工作及經濟o既壓力及太太多年來兩日一小不滿,三日一大不滿既怨氣(對工作、老闆、同事、老公、工人等等) ,令老公對夫妻性生活失去興趣,太太只會埋怨。

試o下同太太傾,太太反應係︰

「拍拖時都知我係咁架啦,脾氣,發少o左啦;衫褲鞋買少o左啦(呢點老公都承認,拍拖時,太太最高紀錄係同一時間有62對鞋,一個月買8 次衫,婚後平均每月只3 至4 次)。」

「你估剩係得你捱,我無付出o既。」

老公公司要減人工,問太太可唔可以負責菲傭人工(當初太太實牙實齒話負責,結果由手續費,第一個月出糧開始以至去接菲傭,都唔係太太負責。)太太話︰「o華,咁我仲有錢使o既?」

老公好想離婚,老套原因,又係為o左個囡。

除開孽緣,老公想聽聽其他意見!

愛與痛的邊緣人


愛與痛的邊緣人

許多例子都是,溫馴的好男人,就娶了個強權兼無賴的惡女人。

所以嘛,男人一定要揀清楚才好娶一個女人回家。

而又通常,惡女人都好福氣,兼且身在福中不知福。

看情況,無論你怎調教你的太太,她都不會變得溫柔體貼,她也會繼續欺負你。

你當然可以考慮離婚,但你要預料,將承受漫長的苦難和煎熬,惡女人一定不會放過你。

離婚這個概念很好啊,起碼你懂得反抗。

下一次,再揀女人時,就揀一個懂得為別人付出的人,只有願意去付出的女人,才適合一同生活。

也最好,揀個品性成熟的女人,她願意照顧別人,不只有別人遷就她。

其實,若然你的太太沒有生小孩,她能維持婚前「做女」時的狀態,她就會滿意得多。她的自私自利行為,源於她討厭做妻子和母親,她只想做一個無憂無愁的輕鬆玩樂派女人。

其實你都知道,你所過的日子並不正常。當其他男人在家中話事、享受父權之時,你就受氣和被欺壓。

我認為,太太不肯多付出家庭開支尚算 ok ,很多女人都希望被老公養。但她在享受你的金錢福利後,卻沒回報你任何賢妻的情意,那就於理不合。

算了吧!如此不公道的婚姻,不要也罷!我是女人,都支持你。

深雪覆