第三者也有入職條件的啊 – 覆迷惘的人


親愛的貽興︰

兩年前開始睇你的書,有時在感情上有咩困擾都會再拎起你的書睇下可唔可以解答到自己,但今年終於都要第一次send email 要你親自解答,謝謝你。

今年年頭我識左一個大我7 年o既男人,其實一直都知道佢已經有一個已經拍左4 年幾拖
o既女朋友。我地由o個時開始就好似普通朋友咁會SMS、MSN,直到而家我地都一直keep 住每日係咁。由於工作關係我地好多時都會見面,每晚放工之後就會MSN,如果佢出街玩o既就會SMS 同我交代一下佢去左邊。

佢同我開始呢種關係o既一個月之後同我講其實佢同女朋友關感情已經變淡,但就係因為淡到咁樣佢就一直都唔知點開口同佢講分手。而我地之間亦都冇承認過大家已經係男女朋友o既關係,在人前我地亦都扮到好似冇咩野咁。但私底下o既我地係做齊晒所有男女朋友會做
o既事。

以我所知佢同女朋友算係半同居,但關係密唔密切我就唔清楚。佢唔會同我講一切有關女朋友o既事,雖然有時明知佢去係同緊女朋友一齊,甚至可能佢女朋友就在家中,佢都會照樣同我SMS同MSN。

我初初都會覺得我可以等,到有一日佢地就會分手。但慢慢我就發覺到而家已經差唔多半年啦,佢好似都係無動於衷咁。

上兩個星期佢同我講佢地話左分手,但女方話需要時間靜一靜,遲下再傾。咁佢就同我講佢想搞清楚佢地兩個o既關係先再行下一步,講完呢句之後佢仍然keep 住同我做返平時o既野。

呢排我有上佢女朋友facebook 睇,佢女朋友又的確好似好唔開心咁,佢似乎冇講大話,但其實呢個男人究竟諗緊咩呢?

其實除左佢係人地男朋友呢個問題之外,我同佢呢半年o黎都係好開心的。但我唔想繼續咁樣落去。曾經諗過佢係咪玩緊我而放手,但有時諗返如果佢係呃我o既,佢應該唔會成日主動搵我,甚至佢同緊女朋友一齊佢都會同我SMS。

我真係唔知應該點做。逼佢快些分手?又好像只會逼走佢。順其自然?又怕會無止境等待下去。

謝謝你的解答。

迷惘的人



迷惘的人︰

周圍那麼多極具心計又極懂演戲的第三者,你這種,算是又笨又善良的了。

可是我告訴你,又笨又善良的第三者,簡單來說,其實,就是不懂當第三者,不是做第三者的料。知道為什麼有些第三者很快就坐正,有些卻落得歲月蹉跎,青春被耗光,最後人老珠黃的下場嗎?

分別在於,前者那種第三者,很懂耍心機,後者如你,又笨又善良,一直被動,奸又奸不來,壞又壞不起,結果,傷了別人,苦了自己。

如今這時代,當第三者是需要有些基本入職條件的。像有線人查到正印的facebook、MSN或者手提電話,監視正印的一舉一動,凌晨偶然致電過去不出聲然後掛線,或者明知男朋友跟正印在一起的時候致電過去,要他說一些情話,甚至刻意在男友剛走開的時候致電給他,讓正印接聽,令她起疑之類,甚至裝作同樣是受害者形式向正印哭訴、向男友訛稱收到匿名恐嚇電話,你懷疑是正印打來之類,這些離間嫁禍,不管外表看來再馴良再溫柔的第三者,多少,也懂耍幾招旁身。

這些,你做得出麼?

不要以為那男人會為你做決定。不要相信他真的能跟女友分手然後名正言順跟你一起。如果你繼續被動,繼續天真等待,你的確跟等中六合彩沒分別。

要不,做一個合格的第三者,要不,別再做第三者,找個不需要你耍心機的位置,繼續做回善良的小綿羊就好。

祝 名正言順

貽興