同事舊情人- 覆唔開心的人

深雪︰

你好。好希望可以得到你的回覆。

我同老公結婚5 年半,相識至今8 年,佢大我15年,所以都叫做懂得照顧我,我是喜歡他的,相處是OK 的。

由拍拖至今都存在一個問題,就是他之前一個o既ex gf。我不喜歡她,覺得她姣同唔係好正經(因為她之前同我老公和她男朋友是3角關係)。

她是老公之前的舊同事,所以間中一班人出來gathering。


因為我唔鍾意佢,所以我唔想我老公見佢和有任過(何)交流,我老公似乎不太願意唔見佢。初時我老公會忍暪(隱瞞)和閃避約了那班人(當然當中包括那個女人),我是知道的,當然我好不開心啦,我的唔開心是自然流露,未結婚已經因呢件事吵架,但當時我老公不肯讓步。

我以為我可以包容我老公,我以為我可以接受我老公同ex gf 的朋友關係,所以有一段日子我係放寬o左,佢o地係有電話見面來往(好小量)。

結婚之後,因為那個ex真係好討厭,竟然約我老公在我生日當晚和其他舊同事出來gathering,雖然我老公拒絕了,但係我仍然討厭她,我再次唔想比我老公見佢,是由心的想。

每次他們一班舊同事出來gathering,我之前同之後都好唔開心,我表現得好不安和好唔鍾意和好唔開心。我老公見到我咁,沒有哄我之外,還會嬲我,佢覺得我咁好無聊,佢覺得同ex gf 見面冇問題,佢唔會因為我o既唔開心而唔同班舊同事gathering。

佢一直都不肯讓我,我個心好似比一把刀插入我個心裡,點解佢會咁對我?寧願我不開心都不會為我唔見ex。

之後有幾次因為呢件事吵鬧,我老公o係生氣的情況下同我分開,我當時真的好傷心呢。當時我真的想走,但係我仲好愛我老公,所以留下同埋哄番佢。雖然我老公只是一時之氣叫我離開,不過我已經傷心到極點,做女人做到咩尊嚴都冇晒。

直至有一次,我真的要解決呢件事,所以我幾晚都好夜才回家,最後老公應成(承)了我,他們一班舊同事出來gathering 他會唔去,同以後唔見佢。

約1年前,2009 年1月,他就好像什麼都忘記了一樣,舊同事出來gathering 他一樣照去,當時我已經很怕很怕很怕,佢明明知我不喜歡,明明應成(承)了我以後唔見佢,他依然出去,出去之後,我真的好唔開心,又吵架,o個次他好像瘋了一樣與我吵鬧。那次之後,我知道不可以再為呢件事吵鬧,自此之後我同佢的感情冇好過。

加上我o地住得好近老爺奶奶,佢就時常回老爺奶奶家,時常要和他家人一起,而我由喜歡跟他咩都一齊變了喜歡跟朋友出街、跟朋友去玩、shopping,時常令自己好忙碌。

我o地之間的感情已經出現問題。點解佢要咁對我?佢係咪不太喜歡/愛我呢?

呢個男人係咪唔值得愛呢?因為佢一直傷害我,仲要話我無聊,定係我的問題呢?

唔開心的人


唔開心的人

你有沒有想過,你已中了那個女人的奸計?

她最想怎樣?她最想的就是,因為她,你和你的老公感情破裂。

我認為,她和你老公已經無感情轇葛,因為,要是仍然有私情,你老公不會一大班人時才見她。

男人都懂得處理私情,有私情的女人,他會偷偷見,會好秘密。

我常說,情敵,可以是世上所有女人。而這種舊同事舊戀人,算得上甚麼?你要擔心的話,不如擔心將來會出現的重份量情敵啦!

如今,你要做主動修補關係的人,你要告訴你老公,你從前太神經質,你以後不會再管頭管尾,你會信任他。

你不要再浪費時間與老公鬥氣,看情形,你不會贏,再鬥下去,你都是佔下風。

你不想他見大班舊同事,他偏要見,目的已經不是那些舊同事,而是純粹為了與你抗爭。

你的老公,要在你面前做大男人。要你聽話,而不是他去聽你話。

你不要理會甚麼尊嚴問題,無論誰對誰錯,都不重要。你的首要任務,就是挽回你的老公的心。


深雪覆