屬於其他男人的女人 – 覆心煩人謝仔


深雪︰

妳好!妳還記得我嗎?好多謝妳之前對我提出的意見,我都有跟著去做,o係呢大半年o黎我都好開心,不過,我同佢之間已經到o左完結的地步。

自從聽取妳的意見之後,我跟佢都keep 住一個上司下屬同時為好朋友、做佢守護天使的關係。o係呢大半年,我感覺到同佢之間有一種若隱若現的微妙關係,不過就都未到一般情侶關係,可以講係好好好朋友咁。

講返呢大半年同佢之後D 事,同之前一樣,大家都係有keep 住晚晚講電話、send 下SMS 咁,好多時約佢出街佢都會答應,不過都係只限

o係星期六or
日,o係星期一至五佢都會同個男上司一齊OT、食飯,或會開房,差唔多每一日返公司,我都會send SMS 叫佢起身咁,佢都會打返比我or
send 返SMS 比我話知道要起身;o係大家搭緊車返工o個時,佢都有時send SMS 比我,話比我知佢到o左邊道(度)咁,有時佢仲打比我傾一陣先落車。返到公司之後,我有時間,都會用MSN
同佢傾,講下公事,講下D 私事;之後放左工,我都知道幾點搵佢會比較方便,佢通常都係11:30pm 之後,佢好多時同個男人放o左工之後,佢都會熄o左個電話,等大家走o左o個時,佢就會開返個電話。因為我有時早o左少少打比佢,佢電話飛o左去留言道(度)。之後我再打比佢,佢聽電話之後問佢,佢話個電話冇電(其實我都估到)。

其實,我好多時都知道佢講大話,不過我都知道我冇得選擇同要接受,一日大家keep 住咁,我都要接受。雖然我唔係佢邊一個,不過
o係當時,我都會明白。

到3月o個時,有一次出街,佢同我講話佢會o係3 月尾去泰國旅行,
o係星期五晚出發,星期日晚返。我當時問佢一個人去嗎?佢隔o左一陣之後先答返我話可能兩個人去。(咁當時我都估到,個男上司會同佢一齊去。)不過佢就話個男上司仲未答應,我聽到之後冇出到聲,到大家行o左一陣,佢就問我係咪唔開心,我話唔係呀。(其實我唔應該有咁o既反應,不過o個一刻我真係唔開心),之後我o個晚都好似冇咩事咁,同佢食飯行街、陪佢等車返屋企。

到佢出發o個日都要返公司,因為佢同男上司搭夜晚機。到o左放工
o個時,見佢差唔多係6:30pm 左右走,個男上司就遲佢10 分鐘先走。我o個日心情好唔開心,不過我冇辦法。到大約8 點幾左右,佢send

o左個SMS 比我,同我講叫我o係呢個週末好好休息下,不過我就冇覆到佢。

我知道佢搭幾點機返,係星期日晚11 點幾就send SMS 比佢,問佢返到o黎未,問佢好唔好玩。佢之後打比我,佢o個時搭緊的士返緊屋企,佢話都OK
啦,不過就有D 累。同佢傾o左一陣之後,佢差唔多到就收線。

到o左4 月,同佢出街次數就比較多o左。還記得o係復活節o個時,同佢出o左兩日街,事原(緣)係佢有一日問我,近期有咩戲好睇,佢想去睇戲,我話要睇o下先。佢之後講話如果佢陪我去睇戲,佢想我陪返佢去睇舞台劇,我話冇所謂,不過佢就話佢都要check
o下個舞台劇幾時上,可能要到5月先,咁我話OK 啦。跟住我想睇有一陪(套)戲,差唔多要落,咁o係放復活節假期前一日,我朝早問佢係咪今晚放工去睇,佢話要諗下先(其實我好衰咁試o下佢,因為o個日都要返工,都知道夜晚個男上司一定要佢要陪),咁我話返到公司先算。
o係朝早返到公司之後冇耐,我用MSN 同佢講話我上網book o左飛今晚11 點幾睇,佢之後答返我話都唔知幾點可以收工,因為都有好多
o野做,咁我唯有同佢講下次先去睇,佢都好似唔好意思咁,話下次等佢去安排下。

咁o個晚我唯有返屋企,佢之後o係1:30am 打比我,話佢o岩o岩o係公司走(其實我知道佢個晚11點幾就o係公司走),咁我問佢累唔累,佢話都累呀,咁我同佢講快D
返屋企休息。(其實我知道個男上司好多時都要求佢去開房。)

之後係復活節假期,同佢出o左兩日街,其中一日係去睇戲。佢話陪我去睇返其他戲,我知道佢唔想我買o野送比佢,佢之前講過話唔想我洗錢買o野比佢,不過我o係o個日未出去之前,買o左份小禮物送比佢,佢收到之後好開心,仲同我講佢好耐冇收個(過)復活節禮物。o個時見佢咁,我都好開心。佢之後張(將)份禮物放o左係佢公司桌面。

之後同佢行緊街個時,都有攬下佢條腰行一段路,不過唔係好長時間,佢都冇迴避,差唔多佢想去邊,我都會陪佢去,佢想去買咩,我都會陪佢一齊去買。其間同佢有好多開心回憶。

記得o係5 月初,我要出去買電視,佢原本話要陪我一齊出去睇,不過我等唔到,自己出o左去買先,之後同佢講返,佢都好似唔開心咁,不過佢就話下次出街個時要陪我去睇多次,睇下我買o左咩電視咁。

到了5 月,係我同佢最開心o既日子,因為差唔多每個星期六都有同佢出街,有時係我踢完波之後搵佢出去食飯,佢都會答應出去,因為佢通常星期六下午都會返公司整o下o野。(佢有時要返公司都係見個男上司,我知道個男上司一定會返去,因為佢同我講過,無論有冇o野做,個男上司都會o係星期六返公司。)

到o個晚1 點幾左右,佢就打返比我,話佢o岩o岩執完o野,再同佢傾多一陣就收線。到o左第二朝,佢o係8 點半左右 send o左個SMS
比我話佢依家出門口去機場,我睇到之後都有覆返佢,佢之後就打比我,問佢做咩唔訓,咁同佢傾到機鐵之後就收線。之後佢搭緊機鐵o個時都有同我SMS。

o個日因為有D o野未整完,所以我下午返o左公司,因為佢係我上司,佢會見到我出email 比客人。o係佢到o左泰國之後,佢用blackberry
出email 比我話佢到已經到o左,咁我都問返佢點樣之類。之後佢下星期四返o黎香港,o係跟住個星期六我都約o左佢出o黎食飯,不過估唔到,o個次係最後一次同佢出街。

o係6 月,佢開始改變,佢開始唔係成日覆我SMS,同時又唔係成日接聽我電話。佢係間唔時會同我傾電話咁,咁樣keep 住到7 月中左右,我忍唔住問佢發生咩事,佢答返我話佢唔想再重返,話唔係我o既錯。咁我睇到之後就已經知道咩事發生,我之後答返佢話我已經對佢再冇意思,我只不過係當佢係我朋友咁。佢話佢知道,不過之後o個幾日,佢都冇咩覆我。

佢o係7 月生日個日,我都有send 到SMS 比佢講生日快樂,佢覆返話多謝。事隔幾日,我依舊send SMS 比佢,佢又開始好似之前咁樣(可能佢o個時真係當返我係friend
咁),又同佢keep 住SMS、講電話,不過又冇再出街。

到我有一日病o左返唔到工,佢都send SMS 問o下我點,咁樣同佢又keep返幾個星期。

記得佢有個星期日去o左剪頭髮,我問佢剪成點,佢答返我話返工咪知道o羅。隔左一陣之後,佢send o左張自拍相比我,話呢個係佢新做(造)型。當時收到我好開心。

到8 月中左右,佢又改變返好似唔係點理我咁。我都終於明白,佢已經唔想再好似以前咁。佢話會當我係朋友咁,不過佢就講唔再成日覆我SMS 同講電話。我明白佢想keep
住同我一段距離,就算係朋友都好,都唔會再好似以前咁。

講返佢同個男上司o既關係,佢依然鍾意個男上司,以我所知道,佢可以為個男上司付出佢所有,無論對佢自己有幾辛苦、幾唔開心,攪到自己傷痕累累都好,佢都會100%
付出。

我知道,佢有時會諗自己係個男上司o既奴隸、助手、秘書,但佢都會一一接受,只要個男上司鍾意,要佢做咩都冇所謂。佢依然咁(甘)願做第三者,永遠唔見得光,佢都心甘情願。

有時候我明白佢點諗,佢寧願自己辛苦,工作上有幾困難,同個男上司有幾多沖(衝)突都好,佢都心甘情願留o係個男上司身邊,咁佢可以日日都見到。之前佢原本有兩次機會可以去第二組發展,佢都冇去到,因為佢同我講過,再留o係道(度)都冇多發展,仲要受到高層o既限制。

佢好多時都比高層同個男上司責備,因為佢想做o個套方法,好多時都同個男上司諗法相反。佢又講過,原本佢想報讀MBA 課程,其實有關學校都已經收錄o左佢,不過佢最終都放棄。

無論點,我都對佢係好朋友咁。可能佢唔會有同樣諗法,不過我同佢講過,佢有咩事都好,都可以搵我。今次,我對佢所付出,我冇一刻諗過後悔,同佢相處o既日子,我都有開心過,只不過佢唔會改變。依家,只有我自己改變自己。

我好想同佢講,就算大家冇緣份都好,我都唔想佢繼續做第三者呢個角色。唔見得光、唔會有機會得到任何真正名份。佢講過,到佢第二時老o左,佢都會自己一個人生活。佢話會自己買樓一個人住或者住老人院。其實我唔想佢有咁o既想法,不過佢係一個好硬頸o既人,唔會聽其他人講,佢只有覺得可以,佢就會keep
住去做。

最後,我只想佢得到真正快樂同幸福。再一次多謝深雪妳o既意見同支持!

心煩人謝仔


謝仔


你愛上了屬於其他男人的女人。

你知道嗎?有些女人喜歡苦戀。看吧,男上司不會給她名份,大概物質都未必有,兼且,在公在私她都受氣。然而,她甘心。那就是因為,她愛上他。

敢愛敢恨是一個優點。可恨的是,她愛上的不是你。

她愛得無悔,甚至預計將來孤獨終老又或是住老人院。那麼,你都一樣可以學她愛得無悔,無論她有多固執,你都一樣繼續愛她、對她好。

不過,你有否想過?既然她喜歡苦戀,你就將計就計,送她另一段苦戀?

這一次,你找來一個女朋友,正正常常拍拖,卻又和她暗地來往。因為夠複雜,她又不能得到你的全個心,可能會因此愛上你。

每個女人的愛情命運和愛情喜好都不同,你覺得她好命苦嗎?她其實不知多沉迷於愛情的扭曲和痛苦。

你和她,是一種自由的關係,你可以隨便抽身而退,亦可以隨時回歸。這亦是這段關係的最大優點。

所以嘛,你出外看看有否別的對象,到時候,若然你仍然想和她一起,都一樣可以。

深雪覆