未必即刻發作 – 覆仍然傷心的人

貽興︰

你好!之前都寫過信給你,可惜你冇覆。真係好想聽聽你意見,希望今次你會覆我啦!

07 年跟我個朋友去玩獨木舟,識o左一班朋友,唔知點解其中一個人比我o既感覺真係唔係幾好,但係好出奇我同佢o係08年一齊
o左。其實我真係無法相信,因為我覺得佢係唔會鍾意我,但係我地偏偏又一齊o左!

因為我同佢都係基督徒,所以開始時,佢都叫大家一齊祈禱等神o既默許,同時佢都想我想清楚佢係唔係我心目中o既對象。佢唔想我後悔,亦都唔想我唔開心!

之後我地o係08 年12 月就一齊o左。可惜,唔夠2 個月佢就同我分手。佢冇講點解, 佢


send SMS 比我,同我講︰「雖然我地冇鬧過交,但係我覺得同你做朋友會好D,希望我明白。」我聽完真係好傷心,到而家都係,仲要失眠,食o野又食唔到。

第二日同佢傾MSN,問佢點解會咁,我話我可以改,佢同我講話我好好,我冇問題,唔需要我改,有問題o既係佢!

跟住我話去旅行o個時都冇事,佢就話去旅行時已唔鍾意我,佢唔想我唔開心,先不停扮愛我。

我真係好想問,乜真係可以扮愛o架咩?

我真係接受唔到,因為我自己都係一個敏感o既人,我真係感覺唔到有事,同埋我地去旅行前4 日先一齊去同朋友睇戲,o個次仲要係我
o地以情侶身份見大家,之後佢仲要攬住我行花市,然後去o左佢屋企。如果佢唔鍾意我,點解仲要o係班朋友面前同我咁sweet?仲要叫我返佢屋企對我成晚?

所以我真係好想知發生咩事,真係可以4 日後就唔再鍾意?

我真係好想再同返佢一齊,唔知仲有冇可能呢?貽興,請你同我分析o下!

仍然傷心的人



仍然傷心的人︰

其實不論男女,唔鍾意一個人,都未必會即刻發作。

有時唔真正一齊,真係唔知究竟大家一齊work 唔 work。你唔可以怪佢偽裝,可能佢根本唔係存心呃你,或者佢自己都好苦惱,搵緊方法去解決呢個問題,就係因為冇放棄,所以先至一直扮落去,唔想傷你心,只可惜,最後都冇法子,先至唯有分手收場。

其實你同佢之間,係相處o既問題,甚至可能牽涉到愛同喜歡o既問題。有o的人,我地覺得幾唔錯,有一剎仲以為係愛,但當真正一齊,掛上o左情人o既銜頭,你先會突然驚一驚,發覺唔係o個一回事。愛錯唔係問題,至少佢都有向你告白,只不過佢只係一個平凡人,勇氣,都要儲一輪先有咁解o者。

唔好再諗你同佢可唔可以一齊,佢同你,完全冇可能o架啦。我係你,將時間心機放響其他人身上好過啦。

祝 有緣遇上

貽興