朋友妻 – 覆妹妹

貽興︰

有睇開你o既一些專欄,很欣賞你各方面o既見解。最近有件煩惱,都想你解答一下。

上個月男友突然向我提出分手,我扮作瀟灑,沒有即時作出太大既反應。但從來未試過失戀o既我,當時才發覺自己唔識得去面對呢種傷心o既感覺。

o係呢個時候,佢o既一位好朋友出現。佢開解我、陪我、用各樣方法去令我開心。於是我就接受o左佢,但我好清楚,我並無愛上佢,只係想令時間好過一點。


最近我地一齊o既事被前男友發現,佢非常唔高興,佢仲嬲o左我現任男友,甚至連朋友都無得做,關係因此破裂。

我想問其實我地一齊係唔係錯?點解前男友咁嬲我現任男友?

妹妹



妹妹︰

其實無論男女,自己o既好朋友同o左自己o既ex一齊,就算o個個唔係好深愛都好,始終,都有種「私人物品被侵犯」o既感覺,即係你用過o既車,或者你住過o既屋,後o黎你賣返出去,點知原來跟住轉手就係你o既好朋友擁有o左,哇,你只要稍為想像o下兩個人一齊o既親密,你已經頂唔順啦,係咪?

唔一定男人先至接受唔到呢o的o野,女人,都一樣。佔有慾,未必同性別有關,但絕對同性格有關。

你同佢一齊當然唔係錯,又唔係一齊o個陣眉來眼去,暗裡偷食,你地光明正大,怕咩?不過,你都要預o左,如果你o既情人同你o既朋友圈重疊,咁就要預o左可能冇o左你男朋友佢地o個堆朋友,因為,佢o地一見面,就算唔動武口角,都面左左,唔會再有朋友做。

如果你現任男朋友都冇為呢件事煩惱,你就唔好諗咁多啦,佢都唔介意呢o的問題,你又諗o黎做咩呢?

追求真愛尚且要有所犧牲,世上越珍貴o既o野,越需要代價o既。

最緊要係佢同你槍口一致對外。

祝 一夫當關

貽興