禁忌戀 – 覆表妹

Dear
貽興︰

你好。我有一個 4 年半o既男朋友,同佢感情開始麻麻o地,時不時會嗌交,感覺到感情開始淡。就前幾個月因為有假期同心情唔好而去o左USA
旅行,係我自己1個人去順便探望親戚。

o係USA 我表哥同佢2 個男性朋友做導遊帶我周圍去玩,期間表哥對我無微不至,好細心。當然我認為係表哥表妹o既關係會咁對我啦,但點知,佢有時會拖我、攬我?

我初時有d 反感同疑惑,點解佢會咁(呃自己o既諗法係佢鬼仔性格啦)?每次佢拖我我都同佢講︰「我唔想拖呀。」但佢並冇理會我,仲愈拖愈實。


到o左有一次佢攬住我,我推開o左佢,因為我想stop 佢咁樣,結果我發o左佢脾氣。一來佢o既朋友知道我係表妹,佢咁樣做令到我好尷尬;二來我有男朋友,唔想有對唔住佢o既感覺(雖然係因為同佢有d問題唔開心而去旅行)。

後尾返到酒店,我表哥佢訓o左o係我隔離攬住我求我唔好嬲佢。我
o個陣心跳得好快,而且已經感覺到,佢對我唔止表妹咁簡單。佢仲同我講,佢對我仲好過對佢以前d女朋友,叫我同我依家o既男朋友分手,去USA
搵o野做。我聽完個心好亂好亂!

到我返到HK 之後,心情仲未平伏。幾日後同佢聯絡,佢對我表白,仲解釋點解對我咁好。講真,我承認佢對我好,我係有心動過,但並唔係男女朋友o既鐘(鍾)意。佢都知道突然咁樣對我我會有d
反感同驚,仲叫我唔洗理佢。

我想問下你,表兄妹係咪唔可以拍拖(佢係我daddy sister's son)?咁樣算唔算亂倫/不倫?到底我應該點樣做?

Thank you so much!

表妹



表妹︰

傻瓜,依家咩年代啦?表哥表妹拍拖點會有問題?仲係粵語長片咩?

根據香港法例,基本上,表哥表妹結婚,係唔觸犯婚姻法律架。(詳情請自行參考《婚姻條例》憲報編號:L.N.
10 of 2006附表〈血親及姻親關係〉可知)

不如你先坦白問o下自己,你想同表哥一齊,係因為禁忌,所以刺激?定還是真係因為佢係佢?你要好小心攪清楚呢個問題,因為,愛情短暫,但親情長久,因為一個你愛但又未必愛到一世o既表哥,同成個(甚至兩個)家族為敵,令你阿爸阿媽激氣傷神,可能成世留
o左條疤痕,你自己秤一秤,划唔划算?

如果真係非愛不可,非佢不可,趁後生,瞇埋眼,就一o野「咪」落去啦,轟轟烈烈,才不枉年輕一場。

但假如只係純粹因為貪玩、禁忌,或者試o下,我就唔鼓勵你去馬。因為手尾長。

講真,表妹同表哥拍拖絕對冇問題,如果你話結婚,就可能有o的問題o者?不過,都唔係你同佢會介意o既問題,認為有問題o既,都係你身邊親人o既o者。

擔心咁多做咩?如果我係你,我只會擔心,萬一真係結得成婚,男女家都係同一班親戚,禮金會唔會少好多,回唔到本o者?

其實,好可能你地一齊o左,已經好快發覺唔係o個回事,極速彈返開呢。仲對表哥表妹有咁多遐想,表妹你年紀應該都大極有限。

青春,真可愛青春。

祝 打破禁忌

貽興

advertisement