只有付出 – 覆Stephen


深雪:

你好!我今年27 歲,前度女朋友25 歲。我前度女朋友3 年前已同佢分手,但斷斷續續我地都有聯絡,因為我太愛佢,就算佢每次很惡罵我,我過一排都會再打返俾佢,問題就係呢度?

我們呢段愛情,佢的朋友和家人係全不知道。佢脾氣好差,o係我角度無一個女仔比得上佢,佢唔俾我發脾氣,因為我一有少少悔氣的說話,佢叫我以後都唔好搵佢,換句話講,即係佢好野蠻、任性。

當然我係唔會甘心,因為我愛佢,我覺得佢不在乎呢段愛情,但我仍然很努力咁付出,每次都係因為呢件事而鬧分手,佢可以用任何藉口來講分手。

呢段愛情之中,只有我付出,而佢只係完全不緊張呢段愛情(我每次同佢復合,係佢不願意下答應)。記得我同佢最後一次分手,我記得係打o左幾個電話俾佢,結果佢屋企人知道o左而同我分手,而當時佢已經係大專畢業,已經係成年人。

之後,佢鐘意o左個男人,同佢拍拖,當時我仍然好鐘意佢。

記得o係個電話度,聽到佢同果個男人的一些好肉麻的對話(佢知我聽到),我個心如刀割,佢都可以當無事;之後佢同果個男人分o左手,竟然來問我感情問題。想問呢d係咪正常?佢點解唔顧我感受?

一件好重要o既事,就係我好笨,因為我無條件對佢付出,我俾佢的金錢不少於40 萬元,換來的結果就係話我個人太計較,愛一個人應該無條件付出。

想請問,愛一個人是否無條件咁付出?係咪值唔值得都要咁做?我覺得一段愛情要雙方去建立,而要雙方去維繫,而唔係我單方面付出。

我同佢呢3 年,十分一時間係開心的,十分九時間係非人生活(非人生活係指佢成日發脾氣,差唔多係兩日一次,而佢無對呢段愛情付出過)。

我覺得一個女仔發脾氣唔緊要,而唔俾男朋友發俾(脾)氣就好有問題,我深信每一人都會有脾氣,只要大家遷就就無問題!想問我咁諗是否過時呢?抑或佢真係有問題呢?

佢知我對佢好,知我俾最好o既o野佢。有一次打麻雀(我們已分手,當時我已極力追佢),其中有一個男仔對佢摸手摸腳(佢可以當無事咁),咁我當堂黑晒面,佢竟然同我講︰「你唔好打麻雀,要黑面返屋企。」

第二日我問佢點解無避忌,問佢同果個男仔有冇o野,佢話無,佢仲話有問題你可以自已(己)問佢,請問我可以點做呢?

3 年裡,佢起碼答應過5 次會同我一齊,但最後都無口齒。對於呢種女仔,我可以有希望嗎?

Stephen



Dear Stephen



你的前女友其實是個野蠻無賴,難得你受落。

你對她付出金錢和愛情,她卻不感激。

沒辦法,你視這段關係為愛情,她卻只覺得你是傻佬。當女人認為一個男人是傻佬,她就會狂花他的錢,說話不留情面,態度也囂張惡劣。

你說你好愛她,也想與她復合,那麼,以後,你繼續讓她糟質你吧!不過,我勸你扮窮,別讓她再花你的錢,其他方面的糟質,你受得起的話就繼續囉!

其實,你是否願意承受真相?真相是,她一點也不喜歡你,要是她有一點點喜歡你,她不會捨得罵你,不會捨得亂花你的錢,不會捨得你難受。當一個女人喜歡一個男人,她是會小心亦亦對待他,會尊敬他,會當他是個寶。

如今,她甚至不當你是男人。

不如你去睇相,看看你是否命中注定有惡妻?同時候又被老婆刑剋?

試試去找一個好女人吧,試一次相親相愛,你就知道真正愛的滋味是如何。

深雪覆