一廂情願 – 覆M_lost


深雪:

我就快34 歲啦,同拍拖7 年幾的男朋友P 分開亦有年半,但似乎仲未放得低。

其實我o地係兩個世界o既人,佢只有中三程度,係個廚師,工作時間長,煙酒、粗口當然不少得,而且比我細4年。我係個單純、無機心o既普通OL,大學畢業後就同佢一齊。

頭兩年,我o地好珍惜對方,但可能年紀輕,唔識得相處之道,結果成日嘈交。最後佢提出分手。


分開1 個月後,我o地復合;之後o既5 年相處得好好,互相遷就,大家都為呢段感情努力。呢7 年裡面,我係一個好幸福o既小女人,有咩風雨都由佢o黎擋。
佢好o錫我。

佢因為屋企o既問題,經濟負擔好重,要為口奔馳而無咩時間陪我,但我從來都無埋怨過,亦唔介意日常o既使費由我來付,當然我知佢亦有為呢樣o野而唔開心,我從旁支持鼓勵佢,話佢知我唔會選錯,佢總有一日會出頭,俾到我幸福,就因為呢個信念,我o地一直努力。

憑著對工作o既認真,3 年前,佢得到一個老闆o既賞識,到內地管理一間工廠。對佢o黎講,呢個係一個不可多得o既機會。從朋友立場,我絕對贊成佢去;從女朋友o既角度,我當然唔願意。但我唔可以咁自私留佢o係我身邊,所以佢決定去o既時候,我同佢講,如果有一日佢要從我同事業中選擇,唔好為o左我而放棄。其實早在拍拖o既頭幾年,佢已經為o左我而放棄o左兩次去外國工作機會,我知道佢係唔開心o架。

佢初上去o既時候都好努力抽時間見我,每兩星期都會返o黎一次,但後來佢忙到連訓都無時間,攪到好多時成個月都見唔到,電話亦唔多。但我明白呢份工對佢o黎講實在係越級挑戰,所以佢要付出更多時間同精神。每次佢返o黎,我都會喊住送佢去火車站,因為我唔捨得。佢一走又唔知幾時先再見到面。佢看入眼,當然係心痛又難過,最終就變成壓力。最後佢話要事業,再次提出分手。

我知道佢唔係一時之氣,係經過考慮。既然我真心愛佢,我應該放手,俾佢做佢想做o既o野,所以我無糾纏。但我個心好痛、好傷,到依家都好難過,當然佢完全唔知道啦!

當時佢為o左令我死心,講o左好多傷我心o既說話,話對我無晒感覺,但佢騙到我都騙唔到佢自己,因為咁多年相處中,佢實在為我、為段感情,改變、付出好多好多。

拍拖早期,佢成日都話我可以選擇一個條件更好、俾到我安穩生活
o既男朋友,叫我如果遇到o既話,唔洗理佢,同佢講聲就走啦。佢亦曾經要求我俾幾年時間佢,等佢可以o係事業上衝刺,到佢有成績就返o黎搵我,當時我反對。一個咁為我打算o既人,叫我點相信佢係咁絕情?!

分手之後,我send 過一封email 俾佢,話我無怨佢、無怪佢,叫佢俾心機,見到佢成功,我會比任何人更開心。我亦答應佢,我會努力行我自己條路,雖然我唔知會行到去邊,但如果佢要返o黎,一定要話我知,可以o既話,我會返佢身邊。佢無覆我,但我肯定佢有睇到呢封email。

呢年半,我都係唔開心、放唔低,我唔知應唔應該等。我成日覺得佢同我分手係為我好,唔想再拖我時間,但我根本唔知佢真正o既想法,呢o的可能都係我自己一廂情願。

而半年前o既一場BBQ,我認識o左C,當時佢女朋友亦在場。好玄妙,C 居然同P同年同生肖,仲要住埋同一區。

當日C 已經成日撩我傾計,玩到有朋友以為我o地識o左好耐,甚至有人話我更似佢女朋友。而佢更當住女朋友面前,問我取電話號碼。幾日之後,我o地約埋其他朋友去唱K,今次佢無帶女朋友喇。此後o既見面,就得番我同佢。

我o地好好傾,對好多事情o既想法都好似,每次見面都有傾唔完o既話題,唯一係對感情,我o地係持相反o既態度。佢雖然有一個正印女朋友,但依然落D
溝女,上深圳玩,佢坦白話我知佢有好多女朋友,亦都叫我唔好鍾意佢,佢話做佢朋友會開心過做佢女朋友喎。

呢半年o黎,每隔兩三個星期,我o地就會見面。由於佢工作時間關係,每次見面都要是但一方挨眼訓,飲早茶、食宵夜、晚飯就係我
o地節目。有時亦會傾電話,一傾可以係幾個鐘,傾天光都試過。就算唔傾電話,我o地隔兩三日都會SMS。但都係我主動多,而我亦唔會o係星期六日搵佢,因為佢要陪女朋友。

幾個禮拜前有一晚,我o地出o黎去食宵夜,傾到間食店都要關門。佢提意(議)去公園繼續傾,傾到朝早5點,佢就叫我返屋企抖,因為我要返工。但呢個時間都唔夠我休息,佢就提意(議)搵間房hea。可能大家飲o左D酒,我o地就發生o左關係。朝佢送埋我返工先再返屋企休息,其間我主動撓佢、拖佢,佢都無反對。事後,我有D
唔開心,因為我唔係隨便o既人,而且會影響我o地呢段友誼。

幾日之後,我SMS 叫佢打俾我,想話我o地唔可以go further。佢都即刻打o左,居然由佢先開口話唔好再有第二次,佢話知我唔係佢o個類人,知我有唔開心。我o地就決定做對好朋友。

但有晚半夜,佢send o左個SMS o黎,提我話我o地係朋友,叫我唔好想其他。我憫,打俾佢話我o地咪講清楚囉,點解send 個咁message
俾我。佢話覺得怪怪o地,因為從來無人好似我對佢咁好。

我同佢再傾,話佢知我係對佢有好感,但我明白愛上佢係無好結果,我寧願用朋友身份留o係佢身邊,咁會開心D、長久D。佢聽完之後,話佢擔心我感受,只要我無o野,佢就無問題。最後,我o地得到共識,就係唔可以有下次,亦都唔好再提呢件事,繼續好似以前咁相處。

我o地到依家都未有再見,但有傾電話同SMS。其實我有掛住佢, 只係唔想佢知。

我好亂,唔知條路應該點行。對住C,我極其量只會係佢其中一個女朋友,甚至係佢床上o既一件玩具。值得等o既係P,但我已經唔細,佢亦可能唔會再返o黎我身邊。

我應該點做?C 有鍾意我嗎?P 會返o黎嗎?我好無奈,所有o野我都無法控制,好被動。麻煩你幫我解開呢個困局啦,Many thanks!

M_lost



Dear M_lost

你和 P 是真愛,可是,分手時,他已決心放棄你。

要是你覺得你仍然很愛 P ,你可以主動上內地以朋友身份探望他,試探一下。

你說你在等 P 回頭,可是,他似乎無回頭蹟象,你白白浪費光陰,無人會可憐你。

至於 C ,擺明是玩遊戲的朋友,他有否真心喜歡你不是重點,重點是,你不過是他的玩伴之一,而你又玩不起。

你是需要真感情的女人,你都知道,你的出路是找一個真心建立關係的男人。你要做的正經事是,決心找一個真正男朋友。

你的前度無叫你等他;那個玩玩下的男人無叫你真心喜歡他。可是,你都做齊了,這就叫做一廂情願。

你的年齡已步向中女了,醒醒吧,別再表現得似一個迷迷惘惘的20 歲傻少女。

深雪覆