開戶口 – 覆淑慶

貽興︰

客氣說話不說了,有問題想請教。

喜歡玩、喜歡蒲、喜歡到處留情、自命風流的27 歲男子,會有停下來的時候嗎?

我和他認識、糾纏5 年,一直未有真正拍拖,起初是我拒絕,後來是他不願意。直到近年,我們愈見親密;他坦言,他在外國讀書的這一年,有很多很多有性無愛o既「女」,但如果要他認真拍拖的話,我是他心目中首個人選!


這次他從學成回來,他說會認真對我好,叫我給他一點時間。我很懷疑他根本信不過,但心底裡,我又暗暗希望我是那個守得到他回頭的人(很蠢吧?!)。

貽興,這樣的爛男人,是否完全不值我去等?請狠狠摑醒我吧!

淑慶



淑慶︰

如果我係男人,周圍咁多女仔,個個有性無愛,無拘無束,我點解要安定落o黎?

間間銀行都歡迎你自出自入,一行入去就有錢拎,比著你,你都唔會肯響是但一間度開戶口啦?

要呢種男人安定落o黎,除非佢突然遭逢大劫,價值觀完全扭轉(例如染上性病、前列腺癌,或者響蒲o個陣比鬼佬拖出後巷雞姦);或者佢褲襠裡面o個隻冇腳雀仔出o左事,年老不舉,否則,真係難過登天。

佢話你係佢咩心目中首選,其實已經好俾面你,大大個下台階俾你,你仲唔肯走?佢話佢從此專一愛你,唔攪三攪四,你都唔信啦o下話?乖得一時,抖夠咪又出去玩過?

冇錯,世界上每日都會有奇蹟發生,而奇蹟亦都會降臨響相信奇蹟
o既人身上,如你;但好可惜,與其等到人老珠黃先至或者有機會守得雲開,點解唔趁後生,仲有得揀o既時候揀個好o的o既人?

呢種奇蹟,多想無益。

祝 腳踏實地

貽興