男仔很忙 – 覆心煩的人

貽興︰

你好。睇到你幫咁多姊妹分析男士的諗法,真係好多謝你,亦希望你可以幫我分析我的個案。

我與前男友一齊已經4年啦。4年入面間中都會有唔開心,但通常好快他便會哄返我,好快就會無事,但原來佢有好多唔開心都只係放o係心入面,佢話怕我唔高興,所以一直都無同我講。

直到去年底,我o地因為好小的問題鬧翻了,但今次佢無再哄返我,而我可能已經習慣

了,所以我亦無主動找他。到過了一段時間,再聯絡時,他已經決定要同我分手了,佢話再一齊只會大家都唔開心。當時我真的受到很大的打擊,因為真係無諗過會係咁,所以亦好傻咁對住佢喊,亦講好多希望他會回心轉意的說話,但最終他都沒有。

到而家已經過了大半年啦,我的心仍然放唔低,每一日都好掛住他,但我又唔想煩他,怕令他討厭,所以一直都唔敢再搵他。直至兩個星期前,突然收到他的email,他send
了張惠妹的「如果你也聽說」給我,我在諗他是否也想念我,所以我send email 問他,為何send 呢首歌比我,係咪有特別意思,但他沒有回覆。

但兩日後,他又再send 了一個歌比我,呢一次係周杰倫的「藉口」,所以更加令我覺得他在想念我,但我又唔想只係我自己一廂情願咁諗,所以我又send
email 比他,希望他回覆是否有特別意思,但等了幾日他都沒有回覆,所以我又send SMS 及email 俾他,追問他是否有特別原因,希望他比一個答案我。唔知係咪我迫得太緊,最後他覆了我話,只係覺得首歌好聽,所以send
比我,仲話下次唔會。

究竟他突然send兩首歌給我,是否會有特別意思呢?之後我同佢講,我仲好掛住佢,而且我會一直默默咁等佢,但佢都無回覆我任何。

咁係咪代表我一定唔會有機會?係咪佢已經唔想再同我一齊,唔想再愛我呀?男人鍾唔鍾意聽到女人講好掛住佢,同會一直等佢呢?定係會覺得壓力太大反而行得更遠呢?

心煩的人



心煩的人︰

男生,是這樣的。

男生想起你,不代表仍然愛你,仍然愛你,也不代表想跟你重新開始。

也許有些東西讓他卻步,也許想起你以往的耍性子要人哄公主性格,覺得要命,覺得受不了,所以猶豫張望。

又或者,寄歌給你,不過是男人歉疚的補償行為。

都甚麼年代了,一起過的情人,再赤祼的地方也看過,再露骨的話也說過,還有甚麼不好開口的?仲玩憑歌寄意?你估係電車男追女,仲係未見過面那種嗎?

清醒一點吧,想像力別太豐富,不要一廂情願編故事。

人人非法download 的年代,有歌共享,你偏偏覺得對方憑歌寄意,實情可能是這一首歌,是某個女生forward 給他的,他給你之餘,同時又forward
給其他舊女友或者有意思的女生。

網絡世界的愛情,就是這一回事。

我也送你一首歌吧。

那首歌,叫《節外生枝》。謝安琪唱的。

祝 領悟﹙辛曉琪唱的,很好聽的歌﹚

貽興