忽冷忽熱 – 覆H.Y.

Dear 深雪小姐︰

你好,客氣說話不多說了。好喜歡你那一針見血的見解,希望你可以抽一點時間解答我的問題,十萬個thanks!

2007 年4 月4 日,公司幫Jenny 攪farewell party,我係其中一份子,當中有一個男仔係head quarter 的同事,叫傑,因為佢係Jenny叫出席,唔識我o地d同事,而Jenny 怕佢一個人悶,所以就叫我幫手陪佢。


我知道一個人冇人理係好慘,且朋友叫到我唔會「托手爭」,我都係一個好易同人傾偈的人,好快就同佢好似好熟咁,冇dead air。我同佢講我手短夾唔到(菜),佢會幫我夾,之後有個同事夾o左魚比我,因我唔食魚,佢二話不說一手將魚夾o左o黎食。知道我唔識打機,佢又教我打。我其實都驚會悶親佢,問有冇悶親佢,佢話冇,食完飯就各有各散。

因為工作上的關係,有時會與佢聯絡。有次,佢咳得好勁,叫佢去睇醫生,佢話放工去(我當時覺得佢敷衍我)。o個晚問佢有冇睇醫生,佢話因為我叫佢所以有睇醫生,我話咁我冇叫呢,佢話冇叫就唔理,有病會自己好返。

4月22日係我daddy 生日,我諗o左好耐都唔知買咩給佢好,於是我打給傑問意見(我4月15日問)。4月16日,傑冇返工,原來佢病了。佢同我講諗o左買甚麼禮物,我問佢幾時有空,佢話4月19日(o個日係我放假)。我一心以為佢放工陪我買。4月17日,佢打電話問我公事,我詫異點解病都返工呢?一問之下,個答案係話專登request 4月19日放假,所以病都返工,我愕然?

4月19日,佢打電話問我住邊,諗住載我出去買禮物,不過佢唔識o黎,我話我自己乘巴士就行了,大家就相約在旺角等。我打電話話到了旺角,佢叫我自己行一陣先,因為佢同佢daddy一齊。冇幾耐佢打比我,我聽佢把聲好似好緊張,我問佢做咩事,佢話有少少緊張?之後就車我去食lunch,其間佢的電話多次響起,我聽到係佢daddy 打比佢,不過唔知咩事。

食完就去買禮物,o係店入面個sales 姐姐一時口快快話「不如男朋友都比d意見啦」,我唔好意思咁講o左話「唔係呀」,跟住佢好細聲咁話「我都想係」(不過我唔知有冇聽錯)。

佢本來話係送我返屋企,買完同我講話唔可以了,因為佢侄女發燒要睇醫生。我問佢做咩有事唔同我講,佢話一早答應陪我買禮物,我聽到個心好唔安樂,一上巴士d眼淚係咁流下來。

有次我打比佢,佢冇聽。之後佢打比我,因為我飛線回家,所以聽電話o個個係我daddy。佢話搵我,咁我o係房訓覺,daddy就比個電話我聽。我一接電話,佢就叫我做「肥豬」,我問佢做咩咁叫我,佢話我daddy叫我做「肥豬」,但我daddy係唔會咁叫我的,我問我daddy 係咪有咁o既事,佢話冇,我問傑係咪佢自己老作,佢死都話冇,佢仲要覺得叫呢個名叫得好順口。

5月7日,因為工作上而發生齟齬,但其實我係冇嬲佢,我知道係大家誤會o左大家意思先至會咁。5月8日,佢一朝早打電話比我,同我say sorry,我愕然,大家只係同事,使唔使咁驚我嬲呀?

5月9日,我send o左個e-mail 比佢,其實係工作上的事,但內容就以玩的形式send。之後佢打電話話我做乜要咁樣send,佢話如果比其他同事見到會唔好睇,我好嬲,我唔開心。

5月10日,佢一早send e-mail say sorry,我睇o左之後唔理佢,因為我仲係好鬼嬲。佢下午打電話比我,問我係咪仲嬲佢,又say sorry,佢解釋佢唔係有心咁樣同我講野,知道語氣重o左,同我講做野還做野,唔好玩。我其實都仲有少少嬲,後尾我覺得佢say sorry,我都應該要大方D,於是我打返比佢,話佢知我冇嬲佢, 我亦都知道我係唔應該咁樣玩,因為被其他同事見到實不太好,會影響工作。

深雪小姐,我真係唔知佢想點。一時好似好好,一時又要鬧人,點解好似仲難捉摸過d女孩子咁?佢係咪對我有意思?定係對我係普通朋友?兄妹?抑或其他?

萬二分感激。Thank you very much!

H.Y.



Dear H.Y.︰

他當然是對你有好感。

但是,許多男人追求女人時,都不是一條直路衝衝衝,而是,觀察一陣子,又熱情一、兩天,繼而又再觀察。

這代表,若然他真的拍拖的話,他會很認真。於是,在揀定前,他非常小心。

你的態度讓他停止追求,轉而詳細觀察。那麼,你就要在此期間盡量表現可人、正常、無攻擊性。

許多時,男人會忽然完全收兵,原因可能是,女人受不住男人的忽冷忽熱,於是發癲發脾氣。聰明的女人在這種階段會表現得冷靜溫和,不在乎這個男人的忽冷忽熱。

你要抱著這個心態:他繼續追你的話,那麼很好;他停止追求的話,也無所謂,事關,你總有其他人追。

你懂得這樣想,他反而想追下去。

女人必需保持心態冷靜,你想想,就算你們已拍拖了,男人也會繼續忽冷忽熱啊!現在你已處理不到,將來怎拍拖?



深雪覆