還愛我嗎 – 覆雪

Dear 深雪︰

我同我男朋友拍左拖 4 年啦,有時都會鬧交,但係第日就會冇事,成日都會今日分手,聽日好返咁。有時係我「 tum 」佢,有時係佢「 tum 」我咁啦。

1 年前我男友去左讀書,唔可以成日見,一日大約只可以講五分鐘電話,一個星期先見到一次,開頭咁樣,反而感情好再(了),可能大家真(珍)惜相見的時間,唔想鬧交!

後來我知道佢識左一個女仔,佢日日都同個女仔 send SMS 、傾電話,我問佢,佢話只係朋友,但係佢 send SMS 、打電話比個女仔多過我,我喊過、鬧過,佢都話冇野。

直到上一次鬧交,佢話要分開下,之後,我「 tum 」佢的時候,佢話比多 d 時間佢,因為有個女仔對佢好好(就係同佢成日 send SMS 果個),但係佢話佢冇鍾意佢,佢想攪清楚先再同我一齊,唔想同我一齊的時候,個女仔打比佢,我又嬲佢。

之後又過左幾日,我再打比佢,佢話佢都好鍾意我,但係佢對個女仔有好感,佢仲想同返我一齊,仲好鍾意我,問我肯唔肯,我話肯。但我問佢,佢會唔會為左我,唔搵個女仔,佢話會。

之後我地雖然一齊返,但係每一次都係我打比佢,就算佢應成(承)打比我,最後都係冇做到。佢甚至一個 SMS 都冇 send 過比我,成日打比佢,佢都話一陣打比我,等左 1 個鐘之後,佢打黎唔係講要出去,就係訓啦!甚至等到我訓著左,都冇打返比我。

每一次出去,都係我約佢;同佢講電話,佢又句句傅顯(敷衍)我,唔係「唔知呀」就係「自己估啦」 ?

之後我睇佢電話同電腦,我發現左幾張個女仔張相,又發現佢地都係日日 send SMS 、傾電話、傾 msm ( MSN )。我問佢,做咩電話有個女仔張相,佢即刻搶返部電話,叫我唔好攪。我問過佢,佢同個女仔做過咩,佢話食過飯、行過街,但之後我再問,佢又話冇行過街,只係激我。

終於,我有日我忍唔到,叫佢唔好再玩我,唔鍾意我就出聲,佢話佢仲鍾意我,但係唔知點解會咁對我,可能佢仲細(佢都廿幾啦)。

我話,其實係因為佢鍾意左第二個。佢話,佢同個女仔唔可以用鍾意去形容,佢係覺得個女仔比到新鮮感佢,但以前依家都只係鐘(鍾)意我一個。

到在依家又過左 1 個月啦,佢變得會主動打返比我,又成日買野送比我,對我都幾好咁啦!但係我都仲會 cheak ( check )佢電話、睇佢 d SMS ,我都仲有見佢同個女仔 send SMS 同講電話,不過冇以前咁密,但有時會發現佢刻意洗左 d 記錄。

有日佢話我知,佢同事問佢,會唔會同果個女仔一齊,佢話佢答個同事唔會,因為我有左佢 BB ,但其實我根本冇 BB ,只係佢自己作出 o 黎呃個同事。

我有問過佢,點解唔直接答你唔鐘(鍾)意個女仔,或者係因為好鐘(鍾)意我,但係佢冇答我。

其實我依家對佢講 o 既野、做 o 既事,都係得七成相信佢。我真係唔知道其實佢係唔係真係鍾意我,定係,佢 o 係到玩我?

唔好意思,好似好大篇野咁,不過真係好希望你會覆我。不過我都知你好忙架啦!




Dear

這個男人超級有問題,我建議你揮慧劍斬情絲。

他不承認自己愛你,又不承認自己愛另一個,然而,他兩個都 keep ,而且,兩個都傷害。

這種男人,不會給你幸福。

承認自己愛你,是關係最基本的,要是他不肯承認,而你又心知他已不愛你,那麼,還是算了吧!

他有外遇、對你不夠好、無放你在眼內、不承認真心喜歡你?看來,你們的關係已再無可戀。

下一步,就變成你單方面的單戀。

不相愛的關係,你怎能再死忍?



深雪覆