放不開 – 覆Elys

Dear Zita︰


一直有睇開你的專欄,好欣賞你的處事作風,男女間的感情更是拿(捏)得恰到好處。所以,直覺告訴我,你定能為我解開心結。

我同佢係大學同學,一直都只係點頭朋友。但,自去年 9 月,我地的關係發展得好快,短短 3 個月,我地雖然唔係情侶,但絕對說得上是密友。

因為今年係我地 last year ,而我倆都想升讀 master ,於是我就提議一齊去 library 溫書。(因為我唔鍾意一個人去溫書,可以話我要人

迫先會去。)而佢那時因為比女朋友日日打電話煩住佢,於是佢就答應一齊去溫書(咁就可以大條道理唔傾電話)。雖然已經日夕相對,但每晚我倆都必定 MSN 到凌晨 2 點,每次亦係佢主動 say hi 先。那時佢話想 sem break 去一個長途旅行,又話依家唔玩怕下年要做野就無得玩。我就話我都想去,不過無錢去,佢就二話不說借差不多二萬蚊比我,叫我一齊去(佢唔係咩有錢大少,只係一個屋村仔)。成個 trip 都係佢 plan , plan 的時候亦有問我意見,但因為我懶,所以就叫佢 plan 晒佢。佢 plan 得好辛苦,又要 book 平酒店,又要搵平機票,中間雖有微言,最後佢都搞掂晒。

日久生情,我漸漸愛上佢。我對佢好好,可以話咩都以佢為先,就連成績亦因為佢而直線下滑。因為我地成日一齊,同學都開始討論我地的關係。有一晚我於 MSN 同佢講我鍾意左佢,我話我知你有女朋友,我只係想你知我鍾意你,唔講出黎我唔舒服。第 2 日返學,大家都當無事發生過一樣,繼續維持曖昧關係。我知佢都鍾意我,不過大男人主義作祟,又因為佢有女朋友,所以一直都無講出口。考試前的 study period 本來唔洗返學,佢都照約我返去溫書,仲打電話叫我起身,同一早返去搵埋位等我。有一日溫溫下書,佢搶左我 d 野,我想搶返轉頭時佢突然「咩」(揹)起我。

考完試我地就一齊去旅行。相見好同住難,有時佢都會發我脾氣,不過都係我唔好先,成日掛住 shopping 要佢等好耐。更有一次佢為左好小事鬧我,不過佢算係咁,好多時只會黑面 or 發自己脾氣,事後我最鍾意扮無野 say sorry ,一 say sorry 佢就會好快嬲完,其實好易「 tum 」。為左慳錢,有幾日我地 book 左單人房住,雖然睡同一張床,但佢無亂來。每當佢怕自己把持唔住的時候佢就會拿女朋友之前寫比佢封信出黎睇提醒自己。其實唔知點解,佢同佢女朋友拍左 2 年半都從未有過性關係,所以 book 房的時候 book 單人房我一 d 都唔擔心。

唔知係唔係佢覺得自己對唔住個女朋友,佢買左好多手信比佢,不過佢買時次次都話買比 mummy ,但女人的直覺話我知佢係買比女朋友。返到香港佢無之前對我咁好,亦唔會次次上 MSN 都 hi 我,可能佢發現我唔夠佢女朋友咁好,咁小女人啦。不過好記得佢同我講過呢番話,佢話佢開始明點解男人玩完識返屋企就得。聽完呢句我已經知我無機會,當時個心已經唔識灰,甚至欲哭無淚。

後來我屋企部電腦壞左,迫不得意叫佢幫我整。整到夜晚先整好,我專登關晒所有燈然後攬住佢,當時佢被我嚇怕了,不停問我「你想點」。我話我想你做我男朋友,佢深呼吸左一下,然後答我「我已經有女朋友」。我知係我強求緊,但當時我攬得佢好緊係咁喊,佢無出聲只係不停拍我背脊安慰我。後來我叫佢走,佢唔肯走,要再陪多我一陣,當我情緒平伏返 d 我好平靜咁同佢講「夜啦,你走啦」,今次佢放底包 tissue 就離開啦。之後佢次次上 MSN 都唔會同我 say hi ,而我亦少左上網,每日見到佢就如陌路人一樣,關係 180 度改變。好快我就知自己根本放唔底佢,仲好在乎佢,於是想盡辦法先挽回大家的好朋友關係。

依家我只可以叫自己放開 d ,佢亦知道我仲鍾意佢。其實我行到呢一步可以做的就係等,等佢女朋友同佢分手。雖然佢成日話佢已經唔鍾意佢女朋友,但因為唔想 hurt 到個女仔,所以佢一定唔會做衰人。某程度上我亦唔介意去等,因為我太鍾意呢個人。但可惜的係,因為我 sem A 太投入,影響左成績,唔能夠於香港讀 master ;決定左去澳洲繼續學業,最少會去 2 年,呢 2 年我亦唔打算返港。為左佢其實我唔想去,因為我知離開香港等於選擇棄權,就算留在香港我唔知要等到幾時;愛情同麵包都係女人一生追求的,真係好難揀。你教我可以點做?

這信有點長,希望你別介意。最後,祝你生活愉快。

Elys




Dear

Elys

你已經盡了力,他也全盤接收到,而且,他也決定了不揀你。

你為他付出了勇氣,然後又犧牲了成績。如果我是你,我會作出賽後檢討,我會一邊等一邊投資到自己和其他可能性之上。

無理由再勁量投資到一隻回報甚低、甚至無回報的股票上吧!

我知你好鍾意他,但若然你再做多餘的事,他就會怕了你。

女追男這種事,你已做到最盡。

留點空間給他追回你,好嗎?

我贊成你去外地讀書,到時海闊天空,說不定有奇蹟。

容許我告訴你一回事:愛情,單靠毅力不能成功。愛情,有一種微妙的命運性。

所以嘛,別太強求。



深雪覆