他的女同事 – 覆Raspberry 

Dear Zita︰


你好!我想問你,其實你覺得男同女之間有無純友誼呢?

我有一個要好男友,同佢拍拖己經 3 年了。呢 3 年間我同佢發生過好多大大小小問題,到現在大家感情都好好,除左佢的脾氣比較大,有時會粗聲粗氣對我,又比較情緒化外,佢都算對我好好,都好照顧我,而佢呢 d 缺點我都接受到,所以問題都不大。

但問題係,男友做左份工差唔多 2 年,佢同一個大過佢 2 年既女同事好傾得埋,佢地已經成

日成班同事去玩、去唱 K 、仲會玩通頂,如果係成班人的話,我一向都由得佢,唔會催佢返屋企,佢玩 o 個陣唔會搵佢,佢鐘(鍾)意幾點返屋企就幾點返屋企。

但係之前試過佢地真係太 close ,乜都傾乜都講,有時男友仲會 o 係我面前講個女仔 d 野,所以我都已經同佢講過我唔鐘(鍾)意佢地太 close !

但前幾日男友同我講,佢要幫那位女同事安裝電腦上 o 既野,仲要上個女仔屋企幫佢裝,我已經即時話唔好。上次個女仔已經叫過我男友幫佢買電腦野,今次係第二次了,雖然我男友買呢 d 電腦用品係有折頭,叫佢買都唔出奇,但係叫埋我男友上佢屋企整,我就真係覺得不太好,我會諗個女仔得我男友一個朋友咩?點解明知我男友係有女朋友都成日要咁做呢?仲要我男友上佢屋企幫佢裝,點解唔會避忌下呢?我同男友講,我話我一早已經講左唔鐘(鍾)意佢同個女仔咁 close ,點解依家仲要話上人地屋企幫人裝機?佢仲要唔係問我好唔好,佢係答應左人,跟住先 o 黎通知我!我好唔開心。

男友同我講,佢同個女仔只係傾得埋既朋友,事實係佢地之間乜都無,個女仔因為無男朋友,而佢知我男友識整,買電腦野又平,所以先叫我男友幫手,男友仲話之前個女仔都有叫另一個有女朋友 o 既男同事上佢屋企幫佢整電腦,所以個女仔唔係只係搵我男友一個!咁事實我自己都眼見男友放假同我一齊 o 既時候,係無乜電話搵佢,放假真係唔會同同事聯絡!雖然最後話如果我唔鐘(鍾)意就唔去啦,不過佢覺得我唔信任佢!

我聽到呢句覺得好唔開心。我男友根本都唔明白,佢依然都係覺得佢上一個女仔屋企係無問題,反而我唔鐘(鍾)意係我問題!我覺得呢個係尊重 o 既問題,佢明知我係唔鐘意,我係會呷醋 o 架 o 麻,點解佢都仲要咁做?

好多朋友提議不如我跟埋去男友同同事 o 既 gathering 啦。但係我同男友一早有共識,我地係已經認識大家 o 既朋友同家人,但係就唔認識大家 o 既同事。我自己覺得我同男友所做 o 既行業不同,我跟埋去,大家 o 既話題唔同,比較尷尬,而男友亦覺得想有自己 o 既私人空間,佢覺得無特別需要去認識另一半身邊 o 既每一個人,呢點我都認同,而我亦都唔想強逼男友帶我認識佢班同事!

但係我真係好膽(擔)心,佢地每日都見面,有時放工仲要 gathering ,但係我同男友一星期只係見兩次,男友情緒又比較飄忽,有時會好緊張我,事事都好照顧我,好似我剛剛搬屋自己住,佢就個個星期放假都用晒整天時間幫我裝修、整電器、接駁電視電腦、幫我清潔地方,又會提點我睡覺時、離開屋企時要鎖門窗,事事小心;但另一方面,當見不到他的時候,我又會感覺不到他對我的愛。他在電話中會比較冷淡,閒聊數句後便說要收線睡覺(佢係非常之愛睡覺 o 既人),所以有時令我無所適從,又很怕佢同女同事之間會唔會有咩野。我都知自己係過份緊張,男友唔鐘(鍾)意人管,成日鐘(鍾)意自己一個人,我都知自己成日咁緊張,會令佢覺得好大壓力好煩,但係好多時,我自己又控制不了,因為過去的傷痛經驗,令到我疑心好大!

希望你可以對我同男友呢段關係俾 d 意見我!我應該以咩態度 o 黎對佢,先令大家都開心呢?我又點樣可以提防到第三者呢?我又唔可以叫男朋友轉工!

謝謝!

Raspberry



Dear

Raspberry

你是女朋友,當然有權叫他不要和女同事太親密啦!那個女人可以有任何觀音兵,但就不可以是你的男朋友。

無理由,讓你的男朋友去服務她的嘛!

你要很嚴重地讓男朋友明白你的擔憂,你哭又好、病又好,總之,用苦肉計來讓他明白,你是個害怕失去他的弱質女子。

你一定不可以讓那個女同事有機可乘。我就覺得那個女人對你的男朋友虎視眈眈,就算不想他做正式男朋友,也想搞破壞。

你也最好參與多些男朋友的社交活動。不要理會甚麼共識了,打扙要緊。

女朋友有責任守住自己的男朋友,知不知道?



深雪覆