前男友與性 – 覆KK

Zita︰


你好!我有問題想問,希望你可以給我一些意見。

我有一個大我 6 年的男朋友行左一年多,我覺得大家都好夾,都對我好好,佢因為工作關係成日都會唔夠訓,成日都話好倦好眼訓,話唔想做,其實佢一開始拍拖時都唔會係咁,就算收好夜都會有,仲會好主動,依家就一定唔會。

最近我同一個以前的男朋友發生左關係,佢本身都已經有一個好好的女朋友,但我同佢並唔係拍拖或者成日會搵,只係成班朋友出黎先會見到,其實我同佢的關係好奇怪,我以前同佢一齊過幾次,之前都已經有發生過關係,真正係拍拖 3 次(都係好少時間),但有曖昧關係就有成十幾次,好多時好想一齊時,時間都唔係好o岩,再加上佢同我性格一 D 都唔夾,我好鍾意成日管住個 bf ,一覺得唔知個 bf 諗乜我就會同佢散,佢就勁鍾意玩,勁唔鍾意同人講心事,好似好難觸摸到咁,所以要我真正同佢拍拖我自己就會好辛苦,我兩三年前已經清楚呢樣野,所我都無諗過會同佢再有 D 甚麼。但係未發生關係之前,我有時會諗同佢有 D 咁 o 既關係(但係無諗過話同第二個以前男朋友)。終於發生左啦!事前事後都覺得好正常,無怕羞或者唔自然感覺。好奇怪我唔覺得自己對唔住我男朋友(都有小小,但唔多),但係我仲好愛我依家個 bf ,我都好緊張佢,亦都無諗過或者衝動同返以前個 bf 一齊,或者柝(拆)散佢同佢依家個 gf ,我都唔知自己幾時會變成咁,我仲覺得咁 o 既關係 OK 喎!

你覺得呢段關係係點?我好想繼續呢段關係,但係咪好唔應該呢?我係咪鍾意我以前個 bf 呢?謝謝!

KK



Dear

KK︰

你知道你和現在的男友才是一對,只是,你個人比較性開放,亦有把性和愛分開的能力。

如果,你覺得長此下去都舒適,就繼續吧,生命是你的,你有權作出任何決定。也請別後悔、怨自己,你要肯定,你所做的事是對的,而且,你做完後會覺得開心。

我們都明白忠心的美麗,但又有許多時候,我們無法忠心。

都是這一句啦,到你覺得現任男友洞悉你的不忠時,你自然就會收手,亦會忽然明白,你真的很愛他,以後也不會再不忠。

不過,我想告訴你,純粹的性關係會隨時日漸漸變得不純粹,很快,你和你的前度男友會複雜起來。那時候,就會有更新的問題。

很少性伴侶是單純的性愛伙伴。當然,如果你能把關係約束為單純的性,就一家便宜兩家著。



深雪覆