網上情緣 – 覆Apple

Dear Zita ︰


妳好 ! 一年前我係 ICQ 到識了一個男仔,他生長於一個家境富裕的人,早於 10 年前已移民到加拿大。他於 2000 年回港打理他爸爸的業務,他是一個條件不錯的男仔。

初相識的 8 個月我們都傾得幾密同好開心, 大家都好似好有好感,不知不覺間我已經喜歡了他。雖然每次的談話都是好普通的事情,例如︰工作、娛樂等,每晚我都好期待佢係 ICQ 的出現。我們相識大約 2 個月到就互相交換了相片及電話, 但係他好少打電話比我,間唔中

先會有一次,多數都係網上傾計。他的工作非常之忙,平時收工後他就會回家,只是星期六及日就會同朋友去玩。佢曾經同我講過好多次找一天出來大家見面,試過一次係我們初相識時有一晚他約我出去,但係由於我害怕及他亦是我第一個係網上面認識的人,所以我拒絕了他,原因係太夜下次先至出來見面。之後佢都有係電話及網上說搵一日約我出來見面,而佢亦係網上說佢係認真的,但每一次佢都冇說明係幾時。其實我知道佢逢六、日都會有空,而佢亦都知我也得閒,但至今佢依然都冇約我。其實,就算係朋友都可以出來見面!

雖然我們成日都係網上聯絡,唔知點解我覺得我們好似沒有甚麼話題。佢從來都沒有問過我的家庭背景,而我當然亦都唔敢問他,可能係因為大家出生背景不同。 我只係一個平凡又冇學歷及出生一個好普通的家庭,所以有時大家都唔知應該講些甚麼!我曾問他除了我之外還有沒有與其他女仔傾 ICQ ,他說只得我一個,他還說佢沒有咁多時間去識其他女仔,有時係網上的談話我覺得佢對我好似有些意思,但我當然唔敢有所表示。

雖然我們一直以來都係憑電話及網上聯絡,但我覺得佢的條件好好,可以話係我心目中的理想對象,但可惜我們除了出生背景不同之外最重要係我於兩年前因自己胡亂揮霍金錢而導致申請破產,我根本唔敢面對佢我有呢個咁大的缺點,所以我一直都唔敢作出主動,再加上我知道佢有一個拍拖多年的女朋友(她在加拿大),我驚佢係因為一時的寂寞而對我產生好感,但他從來都唔提及佢女朋友,有時我問他女朋友的事,他都好似不想回答,他曾對我說佢女朋友事業是排在第一位,而佢係佢女朋友心目中都唔知係排第幾位,所以他說他們好少聯絡,但我知道他每年都有回加拿大的。

但係到了 9 月起佢開始好少與我聯絡,可能因為佢太忙所以冇 online 亦都冇打電話比我,不過係 10 月初他於 ICQ 同我傾過一次,因當日他的加拿大護照簽證到期,而且佢打算於 10 月回加拿大(他生日是 10 月 10 日),我問他是否返加拿大探女朋友,及問他佢女朋友知道佢回去是否肯開心,但他說只是回去打理自己間屋就沒有答我佢女朋友的反應,我係網上問他何時出來見面,他依然答我搵一日得閒先,他還說可惜我們住得太遠(句說話之前在網上也講過),我真係好唔明佢成日話約我,但係佢又謙(嫌)遠?況且佢又有車的,其實如果佢真係對我有意思,點解佢又咁講呢?所以我一直都唔明白佢點諗。我還在網上問他有冇發覺我們係網上好似沒有甚麼話題,我話可能因為大家唔同興趣,及有時我問他的問題佢都唔係咁想答,佢答我話唔覺亦都話冇問題,我問佢甚麼佢都會答我,他說因他不是一個太識及鍾意說話的人,所以先令我有呢種錯誤的感覺(當時佢係電話答我呢個問題,因他的電腦突然斷線,所以他打電話比我)。臨收線時佢同我講如有甚麼事就打電話比佢,係個一刻覺得佢好似好緊張我對佢的感覺,個次之後就成個月先再次係 ICQ 見到佢,我問他何時回加拿大,但他答我未知因而家工作好忙可能要遲些再決定,個次亦係我同佢提及過我剛剛過了生日,但他只對我說了一聲「生日快樂」就算了!之後我們就沒有再聯絡過了!我唔知係咪因為我之前同佢講過覺得我們好似沒有甚麼話題,因而令到佢誤會我唔想同佢傾計,又或者我諗可能佢已經回過加拿大探佢女朋友,他們咁耐冇見感情可能增進返好多,所以佢就冇再找我了!

直到 2004 年的大除夕,我留了一個訊息給他,因我怕他不知會否到了發生災難的國家旅行,因為他肯喜歡潛水,但我又怕打電話給他,所以我便傳了一個訊息給他,但當晚他沒有回覆我,直至第二朝早他才回訊息給我。過了一個鐘頭佢竟然打電話比我(當時我還在睡覺),他說不知昨晚我留給他的訊息是誰,後來才知道,佢還問我是否轉了電話號碼(當然我沒有轉電話號碼)。當時我可能因為還在夢中所以都唔係好識答佢,我們傾了一陣就掛線了,真係好意外佢打電話比我,雖然聽到佢話唔知邊個傳訊息比佢有些唔開心,不過我都安心至少知道佢冇事,之後我們就再冇聯絡了。

我真係好傻,我曾同我的好朋友提過呢件事,而她都覺得佢好似對我有些意思,但可能因為其他問題而影響到佢唔可以再行前一步,又或者一直以來只係我自己單方面的諗法,其實他根本就對我冇意思。我諗佢可能係因一時的寂寞而找人解悶,其實以佢的條件根本唔需要係網上識女仔,況且大家相差實在太遠!已經相識一年啦,估唔到我們竟然冇見過面,上次我還和他說笑唔通要等到出年先有機會見面,他還答我當然唔會啦,結果我們始於都係冇見過面,可能係以後都唔會有呢個機會,真係覺得有些可惜!

Zita ,我今年已經 36 歲啦,係一個屬於爽朗的女仔,已經有 13 年冇拍拖,其實好多朋友都覺得我性格及外型都唔係一個難識男朋友的女仔,只係覺得我係要求高,所以呢 10 幾年一直都遇不到適合的男仔。其實,一個咁耐冇拍拖的女仔,再加上年紀已超過 30 歲而仲未有拍拖,會否令人覺得我係一個有問題的女仔呢?

最後有個問題好想妳能為我解答,係關於我提及過我已申請破產一事,我想知道男仔是否會介意我呢個問題?如果將來我有機會遇到個意中人,我應否對他說及應在何時對他說係最適合?還有,好想知道背景唔同係咪一個障礙呢?男人究竟會唔會介意女仔冇學識呢?

希望妳能為我一一解答。謝謝!

祝︰生活愉快

Apple


Dear Apple︰

首先,你自己已三番四次說明,你和他無話題,如此這般,你也該明白,你倆不是一對。


當初你上網,與他上網的目的都一樣:解悶。只不過,後來你對他有太不切實際的幻想。

我看不出他喜歡你,其實你都知道。他有女朋友,而且,他對你的事也不算關心。至於你,你喜歡他好條件,也因為太寂寞了,所以才落得如此下場。

他不關心你、不想與你一起、又有女友、又在網上識女仔 ? 其實,都幾差。

你就算不破產,他也不會理你。事實上,你破產不破產,都與他無關。你只是他用文字解悶的對象。

36 歲不是問題;但 36 歲還會為一個網友痴迷,才是問題。我建議你首先拓闊生活圈子,免得遲早出事。


深雪覆