塔羅牌占卜 – 覆Simple

親愛的深雪︰

我好鍾意去呢個網站睇其他人的愛情事,我覺得你的解答好中point,而家我有d問題想問下你,希望你可以抽少少時間出黎睇一睇啦!謝謝!

上個月我同d朋友去左試下塔羅塔(牌)占卜,我問了她我未來兩年的戀愛運會係點,佢話在三個月內會有一個男仔追我,而且佢會做得好明顯,但我會不滿意佢一d野,可是如果我同佢一齊,佢可以滿足到我無論是精神上和物質上的要求。我再問佢如果我不答應佢,我未來兩年又會點,佢話我只能繼續在情海浮沈?


最近真係有個男仔追我,佢各方面都ok,但我又找不到令我喜歡佢的原因,而且我心中又有另一個人,但這個人又不喜歡我?

萬一這個占卜真的這麼準,我明知這個追我的人一定我會令我幸福,但我現在真係完全找不到喜歡佢的原因,我可以點做?

其實我可以話未拍過拖,之前都有d男仔追過我,但我都沒有答應,不知點解每次到最後我都會「縮沙」,之前我都試過同一個男仔一齊,但拍左8日之後我就提出分手,我都唔知係我要求太高定係點,每一次都是「臨尾死」?

我今年已經二十歲了,比著係其他人,可能都會有點著急心思思想拍拖,其實我都好想拍的,但我又唔想為了拍拖而拍,之前果次都因為此而攪到個結局咁難看。

我現在就好似有個人同我講對面海有個仙境,叫我去相信,但要我自己游水過去,但問題係我不懂得游水。求求你教下我可以點做!謝謝!


Simple


Dear Simple︰

愛情最講求感覺。但我又認為,感覺這回事,可以慢慢建立。不如這樣吧,先做朋友,待有火花那一天才正式拍拖吧!

占卜這回事,信則成真,不信便當故事去理解好了,無謂放上心。

他又沒逼你一定要拍拖,大家有空見見面,多個朋友也很好呀!

只要你也不去逼自己,大家自然會相處得好。

而很多長久的情侶,也是由朋友做起的,半年後你再去占卜吧!看看神明有甚麼要對你說?

深雪覆