愛上有婦之夫 – 覆Silly


Dearest Zita︰

請你幫下我?可唔可以?我鍾意左一個有婦之夫?

我第一次見佢己(已)經有好感,可惜之後知道佢已結左婚,我就無想多餘的事。後來佢約我出去食飯,只係好似一般朋友交際,約過我出左幾次食飯,有日大家出去飲野,臨走佢同我講,成日搵我因為鍾意我,感覺舒服。我同佢講你已有太太點解會咁,佢話佢明白,當佢講笑。





之後大家都無再提,佢照樣搵我出去飲野,好似朋友咁,仲邀請我上去佢屋企坐。我曾懷疑佢對我有居心有目的,但事實上佢除左約我見面,講過一次約我見面因為鍾意我,佢就無做過任何事,我相信佢為人,但一個已婚的(拍拖半年結了3年)會容易喜歡上另外一個?其實我也鍾意佢,最近一兩次見面之後,我都覺得開心,好多時會掛念佢?

因為道德問題,我叫自己唔好,但大家都有keep
contact。最近一個月轉左新工,大家工作地點近左,我成日都好掛念佢。有一次我同佢見面後,我知道我真係鐘意佢,但因為過唔到自己那關,我唔可能主動搵佢,我好掛住佢,但我知道冇好結果,所以我經常都好唔開心。

佢同我講,佢廿幾歲時識左個佢太太一見鍾情,半年後閃電結婚。結婚大半年,大家因為相處問題,曾經分開,但後來因為不想後悔,大家妥協了,走返一齊,而且還買了樓。結婚的幾年內,佔有慾強的她嚴厲管束他,不容許男方與其他人(即使男性朋友)有接觸,而且情緒容易失控。一直以來,男方當然仍愛護女方,但女方的管束太緊,加上情緒容易失控,男方有時覺得辛苦,覺得合不來,一直避開會導致佢太太失控的事發生?

當然實際情況我唔知,我只感到佢同佢老婆有問題存在。佢太太管得佢好嚴,經常打tel比佢問佢係邊做緊咩,所以即使佢放假,佢約我出去,都唔可以見得耐。我地唔係偷情,我同佢只係朋友,只不過不知不覺咁鐘意佢。我有時好矛盾,佢帶我去佢屋企,但往往要係佢太太返黎(前)自己離開。我有d覺得對唔住自己,但我好鍾意佢,鍾意到捨不得拒絕佢,我知有問題,但我控制唔到,我希望佢都鐘(鍾)意我,佢話會成日諗起我,我想佢會係得閒時都搵我,我覺得自己唔可以抽離佢。

上星期終於出事啦。我始終把持不住,佢錫左我,我竟然好主張(動)錫同擁著佢,那一刻,我完全無諗過自己男友,係錫佢個時,我當左佢係我男朋友,好想擁有佢。之後佢都好清楚我都鐘(鍾)意佢,但錫完之後,大家都冇點樣承認大家的關係,佢會打比佢(我)(但要0係老婆唔0係屋企時),但我忍唔住,語氣變左對男友咁,我真係鍾意佢,我覺得很迷惘,明知愛上他的壓力很大,而且不會有結果,但奈何不能收回對男方的感覺,只有盡量壓抑;男方也因為有太太,他也不知如何是好。

自那一次,我真係愛上左佢,甚至同男友鬧翻了都在所不計(因為我個心100%鍾意左佢,唔想再同原本男友一齊)。幾日後佢老婆知道佢同一個女仔有close
contact,她很憤怒,情緒極度失控,打打罵罵,很不甘心被欺瞞,指責男方的不可靠。她逼男方去想解決方法,但她當然不甘心就此被撇下,打打罵罵佢老公之余(餘)仲打黎鬧我,我唔想個男人比老婆逼供,同佢老婆講我地只係好唔熟的朋友。

我每日都好擔心佢同老婆關係轉差而唔開心,驚佢有壓力,我好緊張佢有冇事。事隔幾日,他打給我,同我講他在她嚴厲管束的壓力下生活也覺得辛苦,但他對女方當然有感情,但已不能確定當日娶她時的那份愛意是否仍然存在,但婚已經結了,他仍然需要對他當日結婚作出的承諾負上責任。我聽得出,他不會跟她離婚。我很失落,真的很失落?

我真的很心痛男方要承受這般大的壓力,而且我真的很擔心將來不可以見到他,聽到他。我心底裡真的想他們離婚,但知道機會很低,日日在心底白白擔心他,因為這時候,根本無機會接觸他。我很辛苦。

又過幾日,終於等到佢再打黎,但原來佢打黎,叫我幫佢一個忙,同佢老婆交代我同佢關係點?我好驚,佢老婆問我同佢咩關係,那一刻我維護個男,我堅持我同佢講我地只係食過飯一兩次的好好普通朋友,仲叫佢老婆應該信任佢老公。佢同我講︰「我同佢無哂信任架啦,不過我好傷心囉。」收左線之後,我覺得好唔開心,我覺得被玩弄,個男對我好殘忍,明知我鍾意佢,但要我幫佢忙交代,同佢老婆講我地唔熟,我好傷心,之前日日夜夜擔心佢唔開心,原來到最後係叫我幫佢咁講,我覺得佢唔可信,亦覺得我好傻,我好後悔,我無同佢老婆一五一十講清楚,一拍兩散,我真係好唔開心。

過了幾日到了今天,我每日仍然盼望他打給我,日思夜想,很掛念他,但每一位朋友都叫我當發左場夢,回心轉意找返原本的男友算啦,不要太執著,但我控制唔到。我想返回之前,他太太永遠不知道,即使只可跟他偷偷一起,放棄現在男友我也心甘情願,但我真的害怕,他以後都不能/不會找我,我真的很辛苦。我知我會失去一切,男友會離開我,而他,我永遠都得唔到。我很辛苦,不能忘記他。

可唔可以?幫下我?


Silly


Dear Silly︰

明顯地,你愛上了一個懦夫。

他想有婚外情,但又驚惡老婆打罵;打你與他有些少關係了,他又要你向他老婆澄清。

窩囊男人之中,他都算坐亞望冠。

現在你明白為甚麼他會有一個惡老婆吧!換轉是你,嫁了一個窩囊廢老公,你都會變成河東獅。

他看上你,就因為你單純,覺得他有型威猛,十分男人味。這些感覺,他不會在家庭生活中找到。他的老婆只像監管畜牲那樣管治他。

真正的他是個怎樣的人,相信他老婆最清楚。無用、膽小、不肯承擔責任但又想去滾?就是他這種男人。

深雪覆