我跟他算甚麼? – 覆Rita

Zita︰

你好,我有問題想向你請教呢!

我係公事上識左個男仔,佢同我地公司好多時都有接觸,雖然唔會話成日見面,但係都會成日講電話。我係自己公司做左半年,工作上好多時都會搵佢幫手,佢亦教到我好多野,電話裡面我同佢講得上係熟,我上過佢公司幾次,但係見面時冇咁多野講。上

兩星期我生日,我地一班同事去食飯,我問佢去唔去,不過佢答我要開OT去唔到,咁我都冇所謂,因為我同佢只是朋友關係。

第二日佢一早打去我公司約我食lunch,其實我好驚,我冇諗到佢會主動約我,因為我地只係在電話裡面多野講,我怕出到去,大家都唔出聲,所以我諗住叫埋我D同事一齊去,不過果日佢地唔得閒,結果都係我同佢兩個去食。食飯既時候佢先打開話題,我同佢都傾得好開心,同時我對佢都有少少好感,不過我早知佢有女朋友,所以未有所行動。

到星期五我打去問佢公事,佢問我夜晚得唔得閒,佢約左佢既舊同事happy hour, 我考慮左一陣,我應承左佢話去,不過我要等佢開完OT先一齊去,差不多九點我同佢一齊搵佢既舊同事食飯,食飯時佢地傾得好開心,可能我比較陌生加上得我一個女仔,我冇點出聲,不過都有同佢既同事飲酒,食完飯後有幾個話想落蘭桂方再飲,咁我跟埋佢一齊去,我地一行五人,玩既時候佢有時都會搭我膊頭還會攬我腰,我抱住大家玩得開心既心態冇阻止佢,冇幾耐佢就飲醉左喇,咁我繼續同佢D朋友玩,我飲到自己醉左都唔知,佢地話係時候走我先醒,呢個時候我都未清醒,佢朋友叫佢送我走,我知道如果要我自己返屋企一定冇可能,但係我又住屯門好遠,佢又唔識路,我同佢上左車,佢帶左我去酒店休息,果時佢都好醉,我好快就訓左係床度,呢個時候佢同我講,佢話佢鐘意左我,佢攬住我,我都話左比佢知,我對佢都有好感,係呢個唔清醒既時候,我同佢發生左關係,之後佢問我有冇男朋友,我話冇,雖然我知佢有女朋友,但我問佢有冇女朋友,佢答我有,咁我再問佢,既然佢本身有女朋友點解跟我發生關係,佢答我話因為鐘意我,咁我問佢大家既關係係點,佢話男女朋友關係,但係佢而家都鐘意佢現時既女朋友,呢一刻我自己唔知點做,我本身唔係一個隨便既人,所以我唔想佢當冇件事發生,但係我又唔想佢一腳踏兩船,我知唔可以迫佢,但係我自己都唔知可以點做,我怕我會有BB,係唔安全既情況下發生關係,我只係十九歲,呢個時間我唔知點幫到自己,你可以教我嗎?

我公事上還會跟佢有好多接觸,怎辦才好呢?佢星期五還跟我說,佢公司請人,問我試唔試轉去佢公司度做,其實佢係咪真係鐘意我?定係只係想玩一夜情呢?麻煩你教我可以怎樣處理才恰當。謝謝你喔……

Rita


 



Dear Rita︰

就算他鍾意你,那種鍾意都是好單薄的,根本不入心。

可能將來他會好鍾意你,但這一刻我看不到。

你可以與他試一試,但為期半年之內一定要他決定,揀你抑或原本的女朋友。

你年輕,半年還花起,多過半年就無謂了。

深雪覆

advertisement