是我自己的問題 – 覆琪琪

Dear
Zita︰

你好,多謝你睇我封信。

我同男友分左手一個月,拍左8個月,分手係佢提出,到而家我都唔係太明點解,佢話我成日管佢。

佢本身細我一年,開始拍拖果時, 我地大家都係學生,我同佢都係無用屋企錢,自己找生活費,佢近呢幾個月

無野做,而佢本身無咩錢,所以我地出街食飯我幫佢出埋,平時我有買野比佢,見佢有用咪買囉,初初我都無咩感覺,不過後來我都有小小矛盾……回想番,我既付出好似比佢多……但佢對我都有付出既,唔係物質,我以前好鐘(鍾)意發脾氣呀,佢頭果幾個月都有理我,後幾個月就無!之後我都無再發脾氣啦!佢平時唔鐘(鍾)意講電話呀,我咪打比佢囉,唉,9成都係我電佢呀,打比佢咪問埋佢係邊囉,或者係咁,佢就覺得我管同煩佢,但我都唔知可以有咩講……但唔打又好似無咩聯絡咁,佢本身係個唔多出聲既人,打比佢,佢都無咩講。同佢去完街,佢好小(少)會送我返家,10次都未必有1次!最初係我叫佢唔洗送,因為大家住得唔近,我唔想佢太夜返家,後來,佢就真係好夜都唔送我啦……

呢幾個月,大家都畢業,佢就立即找工。佢找到工之後,成日都好累(除左返工,佢仲有好多野做),可能佢唔習慣啦,但我地都要見面(可能以前日日見,畢左業,我唔慣),我咪叫佢出街,就係咁佢就話「你令我無私人時間」!又話我點解覺得要日日見至叫好(事實係一星期2/3次),佢話我地都未有成個月無見……電話又唔講,見面又唔見,我連信都寫過比佢啦,不過佢無時間回!佢話分手果時,我仲同佢講「我唔想分手」,跟住我地傾左好耐,途中佢有講過不如我地一齊改,但果時我又唔接受……之後果星期,我搵番佢,同佢講我好掛住佢,後來出過一次街(係我叫左佢好多次佢至出),佢連手都無拖我,我以為佢仲想休息多陣!不過都(到)而家,我地真係分手啦,因為有次大家同學出街,有些同學問佢我地而家點,佢回答人地我地分左手,果時我至知我地原來分左手…...

我唔知我有咩做錯?我只想下次唔再犯同一樣既錯……其實我係咪做得唔好?唔識做人女朋友?天意弄人,佢遲些會搬去我隔離屋住,我要點做至好?同佢做番朋友,我又覺得佢對我唔住,我自己都唔知……

請教教我,多謝!

琪琪




Dear 琪琪︰

唔,你們的問題是,你愛他,而他不愛你之餘,更嫌你煩。

一男一女,我看,還是男人主動似樣一點。你平日不停致電他,不停要他愛你多一點,他不愛就是不愛,最後,更覺得你好煩。

我的建議是,下一次,再拍拖,你不要太著緊,讓男人致電給你,有街就去,無街去就算。當他想丟淡你,尤得他好了,你不用太稀罕。愛情,雙行線的嘛!

他沒有對你不住,他只是不愛你。你做人不要太執著。

深雪覆