他是甚麼心態 – 覆My

Zita
:

我於現在的呢間公司度做左大概8個月,我同佢(佢係我的男同事)起初的時候係冇乜點談話的,就算於公司遇到,都係打個招呼又或者笑下就算。而佢細過我6年,直到今年年頭我因為同我的男朋友分手所以返工那時,個人好低落,有時見到同事都唔識得打招呼。


有一日,佢趁我一個人係休息室飲茶的時候走來問我發生了甚麼事,咁我就好坦白咁同佢講我同我男朋友分了手,至(自)個次之後,佢就成日有意無意咁搵我傾計又或者打電話俾我。直至有一個星期六,我同佢都要返公司OT,而我因為遲了,所以沒有進食。而佢又要出去食飯,我就叫佢順便幫我買個飯盒。由於佢有事,所以遲了返來(大概2個鐘頭後先至返來),攪到我餓到胃痛。佢知道後,好緊張咁走來我的位,問我食了藥未,要唔要休息下,仲一直講對唔住,因為佢唔知道我係有胃病的。那次之後,我開始對佢有些少好感。而呢次之後,我地感情好了好多……佢亦坦白咁同我講佢喜歡我。


兩個禮拜之後,我又有機會同佢一齊OT,當我做完我的工作之後,我就同佢講聲我走先。而佢聽到之後就顯得好唔開心,跟住就同我講,好希望我留低陪下佢。我同佢講我的工作已經做完,留低的話就沒事做啦。佢就叫我坐係佢的位徬(旁)邊,開收音機聽歌又或者睇雜誌又好,只要我在身邊陪佢就得了。但係由於佢附近仲有一兩個同事,所以我覺得冇咁方便。我就叫佢去我位度坐(因為我的位附近係冇乜人經過的)。就咁……我地度過一個好愉快的下午。

之後,我地就一直維持這樣「特別」關係。雖然我地冇做過任何太過親密的行為,但係佢都有攬過我,抱過我同埋吻過我的額頭。那時我地的感情好好,可以晚上傾電話傾成三個鐘頭。而每次我胃痛那時,佢都會買胃藥俾我食。佢亦都試過於凌晨十二點於我屋企樓下等我,目的就係想見下我。

直至前兩個禮拜,佢一直問我於返工的路上有冇遇到一個「點點點」(佢形容俾我聽)的女仔,問我問了好多次,問到我好煩,好困擾。我就追問佢點解要問一個唔相識的人。佢就同我講佢有些鍾意呢個成日於返工路上遇到的一個女仔,而且仲發夢到佢!我聽完之後,真係好唔開心、好嬲。佢鍾意人可自己走上去識人啦,點解要問我?我邊度有可能知道佢講的女仔係邊個呢。但係,我冇鬧佢,亦都冇發脾氣,因為我唔係佢的女朋友。自那次之後,我就開始避開佢,佢行東,我就行西。一睇到佢於前面要入lift,我就企遠些等下部lift。因為我唔鍾意一個一時話鍾意你,但係一時又話鍾意第二個女仔的人。那時,佢就好鍾意得閒有事冇事都打來我的分線,借意問我這些,問我那些。其實佢問的都同我工作冇乜關係的,但係又偏偏要走來問我。而每次佢打來那時,我都以好冷淡的語氣回答佢。

到了上一個禮拜,我因為多工作要做,那些工作又好煩,所以返工那時都冇乜開心,成個人都無精打彩。佢睇到後,就SMS(send
message) 我問我最近發生甚麼事啦,點解精神咁差啦,有甚麼可以幫到我啦……唉!我對佢最好那時,佢就同我講鍾意第二個女仔,到我疏遠佢之後,又有事沒事咁借意搵我傾偈,
Zita,我真係唔知道佢究竟想點。佢這些究竟係甚麼心態?我現在到底應該點樣做先至好呢?


My


 



Dear My︰

他是個多情的人。他能對你很好,為人浪漫,但他亦能同時候對很多人如此。

並且,他不打算隱瞞他的多情。

如果,你在他告訴你喜歡了街上偶遇的女孩之後,你表現雀躍而天真的話,我相信,他反而會與你拍拖,事關他能從你的反應確定了你能完全接受他這種人。

但你只是正常女孩,想好好地拍一次拖。如此這般,你就當他是一名得意男同事好了,不要對他有任何幻想。

況且,你根本不是他那種程度。

深雪覆