advertisement

柏原太賀推介:《摩登小男人》

「Hi!我叫梁寛。」

柏原太賀推介:《摩登小男人》

如果當你聽到呢句對白,竟然唔知係來自鄭丹瑞飾演嘅經典角色的話,恭喜你!證明你可能好青春,又或者精神上可以自我滿足,而唔需要靠外來娛樂。

不過,就算你知定唔知,我都諗住喺呢段要盡量留喺屋企嘅時間,介紹你重溫呢輯差不多 30 年前播出,前無古人,暫時後無來者嘅電視劇經典——《摩登小男人》。

13 集嘅故事係咁嘅,話說有個唔太知女人點諗嘢嘅小男人——阿寬,佢既善良,又怕事,但竟然畀佢娶到一個靚老婆—— Ann 許(朱慧珊飾演)。不過,老婆頂唔順佢 30 歲人,仲吊兒郎當,決定同佢離婚,仲立即有其他男人追添,完。

你可能會問就係咁簡單,咁有咩好睇呀?

好睇嘅地方係當阿寬嘅老婆決定同佢離婚之後,呢個把嘴好硬,但原來內心相當掛住老婆嘅小男人,竟然畀佢遇上一個又一個女人,仲同佢發展咗唔同嘅感情添。

有人話,男人有三大願望:升職,發達,死老婆。

不過,阿寬用 13 集嘅劇情話畀你聽,其實男人都可以好長情同深情,只係唔識表達啫。雖然好多時候男人明知後悔都會照做,但偏偏呢個小男人就把持得住,決心要同老婆重拾舊好。

唔容易㗎!特別係當你喺最失落嘅時候,遇上嘅女人包括關之琳、劉嘉玲、吳君如、李嘉欣、于莉、毛舜筠、吳雪雯、陳玉蓮、黎姿……,如果話阿寬係 90 年代初最有豔福嘅男人的話,我諗唔會有人反對,呵?

 

柏原太賀推介:《摩登小男人》
關之琳 (圖片來源:《摩登小男人》電視截圖)

柏原太賀推介:《摩登小男人》
黎姿 (圖片來源:《摩登小男人》電視截圖)

劉嘉玲
劉嘉玲 (圖片來源:《摩登小男人》電視截圖)

柏原太賀推介:《摩登小男人》
于莉 (圖片來源:《摩登小男人》電視截圖)

柏原太賀推介:《摩登小男人》
港姐冠軍級人馬有楊寶玲(圖片來源:《摩登小男人》電視截圖)

柏原太賀推介:《摩登小男人》
仲有李嘉欣(圖片來源:《摩登小男人》電視截圖)

蔡少芬
蔡少芬(圖片來源:《摩登小男人》電視截圖)

柏原太賀推介:《摩登小男人》
蘇志威老婆劉小慧都係客串嘉賓之一(圖片來源:《摩登小男人》電視截圖)

而最神奇嘅係每次當佢遇上一個女人,有時懵懵懂懂,有時意亂情迷之際,就會有一個當時得令嘅歌手突破四次元咁走出嚟,唱隻歌畀阿寬聽,令佢對愛情有種似懂非懂嘅領悟。之後,又會有重量級嘉賓嘗試分析同預測呢段關係。

雖然阿寬身邊有好多損友,但佢反而從損友嘅經歷,又或者醉後嘅空虛,令佢更放唔低老婆,決心喺新追求者手上,搶番老婆返嚟。

當然,你會喺最後一集發現,原來阿寛同老婆嘅關係早早已經受到祝福,仲係打風都打唔甩。因為佢老婆嘅初戀竟然係黎明,而最終同咗呢個小男人一齊。到結婚嘅時候,主婚嘅神父係張學友,連幫阿寬箍煲去追番老婆嘅,仲要係劉德華添。

老婆嘅初戀情人,係黎明⋯⋯
老婆嘅初戀情人,係黎明⋯⋯(圖片來源:《摩登小男人》電視截圖)

主婚嘅神父係張學友
主婚嘅神父係張學友(圖片來源:《摩登小男人》電視截圖)

仲有劉華幫梁寬箍煲⋯⋯
仲有劉華幫梁寬箍煲⋯⋯(圖片來源:《摩登小男人》電視截圖)

一個單純嘅男人,一段失而復得嘅婚姻,喺如今仿似世界末日嘅疫症之下,顯得更珍貴,更溫暖。

不過,差不多 30 年之後,佢點睇當年同老婆嘅愛情呢?

人類嘅歷史同個人經歷其實係一樣,有困難嘅時候,亦有黑暗過後嘅期盼。一個小男人嘅堅持,只可以盡量掌握自己嘅愛情。但當所有人都學識珍惜的話,世界嘅命運,或者就會有少少唔同。

希望大家保持純真嘅心,搵到生命中陪伴終老嘅人,互相支持,共同渡過難關。

 

特別鳴謝:健康.旦 YouTube Channel

柏原太賀 facebook:https://www.facebook.com/Kashiwabara30

圖片來源:互聯網