advertisement

【秘密】柏原太賀

「我結婚喇!」
「同邊個呀?Alice?」
「梗係啦!除咗佢,仲可以係邊個!」

Alice前年加入咗我哋公司做admin,呢個冰山美人起初擺出一個拒人千里嘅樣。不過,冇計!好多人一聽到保險佬,就覺得一定好花弗,唔會認真。但其實我哋工作時間唔穩定之餘,仲要成日一講到自己職業就畀人落閘,要識女仔反而比打份工嘅朋友更難。當然,保險公司啲team頭會成日拎啲搵到大錢嘅出嚟曬,但係又點會個個都搵到咁多呢?

不過,做咗十年,叫做收入穩定囉!

坦白講,Alice雖然已經接近三十歲,但仲係索嘅,特別係佢平時只會化一個好淡嘅妝返工。不過,佢平日真係連我哋個「百萬圓桌」都懶理,兵都唔收。請佢一杯奶茶駛幾錢呢?佢都照畀返你!所以,當偉恒第一次同我講,佢成功同Alice約會嘅時候,我嚇到幾乎噴飯。

「佢會理你?你做咗啲咩呀?」
「好老套㗎。我淨係講咗句,佢好面善,問我哋之前係唔係識嘅。」
「之後呢?」
「佢問我想點。我就好大膽咁提議不如出去食餐飯,點知佢肯喎!」

偉恒呢個傻仔,肯定唔明白語言由唔同人口中講出,威力係可以差好遠嘅。偉恒一臉傻氣嘅樣,成日俾人覺得佢人畜無害,所以好多客都會信佢。對女人嚟講,呢種男人冇咩趣味,但安全感絕對滿到瀉出嚟。

我以為Alice同偉恒唔會玩得好耐。事實上,喺公司內,佢哋兩個之間嘅互動就只有交單同拎票,從來唔會有人覺得兩人之間,有多餘或者與別不同嘅眼神。而我似乎係唯一一個,知道佢哋有進展嘅人。

「你仲同緊Alice一齊呀?」
「係呀!做咩成日咁問呀?你好想我哋散,然後乘虛而入咩?」
「係兄弟,就唔好搵啲咁嘅笑嚟講。」
「講下啫,唔駛咁認真呀!」

雖然偉恒咁大個人,佢有自己嘅諗法,感情事亦係兩個人之間嘅事。但每次當我知道佢哋兩個仲一齊緊嘅時候,個心總係有啲唔舒服。有時,我會勸呢個兄弟多啲陪我哋一班人出去玩;有時,我會試探咁問點解唔公開兩人嘅關係。

「佢話唔想影響工作,冇必要喎。」
「好少女仔唔想公開,而且刻意避忌,唔攰咩?」
「佢好注重私隱,連facebook同IG都只係用嚟睇嘢。同埋,我哋話晒係經紀嚟,又唔係成日喺公司。」

偉恒對於Alice嘅信任,我只可以一笑置之。不過,我都聽講佢呻過,話Alice會忽冷忽熱,甚至偉恒覺得Alice 根本唔情願同佢出街,但勉強自己去應酬佢。呢個時候,我反而會安慰返佢,可能只係女人唔方便嘅日子,令佢心煩氣燥。

不過,所有嘢喺半年前發生變化。偉恒一直唔太頂得順香港呢刻嘅氣氛,佢想移民,但一直未有行動。不過,半年前某一晚,佢話自己好認真咁同Alice講不如移民嘅時候,Alice好奇怪嘅反應。

「咁關我咩事呀?」Alice問。
「我想我哋一齊移民,去展開新生活。」偉恒喺呢個時候,唔係拎戒指,而係拎咗一疊英國移民嘅資料出嚟。
「你意思係......」
「不如我哋結婚啦!」

據講,Alice先係呆咗,然後哈哈大笑到彎晒腰,成間餐廳都望過嚟。就喺咁尷尬嘅時候,Alice突然好爽咁講:「好呀!不過,唔好去咁旺嘅城市,我哋去個冇人識嘅地方。」

「咁即係......?」
「我同你結婚。」

******

【秘密】柏原太賀

兩人由派帖一刻,已經嚇死全公司嘅男同事;喺婚禮當晚,就輪到嚇死全公司嘅女同事。冇人想像到,化咗全妝同着上婚紗嘅Alice,樣同身材嘅豔麗程度,都完勝在場所有女人。果然,婚禮嘅女主角就係新娘子。

而我作為新郎嘅兄弟,即係配角中嘅配角,喺忙完一輪,終於開席嘅時候,忍唔住一定要出去食支煙,透下氣。就喺呢個時候,我見到Wilson。

【秘密】柏原太賀
Wilson同我,仲有偉恒,都係喺七年前,一齊由另一間保險公司跳槽過嚟。有段時間,我哋自稱三劍客。但隨住我同Wilson分別喺幾年前結婚,呢個稱號就已經荒廢咗。

「畀支煙我,好耐冇食。」

Wilson問我攞煙後,我幫佢點埋。兩個人,一齊吐出奇異嘅煙圏,唔知應唔應該開口。終於,都係我忍唔住。

「你對佢,有冇印象呀?」
「少少。你呢?」
「我認得。」
「嗯。」Wilson好用力呼出另一口煙。「你估佢認唔認得我哋呢?」
「我諗唔會。我估佢開頭應該係誤會咗偉恒,先會開始一齊。同埋,佢咁醒,應該唔會自爆。」
「咁就好,好彩偉恒夠鈍。」

******

七年前,為咗慶祝跳槽又好,預祝我哋事業有成又好。我哋三劍客打算一齊落夜總會,但礙於貴價場太貴,平價場又多阿姨,所以我哋決定玩啲新意。

「不如call啲PTGF出嚟玩啦!聽講有啲係高質大學生嚟。」
「邊有咁易呀?」
「試下囉!最多我先,係正嘅就互相報告啦!之後,交換逐個約啦!」

之後,我哋分別約咗三個PTGF出嚟,就只有一個值得我哋輪流再約,呢個女仔就係Alice。

【秘密】柏原太賀

由於偉恒比較純情,所以我哋之後約過Alice出嚟3P,但冇預到佢。Wilson呢條衰仔,仲加錢拍埋片嚟珍藏。雖然講明唔會影到樣,但其實當時有三段片,只有當中冇樣嘅兩段Alice事後check過。

******

Alice第一日返工,我就覺得佢好眼熟。所以,當佢返工冇耐,我已經重溫過段片,果然係佢!但當時,我啱啱知道偉恒同Alice一齊開始。於是,我就delete咗段片。

「你仲有冇keep段片呀?有就delete啦!」
「仲駛講,梗係delete咗啦!不過,就算係咁,我都好似對唔住自己兄弟一樣。」Wilson望住心口嘅兄弟襟花,好感觸咁講:「我好少想一個朋友盡快移民。」
「我都係。希望佢哋會enjoy新生活。」
「返去啦!要預備送客。」

我哋兩個一齊扔下煙頭,好彩附近冇食環。

 

(完)

 

重溫:
你是如此難以忘記

親密不愛人

技術文:情色資本不能獲利的理由

【情.境題】–純情女友曾經被包養

【情.境題】–妳能接受上司是他的過去式嗎?

Let's Play (1-15)

不再分離(一集完)

心野(一集完)

國民老婆結婚喇!

分手時,請讓我靜靜離開

真的有無疾而疼的愛情嗎?

我上了成為守護者的陌生人(1-20)

今年聖誕,不如罷了

原來婚姻是這樣一回事

寧愛夏迎春,莫負鍾無艷

放閃病態

消失的情書

男神與渣男的一念之差

前度:感情Resume

辦公室偷食特別多

來自山下智久的輕熟誘惑

最完美的配對(二)

最完美的配對(一)

最輕易的壓抑(一集完)

最犯禁的限聚(一集完)

偷愛的上集故事(一集完)

最自卑的禁語(一集完)

最孤獨的曖昧(一集完)

最卑劣的分手(一集完)

最溫暖的出軌(一集完)

人來人往,不如閉起雙眼(一集完)

地球爆炸前讓我再次爆房(全三集)

兩個天堂(全十九集)

愛上不存在的妳(全十六集)

靈玲(全八集)

野.火(全十集)

前度暫存迷你倉(全兩集)

如果Double May有特異功能(全十五集)