大家都知道阮小儀是愛狗之人，家中育有愛犬細佬佬。昨日她與細佬佬結伴出席活動，細佬佬被「遮遮」小儀全程抱實，勁乖巧冇扭計。台前活動過後小儀與細佬佬齊齊接受訪問，小儀透露細佬佬其實是性格巨星、脾氣頗大，今次陪小儀出席活動，實在十分畀面！這份深刻的姊弟（主僕？）情，原來是由細佬佬一個月大時開始培養出來的。
「遮遮」小儀與細佬佬的相遇
小儀的愛犬細佬佬是一隻芝娃娃，人寵的相遇原來有段故。小儀一家和細佬佬一家很有淵源，背後經歷過的事更是窩心動人。
話說多年前小儀的媽咪經常在屋企附近經過一間士多，士多老闆養了一隻芝娃娃，對芝娃娃採取放養政策，沒有絕育，不久就見牠生了第一胎小狗。小儀回憶道：「細佬佬係士多狗媽媽第一胎其中一隻BB，我領養咗細佬佬後就帶佢返屋企。當時細佬佬只係個幾月大，由佢未戒奶開始、慢慢用奶浸乾糧畀佢食，睇住佢一日一日咁長大，不經不覺而家已經9歲！」
小儀領養細佬佬後，士多狗媽媽又生了第二胎。小儀的媽咪見到士多繼續放養狗媽媽，心想難道牠要繼續在這𥚃生活，又繼續生第三、第四胎？於是到了後來，小儀的媽咪就決定領養了細佬佬的媽咪。
同是芝娃娃 Dee Dee與細佬佬性格大不同
小儀在領養細佬佬之前，一直養著一隻叫Dee Dee的芝娃娃，Dee Dee在15歲時離世。小儀回憶Dee Dee是一隻天生狗明星，性格隨和人見人愛。「細佬佬性格同Dee Dee完全唔同，細佬佬脾氣十足，我試過搵動物傳心師同佢溝通，佢竟然反問傳心師，點解狗狗唔可以有性格？」講到細佬佬的脾氣，小儀有一番感觸，亦感慨養寵物不只為了令自己有個伴，是一種相互的包容與忍耐，付出與陪伴：「好多人開始養動物嘅時候，諗住養動物係想佢哋陪伴自己，其實動物都需要我哋嘅陪伴，好似家人一樣。」
要細佬佬年年驗身：愛一個上一課
小儀回憶已離世的Dee Dee 13歲時逐漸步入老年，病痛漸多，經常出入醫院。回想Dee Dee老年時生病的痛苦，小儀現時仍感到愧疚：「記得以前Dee Dee嘅獸醫建議我每年帶佢去做一次身體檢查，但係我當時冇為意，到發現Dee Dee身體有毛病嘅時候已經太遲，之後Dee Dee經常出入醫院，直至離世。」如今細佬佬也9歲，逐漸步入中老年：「我每年都會keep住帶佢檢查身體，有問題可以及早發現及時醫治。」由於細佬佬年紀太大，已經不符合資格購買寵物保險（投保年齡須屆乎13週至8歲），今次出席活動，小儀聽到不少保險知識覺得獲益良多，如果朋友寵物年紀較細，寵物身體有狀況是都可以有金錢上及其他方面支援，不會失去預算。
有多愛有多痛 曾揚言不再飼養寵物
人類與寵物互相陪伴，過程是甜蜜的，亦滿載美麗的回憶。Dee Dee離世時令小儀傷心難以平伏，她也曾經表示，因為不想再面對寵物生病與離世帶來的痛苦，以後不會再養寵物。這個想法到目前又有了微妙的改變，小儀經歷了過去養育Dee Dee的經驗，令小儀有信心更好地安排細佬佬即將步入老年的生活；另外現時養寵物的人越來越多，社會上更多寵物友善的設施、更多為寵物度身訂造的保障，也令寵物主人得到更多的支持。
如今再問小儀以後會為細佬佬添個伴嗎？會考慮再養寵物嗎？以前她心目中的答案絕對一定是「NO」，現在她不敢肯定、或者也有動搖。人寵的愛與男女感情事也好像同出一轍。未來的事，就聽任心情，再看上天安排吧。
