advertisement

媽媽護士長專欄#46【英國返工返學的歧視實況】

呢個又係好多人會問我嘅問題:「英國歧視嚴唔嚴重?」

可以咁講,呢個世界冇一個地方係冇歧視嘅問題。因為係皮膚顏色種族嘅問題,而受到歧視,唔可以話冇關係,因為有些人因為教育、經歷或各種原因特別唔喜歡亞洲人亦唔出奇。就好似之前剛剛有coronavirus嘅時期,我老公都曾經喺街上畀人叫佢做「corona」。但係好彩我喺英國生活咗幾年,無論係我自己平時行街、去超市或者係工作上都冇遇過歧視問題。

我兩個仔,佢哋係中學生,即使間學校沒有太多亞洲裔學生,喺學校都冇人歧視佢哋。

所以我個人認為,反而你自己個人性格、表現及能力,先係影響你受唔受到歧視嘅主要原因。

工作上,我甚至都有見過白人反而歧視白人。如果嗰個人又懶、做嘢又唔掂或者係行為古古怪怪嘅,即使佢哋自己白人,都會講佢壞話㗎﹗

另外就係一啲唔埋堆嘅人,自己做自己嘢,得閒都唔一齊傾下偈嘅人,佢哋都會因為自己收收埋埋而畀人歧視。

埋堆好重要,好似阿仔學校上年九月開學,學校嚟咗一個香港嘅男仔,已經半年,但係佢而家break time,成日都只係得佢自己一個人,冇朋友。阿仔話上年開學時,每個同year嘅同學都有主動去同佢講嘢、say hi。但佢自己就沉迷自己個手機,唔同其他人social,所以最後而家就冇人同佢玩,成日企埋一邊。

其實外國嘅小朋友,通常一見到有新同學都會好主動去認識你,如果是你自己太被動、太怕醜、或是只群在Chinese人堆中。咁就好難叫人哋唔歧視你唔畀機會你啦﹗

 

本文作者:媽媽護士長

兩子之母,護理學碩士畢業,任職公立醫院護士超過十年,曾經於最前線對抗沙士疫症,及後晉升醫院護士長。因懷有提升香港護理行業者質素之理想而開展教育事業,於多間專上學府擔任護理系講師多年。現移居英國並於當地成為註冊護士。

 

fb @ HKnurseUK