最近看到很多香港朋友都已經來到或即將出發到英國居住，數數手指自己原來已經在這邊生活了好幾年。
回想初初來到英國，同大部分人諗法一樣，本以為應該冇甚麼壓力。 冇錯，頭幾個月真係好開心，又係夏天，可以和家人揸車周圍去玩，有時在屋企煮下飯做下餅。
可惜當小朋友一開始返學，而你每日都係做工人姐姐嘅工作，自己又冇收入，冇工作嘅滿足感，下下要用老公嘅錢，真係好唔自在，壓力就係咁樣出來。
本身我自己都唔係鐘意熱鬧嘅人，而我哋在英國又冇其他親戚。每到冬天，經常陰陰沉沉，又落兩天氣又凍，加上有幾個月日頭時間非常短，早上八點先天光，下午三點就天黑，基本上大多時間就匿晌屋企，真係冇抑鬱症都好容易有抑鬱。
移民咗嚟英國幾年，雖然都識認咗一啲朋友仔，但因為唔似香港咁方便成日都可以出去 high tea 聚會，所以間中都有啲孤獨感。
好彩我本身識揸車，就算有時好悶想出去行下，或者去超市、去同朋友聚會都唔駛靠人，所以晌英國生活，識揸車真的好重要。
另外更重要就係用英語溝通，本身我嘅英文自問唔係太差，但剛剛來到未太習慣在電話用英文溝通，不能面對面談話的溝通，因為沒有肢體和表情輔助而變得較為困難。
本身有次幫阿仔 book 咗牙醫，但診所突然打來話改咗時間，咁我寫低時卻又寫錯咗時間，搞到 miss 咗個 appointment。我當時即刻爆喊，覺得自己好冇用，連少少嘢都做錯。
好彩自己心態調整得快，積極再搵機會學好及多啲練習英文。所以返工其中嘅原因就係可以練習下英文，而且可以見下其他人，融入個社會，咁生活就容易啲。
雖然我都想好多香港嘅家人朋友可以過嚟英國，但係真係請大家諗清楚移民係咪適合自己。我相信本身適應力強及時常樂觀正面嘅人係應該冇問題，good luck everyone。
本文作者：媽媽護士長
兩子之母，護理學碩士畢業，任職公立醫院護士超過十年，曾經於最前線對抗沙士疫症，及後晉升醫院護士長。因懷有提升香港護理行業者質素之理想而開展教育事業，於多間專上學府擔任護理系講師多年。現移居英國並於當地成為註冊護士。
fb @ HKnurseUK
