《延禧攻略》番外篇超精彩！高貴妃處處針對皇后，竟是為「阿滿」報仇？

《延禧攻略》70集終於大結局，但熱潮依然未退！繼續有番外篇等大家繼續呢股「延禧潮」！不過今集嘅主角係「昭華公主」（王鶴潤飾演），亦即係魏瓔珞所生的第一胎－乾隆嘅七公主，而佢竟然愛上爾晴嘅兒子「福康安」（王一哲飾演）！呢個劇情會唔會太峰迴路轉？

喺《延禧攻略》裡面，大家對爾晴呢個角色恨之入骨，佢使手段陷害瓔珞不特止，仲俾「綠帽」傅恆戴，竟然懷上皇帝嘅兒子！今次番外篇，二人嘅恩怨當然冇消失過，昭華公主遺傳咗媽媽嘅聰明、果斷，但竟然愛上爾晴嘅兒子，上一代嘅仇怨，帶到下一代，唔知今次又會唔會好似瓔珞同傅恆咁，錯過咗呢段姻緣呢？

歷史上，七公主最後會同蒙古親王「拉旺·多耳濟」（王宇威飾）成親，今次當然都唔少得呢個重要角色，雖然未知劇情最後會否跟隨歷史走，但睇下劇照，二人嘅互動似乎都好有愛啊！（重點係和親王顏值都好高！）

除咗昭華公主同福康安，今次番外篇仲會解開高貴妃同瓔珞姐姐魏瓔寧「阿滿」嘅謎團！早前《延禧攻略》總製片人于正，喺微博分享兩張照片，其中一張係魏瓔寧哭倒喺高貴妃懷中嘅照片，但劇情中並冇交代到兩人嘅關係～

唔少心水清嘅劇迷就推測，高貴妃喜愛戲曲，魏瓔寧手藝精巧，做出嚟嘅戲服深得貴妃喜愛，因此高貴妃相當疼愛魏瓔寧，後來阿滿遭殺害，高貴妃斷定係傅恆和同富察皇后下嘅毒手，所以喺《延禧攻略》中，高貴妃先會處處針對皇后，但其實背後原因係想為阿滿報仇～究竟事實係咪咁，就要等番外篇播放先知喇！