要講今季最hit嘅美劇，一定要數《怪奇物語》第二季，由預告片一出，大家都開始推測第二季會發生咩事，Eleven究竟去咗邊？Will係咪真係已經冇事？上下顛倒世界又係咪已經消失咗？當大家以為一切嘅迷團將會喺第二季解開嘅時候，原來局中有局！一齊嚟睇下以下5大迷團大家有冇咩頭緒？（小編溫馨提示：大量劇透注意）
- 上下顛倒世界（the Upside Down）
早已喺第一季，大家都估梗Will所見到上下顛倒世界，究竟係咩嚟？有人話係地獄，有人話係未來世界，但呢個顛倒世界除咗多咗一堆未知物種嘅奇怪生物，場景擺設基本上都同現實世界一樣，似乎係「平行時空」呢個說法更類似，大家又點睇？
- 黑影怪物嘅目的
由第一季開始，黑影怪物每一次出現，都令人諗唔明佢真正嘅目的係咩，究竟佢係咪最終嘅BOSS，定佢係想入侵現實世界？製作人Duffer兄弟就喺Netflix特輯《Beyond Stranger Things》中講過，黑影怪物就好似Harry Potter裡面嘅伏地魔一樣，將會成為每一季嘅connection，令人聯想到或者佢嘅最終目的係想將現實世界吞噬，同顛倒世界融為一體。
- Eleven嘅特殊能力
外表睇起上嚟同普通女仔冇咩分別嘅Eleven，從來冇仔細解釋過佢嘅超能力喺邊度嚟，由第二季我哋得知Eleven嘅媽媽似乎係經由電擊後先得到超能力，咁Eleven嘅超能力係遺傳至媽媽，定係都係經由科學實驗而獲得嘅呢？又係一個未解到嘅謎！
- 其他超能力者嘅出現
直至上一季，大家都以為係得Eleven一個超能力者，點知今季一開始第一集，就已經出現咗其他嘅超能力者（小編仲以為開錯片），今季超能力者Kali嘅號碼係008，如果咁計，即係仲有9個超能力者存在喺世上，甚至更多。
- 被選中嘅Will
小編覺得可憐嘅Will雖然係成套劇嘅主角之一，但經歷都係最慘嘅一個。由開頭乜都唔知就踩入咗顛倒世界，嚟到新一季，仲要做埋顛倒世界嘅間碟，究竟咩原因令佢成為被選中嘅一位？或者佢同顛倒世界有某種關連先會被選中。（黑人問號）
圖片來源：Netflix、影片截圖
