親手整最窩心!製作獨一無二嘅啤啤熊

相信大家仲係小朋友嘅時候,都夢想過有一隻專屬於你自己嘅啤啤熊,依家機會來了!嚟梗臨近聖誕,挪亞方舟會喺由12月9日至2018年1月1日(逢星期六、日及公眾假期)期間舉行「啤啤熊製作室」,等你親手整一隻獨一無二嘅啤啤熊,聽到童心係咪返晒嚟先?

行入工作坊,現場就有工作人員指導你一步步咁整,由入棉花,到縫紉,打造一隻獨一無二嘅啤啤熊,手殘都唔使怕~整完之後,仲有多套得意嘅運動套裝,以及聖誕服飾俾你揀,小編就好想幫啤啤著返套聖誕裝,夠應節呀嘛!

除咗著衫仔,仲可以幫啤啤熊噴香味!有齊幾款有機植物提煉精油香水揀,就算撞咗樣,都唔會撞味呀嘛~(如果都撞埋,咁你哋就真係好有緣喇!)

最後,仲可以幫啤啤拎張「出世紙」,為佢改個名,影相留念,好有Toy Story嘅感覺呢!

今次嘅工作坊唔只有得玩,仲可以做善事,因為工作坊嘅部分收益在扣除成本後,會撥捐俾慈善機構,好有意義嫁~

費用:
挪亞方舟入場費為$168(成人)$138(兒童及長者)
入場費包括免費任玩園中八個活動;當中「啤啤熊製作室」及「熊の壽司製作班」須另外收費。

啤啤熊DIY $100

各款醒目運動服(自選項目) $120

有機植物提煉精油香水(自選項目) $20

紀念照片連相框(自選項目) $100

 

挪亞方舟地址:

新界馬灣珀欣路33號

查詢電話:
3411 8888

 

除咗自己整啤啤熊,作為一個熊仔粉絲,又會咁容易滿足?今個聖誕,iSQUARE國際廣場同日本知名的微積木品牌nanoblock合作,喺2017年11月21日至2018年1月7日期間,帶嚟放大版聖誕立體微積木佈置,仲有限定聖誕小熊裝飾,唔係唔去打卡呀?

advertisement